LiHKG Tools
歡迎 訪客, 登入
首頁 ›› (少甜) 由嗰日起,我扮成TB媾女 (尾已爛)
作者: 盧旺達 2017-10-13 07:34:30
LIHKG Link
最後更新: 2017-11-05 23:55:59 最後擷取: 2018-01-19 11:38:39
#1 2017-10-13 07:34:30 縮小字型 放大字型

單刀直入!

我個名叫盧旺達,Teddy,21歲,啱啱asso畢業,升唔到大學,係條廢柴,平時都係做兵多,拍拖經驗係0。

同女性最親密嘅接觸,應該係個女仔坐完巴士張櫈,跟住輪到我坐,嗰種體溫嘅交流,絕對超乎靈與慾,讓我時至今日都仲係回味無窮...

好!廢話講到依度。

故事係咁發生嘅,早兩日我買咗張機票,諗住獨遊韓國 當係畢業旅行,順便散吓心,再諗吓之後條路點行。

而今日我就已經嚟到機場,亦一早check咗in,坐咗係關口入面間coffee shop喥嘆咖啡。

我戴住副黑超,撓住腳,啲太陽光由側面打落嚟,我覺得自己型到飛起。

望下隻錶,差唔多夠鐘上機,我一身旅遊達人嘅做型,仲要帶住部單反相機,一陣啲囡囡見到我肯定濕撚哂。

但諗諗下,然後又照吓塊鏡,都係收收皮穩陣。所謂毒撚切忌有自信!講真,我成碌柒咁,個人又生得矮,真係好難有女會鍾意我...

But唔緊要!我話過,今個trip要重新改變自己,見到有啱心水嘅女就要主動出擊,唔再做一條淨係識淆底嘅廢柴!


話咁快就準備登機,我行去個寫住(十點半 首爾)嘅水牌下面自拍,然後擺張相上ig,預料會有兩個like左右,一個我老母,一個我個妹...

但無所謂!我志在參與,當係記錄生活點滴。

自拍完,搵咗個位坐,再環掃下依班同我一齊登機嘅乘客。我屌!真係搵件靚女都無,唔係韓妝肥婆就係無波黑肉港女,想搵條索少少嘅女嚟ff下都無。

真係有啲失望,唯有做返個自閉仔,撚下相機。事實上我根本就唔識影相,部相機都係琴日先買,平時影親相都會柏金遜症發作,手震震,搞到張張相都out哂flow。

買相機嘅原因係因為我有個計劃,就係如果喺韓國見到一啲ok正嘅香港女仔,就即刻影佢地,跟住同佢地講話張相影得好靚,想send返畀佢地做記念,跟手抄牌拎電話,perfect。

再等多陣,地勤人員開始嗌咪叫人入閘,其他乘客都紛紛企起身,而我亦都唔執輸,諗住快手啲上飛機,然後坐定定昅女。

點知一企起身,個屎眼突然之間好痛。明明臨出門口之前已經揉咗痔瘡膏,點解仲係咁痛嫁?我掩住個屎忽,等咗五分鐘左右啲痛楚先慢慢消去,頭先真係痛到我標哂童,好彩都仲算頂得住。

依家重新出發,乘客都走得七七八八,我夾住個屎忽,慢慢行去登機閘口。

幫我吸印個空姐三十尾,肥肥地,紮起個髻又柒柒地。我見個屎忽無咁痛,就諗住搵佢嚟小試牛刀,睇吓自己啲flirt女技術有無進步。

「係咪盧先生啊?」個空姐問我。

我fingfing手指,懶係型咁話「Nonono,叫我Teddy得喇,咁見外做咩姐」

個空姐唔識反應,O撚哂嘴咁望住我。

唉...又失敗。

我手快快咁搶返本passport,再話「無事嘅話我都係收皮先喇」跟住就即刻衝上機,摺埋自己。

好彩頭先無乜人見到,唔係就柒姑碌喇...
#2 2017-10-13 09:25:51 縮小字型 放大字型

等咗好耐好耐,架機都仲係未飛得,睇嚟有人入咗閘但未上機,搞到而家de哂lay。咁啱我隔離個位就一直懸空,所以遲到嗰條友好大機會會坐喺我隔離。如果一陣上到嚟嘅係一條廢中或者廢老,我就肯定大大聲聲咁屌柒佢。

再過一陣,班乘客開始鼓燥,不斷質問啲空姐點解咁耐都未起飛。而喺依個時候,我就聽到前面有個空少一路急步行一路話

「小姐,快少少喇,我地要起飛喇」

有把女仔聲話「而家咪行緊囉,又唔係遲好多」

我望向走廊,見到佢地兩個一步一步咁行埋嚟,個女仔拎住兩大個名牌紙袋,個空少就滿頭大汗咁跟喺佢後面。

個女仔又話「如果你地唔想人遲到嘅話,就唔好喺關口入面開咁多間舖頭啦」

嘩,個女仔都幾唔講道理,好似全世界都欠咗佢咁,依種人都係少惹為妙,但佢地正正就喺我身邊停低。

個女仔望住我,我又望住佢,原來係靚女嚟,雖然塊臉係西咗啲,個樣又串咗啲,但毫無疑問,確實係一個美人。

佢著住件淺藍色一字膊衫加白色熱褲,個膊頭又白又滑,好撚好J。

我睇到入哂神,就連而家發生緊咩事都唔知...

「先生,麻煩你企起身讓一讓依位小姐坐入去吖,我地真係要起飛嫁喇」(我坐喺左邊窗口位嘅外面)

「哦」我如夢初醒,隨即企起身。

個女仔塞咗兩袋嘢比個空少之後就zip咗入去個窗口位入面,經過我身邊嗰陣仲”㗩”咗聲。

我心諗,洗唔洗咁mean啊?

不過你靚女,我原諒你。
#3 2017-10-13 11:01:06 縮小字型 放大字型

飛機終於起飛,我個內心不斷掙扎。

有條咁靚嘅女坐係隔離,應該係上天賜比我嘅機會,無理由白白浪費。見佢應該都係一個人,話唔定可以join埋一齊玩呢。

講真,我真係好想出pool,打咗飛機十幾年,左右手都玩到熟哂,如果依家再唔出手,真係好驚第時要轉職做魔法師啊,平時我打online game都係玩開tank嫁。

經過一段漫長嘅掙扎,我決定鼓起勇氣yo吓佢。

「hello,我叫Teddy,你點稱呼啊?」

佢望一望我,無出聲,然後就望返出窗口。

仆街,好撚大舊檸檬啊喂。

但我無氣餒,決定再接再厲。

「去韓國?」

佢又”㗩”咗聲,跟住西口西臉咁啤實我。

「架機飛韓國,唔係去韓國係去邊啊?去烏魯木齊好唔好?」

「一個人?」

「你見唔見到有第二個吖?你再騷擾我,我就叫人嚟嫁喇」然後佢就載上耳機,與世隔絕。

屌佢老味,痴撚線嫁咩?我知我唔係靚仔,但洗唔洗當我痴漢咁啊?仲要叫人嚟?你塊西鑲金咩?

為咗保留返自己僅有嘅尊嚴,我決定唔再撩佢,廢事佢ff我點樣強姦佢...
#4 2017-10-13 13:27:49 縮小字型 放大字型

飛機不斷航行,故事嘅轉捩點亦即將發生。

當時我尿癮起,諗住去廁所解決。

喺準備踏出第一步嘅時候,個女仔突然開聲叫住我「等等!」

我呆望住佢。

佢好快手咁除咗自己件外套,包住我下身。

「乜事啊?」我問。

「殊...而家仲未有人見到」

跟住佢喺手袋入面摷咗包嘢出嚟塞畀我。

「你睇吓依隻啱唔啱用,唔啱用嘅話我仲有,不過你而家都係快啲入廁所搞返掂佢先啦」

咩料啊?完全唔知發生緊咩事。

我一頭霧水咁行入廁所,望住手上包嘢,打開個包裝先知道原來係包m巾嚟。

點解佢無啦啦塞包m巾畀我呢?佢個人咁古怪嘅。

但當我望住鏡中嘅自己,再望望屎忽上面嘅一灘血蹟,我終於明白成件事嘅因由...

原來,

條女以為我漏m啊!!!
#5 2017-10-14 00:31:08 縮小字型 放大字型

作為一個雄赳赳,氣昂昂嘅男子漢,又何來漏m之有?

事實上係我痔瘡爆血,搞到成條白色褲都係血蹟。

講真,痔瘡依家嘢好多人都有,我只不過係比較嚴重啲咁解。

原本都諗住一早割咗佢嫁喇,但又怕樣衰,拖吓拖吓去到依家都仲未割,搞到今日發生啲咁尷尬嘅事,真係柒到想搵個西窿捐入去。

所以我想喺喥奉勸大家一句,

”有痔瘡,盡快割”

痔瘡同包皮一樣,割咗之後你就大個仔嫁喇。

返番嚟地球,而家我啱啱止完血,掉咗條底褲,再搵件恤衫嚟遮住灘血蹟。照一照鏡,應該就毫無破綻。

但解決完一個問題,另一個煩惱亦隨之而嚟...

我一陣間要點樣同個女仔解釋呢?

諗咗一陣,都係決定照實同佢講清楚,免得產生更多不必要嘅誤會...
#6 2017-10-14 02:20:02 縮小字型 放大字型

離開廁所,返到坐位,我即刻還返件外套畀個女仔,跟手諗住同佢解釋清楚,但就畀佢搶先一步。

佢好關心咁問我「ok吖嘛?」

「其實呢...」

「我明白嫁,大家都係女仔,有時啲經期唔穩定,早咗幾日嚟都唔知,搞到鬼死咁尷尬。但依啲嘢好平常嫁咋,我成日都係咁啦,所以都係隨身帶備各種m巾,隱陣好多」

跟住佢就喺個手袋喥摷哂啲m巾出嚟,如數家珍。

「嗱你睇吓,依喥有齊日用夜用、有翼無翼、吸水防漏、可循環非回收、止咳化痰、去暗瘡除口氣,薄荷味、生果味、海洋味、薰衣草味同最新出嘅異國非洲大草原味。你鍾意用邊隻都可以隨便用,我無嘢多,m巾就至多喇」

我畀佢當堂嚇一跳!然後就得啖笑。

講真,有時真係好唔明啲女人,去嗰幾日旅行帶成抽m巾出嚟做乜鳩姐,黃河缺堤呀依家!?

趁著空檔,我試圖再度解釋,

「唔洗客氣喇,其實我係...」

但佢又再一次打斷我,

「係喎,頭先唔好意思啊,我以爲你係男仔所以先對你咁無禮貌,我對女仔唔係咁嫁」

「吓?點解啊,你好憎男仔嫁咩?」

佢點一點頭,

「男人依種生物呢,係垃圾嚟嫁,每隔五秒鐘就諗一次淫嘢,每隔十秒鐘就諗一次扑嘢,滿腦子歪念,郁啲就摸手摸腳,成機抽水,真係連動物園啲猩猩都守規矩過佢地。所以有時我真係好想將佢地group埋喺個荒島入面,然後一把火燒死哂佢地」

「洗唔洗玩到咁大啊...」

聽完佢一輪嘴講完之後,我打從底裡害怕,佢對男人嗰種恨,簡直係恨之入骨。我諗如果有一日女權當道,佢真係會第一個走出嚟將啲有J嘅男人逐個逐個批鬥死。

所以諗諗吓都係咪制喇,由佢以為我係一個TB算,廢事佢一陣嬲起上嚟唔知搵啲咩嚟燒我春袋,咁就到時真係goodbye world喇。

反正幾個鐘頭機好快就過,陣間落機揮手講完Bye bye就乜事都無發生過,唔洗煩,亦都無手尾跟,great!
#7 2017-10-14 21:11:22 縮小字型 放大字型

「吖係喇,你個名係咪叫Teddy啊?」佢問我。

「係啊,你呢?」其實我唔太想講嘢,因為好驚講多錯多會穿煲。

「我叫Macy啊」然後佢伸手示意想同我握手。

為表禮貌,我輕輕握住佢對纖纖玉手,依次亦都係我成年以嚟第一次接觸女性嘅軀體。第一個感覺係隻手好凍,再摸兩摸就覺得好滑,好想奶,但我強制壓止住自己嘅衝動,以免個淫樣出哂嚟,露出馬腳。

「係呢,你點解想去韓國嘅?」佢問。

「無啊,啱啱asso畢業,諗住韓國近近地,咪當係嚟個Grad trip」

「哦...等我仲以為你想去韓國變性整容添」

估唔到佢講嘢咁直接,崩口人忌崩碗,依種咁唔經大腦嘅說話方式好難識朋友嫁喎,好彩我係一個偽TB,唔會介意,唔係真係得罪咗人都唔知咩事。

「傻啦,我地依啲TB好proud of自己係TB嫁,又特別又清高,一有啲咩人對我地唔好又可以話佢係歧視,幾爽啊,道理好似即刻企返哂喺我地依面咁」

「你又好似講得幾啱喎...」

佢點哂頭,好似好認同我嘅睇法。

感覺上,佢個人好似無乜主見,人地講兩講就會好buy嗰種。依隻女仔嘅特點就係好易呃,難聽啲講就係蠢...
#8 2017-10-14 22:46:51 縮小字型 放大字型

「唔好講我喇,講吓你吖,做乜自己一個嚟旅行嘅?」我問。

佢扁一扁嘴,好似有啲失落咁話「唉...原本仲有個女仔friend陪我嚟嫁,但佢臨時話屋企有事甩咗我底。本身仲諗住同佢一齊睇bigbang演唱會,而家得返我自己一個,都唔知睇唔睇得成...」

鍾意得bigbang嘅,睇嚟taste都係麻麻。講真吖,要睇嗰五條矮撚跳舞,我不如去睇袖珍人馬戲團...

跟住佢突然好專注咁望住我

「咦!望真啲,你都幾似bigbang入面個太陽喎」

唔撚係掛!?搵條咁嘅侏儒同我比?雖然我生得矮姐,但起碼都有170吖!大佬啊,嗰條侏儒仔連一米六都唔知有無喎...

「你依隻樣喺TB界係咪好殺食嫁?」

「ok嘅...叫做有啲市場」

之後佢望實我心口,好好奇咁問「你地成日紮住個胸呢,會唔會搞到變哂型嫁?」

「會嫁,而家變到等腰三角形咁嫁喇」

佢笑到gapgap聲,額頭貼住我膊頭「哈哈哈哈哈,你好搞笑啊」

「ok啦,哈哈哈」

老實講我個人真係唔太識得講大話,但唔知點解扮起TB上嚟又入型入格,而佢依家又信到十足十,搞到我真係有啲內疚。

望下坐位前面個screen,仲有兩個鍾頭先會到,希望真係頂得住,唔好穿煲啦...
#9 2017-10-15 01:03:03 縮小字型 放大字型

同Macy傾耐咗之後就發現,佢嘅性格同第一印象真係差好遠,初頭以為佢係嗰種生人勿近,串串貢嘅黑面神港女,但事實上佢係好nice好有禮貌,對住啲空姐都唔該前唔該後,而且個人仲要蠢蠢地,幾可愛。

好似頭先咁,個韓國空姐過到嚟送餐,問我地想食咩,咁我就叫咗個白汁,有啲飯有啲雞皇,然後個空姐就問我「do you want some drink?」,但我英文唔好,聽唔明,咁Macy就幫我翻譯,問我要唔要加嘢嚟飲,我唔洗講啦,就要百事,點知佢話百事有可樂,我都唔知佢up咩鳩,跟住我話唔要嘢飲,佢話免費 ,我話唔要,跟住佢話我係咪睇電視,屌佢老味 on99

所以話,佢真係幾蠢嫁。

嚟到依家,我地一路食飯一路吹水,原來佢係浸大生,讀護理,夢想係儲夠錢移民去南美洲嘅女兒國,嗰喥無男人,無JJ,就連動物都淨係得雌性,係人間天堂咁話。咁我就問佢,點解唔索性近近地喺香港出家做尼姑呢,點知佢就話,如果唔洗削髮嘅話都可以考慮吓,我心諗,你都on9嘅...
#10 2017-10-15 04:29:12 縮小字型 放大字型

毒撚有種心態好噁心,就係如果有個女仔同我地談笑風生有講有笑,就會覺得自己身價飄升與眾不同,仲會ff住隔離啲男人會好羨慕好妒忌,以為我有女相伴唔再係一條無女嘅可憐蟲。但事實上根本就no one give shit,柒頭依然係柒頭,仲要係個得意忘形亂打飛機嘅柒頭。

「咦,你唔食杯雪糕呀?」Macy打斷咗我忘情嘅自high。

「唔食喇,我麻麻地甜嘢」

「吓,真心咩?我最鍾意就係食甜品,一陣落到機就要即刻去食嗰間好出名嘅抹茶蛋糕店」

跟住佢就將最後一羹雪榚放入口中,再露出一副好滿足嘅表情。

我見佢食得咁開心,於是就將自己杯雪榚擺去佢張餐枱。

「你食埋我依杯吖」我話。

「真心咩?」佢好開心咁話。

「嗯」我點一點頭。

「Yeah」跟住佢就攞隻叉嚟拮咗舊生果畀我「你請我雪榚咁好人,我請返舊菠蘿你食當回禮,啊~」

望住佢咁可愛嘅表情,搞到我臉都紅哂。

但我望返舊菠蘿,又有啲猶豫,不竟我未試過畀女仔喂嘢食,覺得唔好意思都係好正常。

佢向我咄咄進逼「唔洗怕喎,無毒嫁~」

睇嚟無辦法喇,人地女仔一番心意,真係沒有任何拒絕嘅理由。

於是我狠狠地一啖𡁻落去,咬到連隻膠叉都斷撚埋。

「嘩,洗唔洗咁大力啊?」

依一刻嘅我,

經已失去任何知覺。

呯呯嘭嘭嘅心跳聲話比我知,

係愛啊,哈利...
#11 2017-10-15 20:53:48 縮小字型 放大字型

其實我好清楚,咁容易愛上一個人,對自己係無任何好處。

更何況我地嘅認識係因為一個謊言,所以依段感情係注定沒有好結果。

佢嘅開始,同時意味住結束。

「The airplane will land within 10 minutes,every passengers please wear your seatbelt」

空姐透過中央廣播話畀所有乘客知飛機即將降落。坐位前面嘅電視螢幕亦喺依個時候關上,原本睇緊電影嘅我亦隨即放下耳洞,緊緊扣實安全帶。

「係喇,依家無嘢做咁悶,不如我地一齊聽首歌吖」

「咩歌啊?」

佢將電話連上耳機,再將一邊耳洞塞入我左耳

「太陽嘅《eyes nose lips》」

「吓?條友讀bio㗎?咁多器官嘅」

「哈哈哈,痴線,首歌係講佢掛念個女仔嘅一切啊」

「哦...」

其實我心諗,啲朝鮮泡菜寫歌真係亂鳩咁嚟,乜撚嘢eyes nose lips啊?咁嘅歌名同我喺幼稚園唱嗰首head and shoulders knees and toes有乜分別?仲有,如果你係真心掛住一個女仔,我就唔信你係掛住佢嘅眼鼻嘴喇,咁樣真心咩?你明明係想講ass breast同vaginal!

「我播喇喎,留心聽,你一定會鍾意...」
#12 2017-10-15 22:20:36 縮小字型 放大字型

音樂播放,憂鬱嘅旋律帶領我地走入同一個世界。

Macy閉上眼睛,靜心聆聽住每一個音符。

奶白色嘅耳機連接住二人嘅思緒,但我嘅心聲,又能否透過耳機傳達給你?

「嘩,你睇吓窗外面,好靚啊」前坐個細路好興奮咁對住佢daddy話。

我同Macy同時望出窗外,透過稀薄嘅雲層,我地終將見到韓國嘅表面。

「要降落喇...」Macy話。

跟住就係一段急速嘅氣流,飛機穿過雲層,慢慢降至地面。

「各位親愛嘅乘客,我地經已到達仁川國際機場,祝你地旅途愉快」

飛機順利降落,意味住依段短暫嘅緣份即將結束。

我解開安全帶,慢慢企起身,再將擺喺儲物櫃入面嘅hand carry利李一一攞出嚟。

「我地仲會唔會見面啊?」Macy一臉依依不捨。

我忍痛地講出一句瀟灑無比嘅說話

「隨緣啦」

再見喇,陳美詩,我會永遠記得你,一個on99,生勾勾,誤會我係TB嘅女仔...
#13 2017-10-16 00:50:55 縮小字型 放大字型

我帶住一絲絲嘅傷感離開客機,從此不再回頭,以免再次勾起任何對Macy嘅回憶。

可能你地會話我狠心,但要我背住謊言嘅罪惡感去同一個女仔持續相處,對我嚟講太沈重喇,我真係做唔到。所以方法只有一個,就係將我同佢嘅回憶永遠鎖喺依架珍寶客機裡面,再把寶箱嘅鎖匙掉進思憶嘅最深處。

容觀地去睇,我都係一個樂觀主意者,我信一段感情嘅終結代表住另一段感情嘅發生。

今次嘅韓國之旅,我一定要積極媾女,擺脫從前嗰個內弱自卑嘅我!
#14 2017-10-16 00:51:26 縮小字型 放大字型

我用最快嘅速度趕上人群嘅最尖端,目的喺以最短嘅時間過關,盡快踏入韓國嘅領土。

最後我以第一名嘅姿態到達行李輸送帶,而行李只有一個超巨型嘅登山背囊。

一見到佢嘅出現,我就即刻將佢孭上身,跟住就以全速奔跑出關口。

到依一刻你可能會問我,咁心急做咩啫?都到咗啦,差嗰一兩秒洗死呀?

但你唔好唔記得,我未換褲嫁!!!

成大灘血漬黐住喺條白色短褲喥,描繪成一副血染的風采,你以爲我唔覺得柒㗎?我都唔想柒吓柒吓足一世嫁!

然後喺確保無人見到嘅情況下,我衝咗入廁格,換咗條黑色短褲,保證就算痔瘡再度爆血濕撚哂都唔撚驚。

換好衫,戴返副黑超,昂首闊步咁離開廁所,再望一望依個世界,感覺上視野遼闊咗,聽覺敏銳咗,自信心亦同時返哂嚟。

依種就係重生後嘅感覺,暢快。

Girls,你地嘅痔瘡男神又返嚟喇!
#15 2017-10-16 14:37:59 縮小字型 放大字型

一句「隨緣啦」,代表住我將一段緣份交畀命運,而命運卻係一個固執嘅小學雞,你越唔想去靠近一個人,佢就越要將你地拉埋一齊...

-

我依家企喺離境大堂,準備去電訊公司嘅counter喥買一張4G上網卡。

望住長長嘅人龍,真係有啲後悔點解唔一早喺香港買定。不過好彩宜家時間尚早,先至啱啱十一點,安安靜靜排一陣隊都仲可以嘅。

但喺我排緊隊嘅時候,唔想發生嘅事情又再度發生,眼角裡面浮現出一個熟悉嘅身影...

我頂!又係Macy!我唔想再同佢扯上任何關係啊!

於是我即刻搵嘢擋住塊面,等佢唔好發現我,然後再用眼尾留意住佢嘅一舉一動。

Macy嘅行李多到離哂譜,三個喼二個手袋一個背囊再加埋頭先喺香港機場買嗰兩大袋名牌,唔知佢咩料嘅話真係會以為佢搬咗成間房出嚟。

佢論論盡盡咁徘徊喺賣巴士飛嘅counter但又唔去買飛,一臉迷惘成個諗樣咁都唔知佢喺喥諗乜柒?佢又唔係唔識英文,應該無乜嘢好猶豫吖。

但當我再望一望counter入面嘅職員,清一色龜頭泡菜仔,我就明白佢喺喥猶豫緊啲乜喇。

諗深一層,我諗Macy唔止係憎男人咁簡單,佢直頭係有先天性賓周恐懼症,凡有賓周喺佢半徑30米內嘅範圍出現,佢嘅自動防禦機制就會即刻打開,然後開始變得多疑啦,心浮氣躁啦,經期不穩等等,情況就好似一個女人到達咗更年期。而因為依個世界唔係男就係女嘅關係,Macy一日可能會經歷六七十次更年期,真係唔隊返百零二百箱太太口服液都唔撚掂啊。

望住依隻迷途小羔羊,作為一個儲咗廿年好人卡嘅絕世濫好人,又點可能忍得住手唔去幫忙吖...

我慢慢行到Macy身邊,喺不情不願嘅情況底下,再次延續依段不解嘅情緣...
#16 2017-10-17 06:08:51 縮小字型 放大字型

我拍一拍Macy膊頭「喂,你喺喥搞咩啊?」

佢聽到係把男仔,即刻彈開九丈遠,然後掩住心口大叫「強姦啊強姦啊!人嚟啊!強姦啊!」

我即刻掩住佢把死人口「殊..係我啊,Teddy啊」

佢瞪大雙眼,跟住推開我隻手,喘哂氣咁話「喂啊,你嚇死人咩!?」

「Sor啊,我見你好似有啲麻煩,咪過嚟睇吓有啲乜嘢需要幫手囉」

「哦...」佢點一點頭,然後指住個counter話「唉,你睇下,依家得啲賤男人喺喥,我咪廢事過去買飛住囉...」

不出所料,果然係咁。

真係好懷疑佢嘅前半生究竟係點樣過,誇張成咁,我好驚啲讀者以為我喺喥吹緊水啊。

我搖哂頭咁話「Macy小姐啊,依個世界唔係男就係女嫁啦,你咁樣點去旅行啊?」

佢心有不忿「咩喎,人地原本諗住有個friend陪我嚟,可以咩都交哂畀佢,點知最後會得返我自己一個咁慘啫」

唉...見到佢個樣咁可憐,我都唔好意思再講啲咩。客觀地去睇,每個人都有佢嘅弱點,好似我咁,咪一樣係又廢有無用,你總唔能夠咬住人地一點唔放。

「咁你諗住點做啊?」我問。

「等吓囉,等到有女職員返嚟我就會去買飛嫁喇,你放心啦,我估應該唔洗等好耐」

「咁如果依個counter根本係無女職員呢?」

「...」

「你間酒店係邊啊?我幫你買飛啦...」

「真心咩?」

「係啊...仲有你咁多行李,我幫你抽住幾袋先喇」

「嘩,係咪每個TB都好似你咁好人嫁?」

「唔係...係我想答謝你嘅M巾之恩啫...」
#17 2017-10-17 12:41:36 縮小字型 放大字型

買完飛之後我地就離開機場,慢慢行到去出面個巴士站。

巧合地,我同Macy方向一致,住嗰間酒店都係喺東大門附近,所以我地將會搭同一架巴士。

「Teddy呀,其實我想問你好耐,點解你個背囊咁大個嘅?」

本人身高168,個背囊直徑一米五,孭起上嚟差唔多掂到地,確實有點兒大得過份。

「無啊,因為我塞咗個降落傘落去囉」

佢信以為真「吓?真係㗎?」

「講笑咋」

佢輕輕力咁打咗我隻手臂一下

「喂啊,你唔好咁啦,我好易信人嫁」

「睇得出...」

跟住我拎咗部相機出嚟玩,Macy就好好奇咁問我

「咦,你平時有影開相?」

「算係啦...」

「咁你幫我影返張吖」

佢走到去巴士站個牌下面,然後擺哂港女十式咁樣。

我話「吓?巴士站有乜好影啊,不如算啦」

有句說話叫做獻醜不如藏拙,我影相咁廢,又栢金遜又剩,真係無謂衝出嚟柒。

但係佢一再進逼「叫你影就影啦,我要post張相同家人報平安啊」

「唉,好啦,321」

嚓!
#18 2017-10-17 14:06:37 縮小字型 放大字型

影完之後,佢即刻搶咗部相機嚟睇,然後呆撚哂咁望住我

「你玩嘢呀?」

「無啊」

「樣都見唔到喎師兄」

我望一望張相,outflow out到好似打咗鬼影變幻球咁。

「Sor,我影相麻麻...」

「咁你又買部咁靚嘅相機?知唔知醜嫁你?」

「知知地…」

「正一屎波架撐多」

我畀佢鬧到無地自容,但又無得反駁,皆因佢講緊嘅全部都係事實。

「唉,等姐姐教吓你啦」

佢突然從背後捉住我對手

「你應該咁咁咁,然後咁咁咁...」

嘩!

究竟發生緊啲咩事啊?

佢係咪攬住咗我啊?

我咁大個仔都未試過畀女仔攬住嫁,好爽啊,真係好爽啊!!!

「跟住呢,你就應該咁咁咁...」

雖然佢好細心咁指導我應該點樣去取境同捉角度,但依一刻嘅我根本就乜都聽唔到。

「最後再咁咁咁咁咁咁咁咁咁咁咁...」

佢身體嘅溫度,肌膚嘅柔軟度,都一一透過接觸而滲透我嘅全身。

「睇吓,係咪靚好多呢?」

我靈魂出竅,無辦法回答...

「喂,喂,喂!」佢喺我面前揮手。

「係係係」

「傻咗呀?發哂呆咁?」

依個時候,巴士啱啱到站。

「嘩,巴士嚟喇,快啲上車喇」

佢拖住我隻手,全力飛奔上車。

但喺依個咁甜蜜嘅瞬間,我突然感到有點失落。

我喺喥諗,依份欺騙返嚟溫柔,究竟我有無資格去承受呢...?
#19 2017-10-18 06:03:34 縮小字型 放大字型

上到巴士,放好行李之後,我地就搵咗個雙連位坐低。

Macy鍾意坐窗邊位,佢話啲陽光由側邊打落嚟,自拍靚好多喎。

咁ok啦,最緊要佢坐得舒服。

但直到架巴士駛到下個站,有兩個男人上車,坐咗係我地隔離,佢就開始周身唔自在。

「我地不如坐後少少吖」佢話。

「吓?點解啊?」

「唔好問啦...」

然後佢就拉咗我去後面嘅位坐。

跟住隔咗無耐,又有個男人坐咗埋嚟。

佢再次起身「我地調去後面坐好無啊?」

我開始感到有啲煩嫌「又調?唔好喇掛」

佢雙手合十咁去哀求我「求吓你啦,最後一次吖...」

我心軟「唉...好啦」

最後我地坐到去巴士嘅最邊角,差唔多連行李都見唔到。

Macy好大力咁深呼吸咗一口氣,然後話「呼~你聞吓,依喥無哂啲臭男人,啲空氣清新幾多」

我真係無佢咁好氣,都on9嘅。

「其實你咁樣,避得一時都避唔到一世嫁啦,依個世界此終充斥住無數咁多個男人」

「但如果情況許可而我又無去做,我一定會嬲死我自己」

我搖一搖頭「真係唔明你,你咁憎男人,點解又會鍾意bigbang嗰五條矮撚呢?」

「我鍾意佢地嘅音樂姐,都無話鍾意佢地個人。而且我都唔係咁極端嘅,喺音樂面前,我可以暫時放低性別仇恨」

我嘆咗口氣。

既然佢咁樣都可以話自己唔夠極端,我諗我都無嘢好講喇...
#20 2017-10-18 14:39:06 縮小字型 放大字型

「係呢,Teddy呀,你今日個行程係諗住去邊嫁?」

「um...我諗住食完個lunch之後就去樂天世界行吓,你呢?」

然後佢就將佢今日嘅行程話畀我知,但我聽完之後當堂打咗個突。

一句講哂,佢簡直亂鳩咁嚟。

要去嘅地方忽東忽西,一時去吓左,一去時吓右,跟住一個屈尾十又去返左,完全無考慮過節省時間依個問題。

如果跟據佢個行程,我諗去完一個地方之後就應該天黑,根本就乜嘢都玩唔到。

「小姐啊,你嚟之前有無check過啲地方喺邊嫁?亂哂籠嘅」

「洗乜check嫁,嚟到照google map行咪得囉」

跟住佢就拎咗部電話出嚟撳,但撳咗兩嘢之後個面色即刻變哂。

佢神情驚恐咁話「點解上唔到網嫁!?」

「吓?」

「我部電話唔知點解上唔到網啊!死喇今次,我依幾日點生存啊?」

「冷靜啲先,你畀我睇吓」

我拎起佢部電話,一睇就知道佢無換上網卡。

「你有無買到韓國嘅上網卡啊?」

「無喎,乜要買嫁咩?有數據漫遊吖嘛」

「我諗你個plan就唔包喇...」

「吓!?咁點算啊依家,我邊喥都唔洗去啦」


一啲好似佢咁蠢嘅人,我諗都算係瀕臨絕種嘅生物。

但依種女仔住住有股魔力,令人無法放下。


我喺褲袋入面拎咗張後備上網卡出嚟

「你用住我依張先喇,有無帶換卡用嗰支針啊?」

「無...」

「咁我幫你換埋啦」

然後佢眼濕濕咁望住我「你真係好啊,如果唔係你,我諗我仲喺機場喥唔知做緊乜...」

「...」

「多謝你...」

「大家好姊妹,唔洗講呢啲!」


總有一日,你會拆穿我偽善既假面。

到時候,我之前所做嘅一切都會馬上推翻。

餘下的,只有可恥...
#21 2017-10-18 20:56:21 縮小字型 放大字型

巴士慢慢由郊外駛至市區。韓國嘅城市唔算好靚,無香港咁繁華,亦都唔似日本咁有特色,實際啲嚟講更加似一個進化版嘅大陸,不過空氣好少少咁解。

「我下個站就到喇,你真係唔同我一齊玩呀?」佢問。

「唔喇,依個旅行我真係好想自己一個靜一靜」

雖然睇得出佢好唔捨得我,但如果我依家狠心啲,將來就會後患無窮。

「咁好啦,我都唔逼你喇...」

巴士喺Macy間酒店嘅門前停下,意味住我地即將分別。

「我到喇...」

「嗯,你自己小心啲喇」

佢耷低頭,眼泛淚光「我可唔可以攬吓你啊...?」

我笑住咁話「Sure」

然後佢即刻將我緊緊抱住,大聲喊咗出嚟。

「嗚嗚...依個世界無人好似你對我咁好嫁」

我輕輕撫掃住佢背脊

「傻豬嚟嘅,只不過係你未遇到啫...」
#22 2017-10-19 10:08:21 縮小字型 放大字型

Macy擦乾眼淚,重新與我告別「再見喇...」

佢步伐蹣跚咁行去拎行李,動作非常之慢,搞到成車人都好唔耐煩咁望住佢。

其實一睇就知道,Macy係嗰啲平時唔做運動,凈係識飲飲食食,或者匿埋喺間屋到煲劇嘅女仔。見佢拎起袋細細地嘅hand carry都顯得非常吃力。

佢用雙手抽起個袋,然後成個人側埋一面,再拐吓拐吓咁行落車。隨手掉咗個袋落地之後又慢慢行返上車,跟手再
抽起第二袋。

個巴士司機等到有啲鼓燥,開始再三催促。但需知道Macy性格十分自我,完全無理會,繼續保持住自己嘅態度同節奏。

然後終於拎到第一個喼,因為唔夠力抽落車嘅關係,於是佢就喺梯級前面將個行李喼一腳踢落車,呯一聲,個喼落地嗰陣隨即爆開,裡面啲嘢散哂出嚟。

依個時候成車人都睥撚住我,但Macy仲有一個喼喺車,而佢仲係車下面論論盡盡咁執返啲嘢。

唉...睇嚟又要出手。

點解我老母生得個仔咁好人,對住女仔往往都係衰心軟吖。

我忍唔住企起身,好快手咁趕去前面,一手將Macy個喼抽落車,然後再幫佢手執返地上面嗰啲嘢。

巴士當然無等我,喺我落車嗰一刻就馬上開走。

Macy專心一致收拾地上嘅行李,從佢長長嘅瀏海間,我睇到佢臉上展現出甜蜜嘅笑容。


「我都估到你一定會出手幫我」


「唉,鬼叫你咁論盡咩...」
#23 2017-10-19 22:16:20 縮小字型 放大字型

一個炎熱嘅夏季,馬路散發出一陣陣嘅蒸氣。

我望住離我而去嘅巴士,內心只有迷惘。

「架巴士走咗喇,你諗住點算啊?」

我搖頭嘆息「咁都無計啦,唯有搭地鐵返去」

「一係咁啦,你上嚟我間房坐陣先,等我換件衫之後再請你食餐飯吖」

「唔洗客氣喇...」

佢再三懇求「唔好咁啦,你幫咗我咁多,我真係好想報答返你啊」

事情發展到依個地步,所有嘢都好似變得順理成章。

如果我再度推搪,反而顯得更加突兀。

再深入地諗一諗,其實我都無嘢可以輸,假如一個唔小心畀佢發咗me竟然是個boy,最多咪講聲byebye走人囉,反正大家關係尚淺,就算錯失咗都唔算係啲乜嘢大事吖。

「咁好啦,反正我都諗住幫你搬埋啲行李上房」

「好嘢!」

佢開心到拍哂手掌,成個細路女咁。

外冷內熱依句說話,完全喺佢身上呈現出嚟...
#24 2017-10-19 23:54:28 縮小字型 放大字型

喺酒店大堂Check完in之後我地就拎哂啲行李上房。

開門之前佢再三提醒我,一定要側一側身讓咗裡面啲靈體出嚟先,唔係嘅話就會好麻煩。

我搖一搖頭,心諗,女人真係迷信。


「係呢,你咩星座嫁?」佢一路喺個喼喥摷啲衫出嚟一路問。

「處女座...」我坐咗係床邊。

「噢,處女座同白羊座好似唔係好夾,不過我幾鍾意依個組合」佢不斷將啲衫褲鞋襪掉上床。

「星座都好信嘅,無聊到死」

「咩喎,真係好準嫁」

「你覺得準咪準囉,我就覺得好on9喇」

「乜你咁嫁...咦?好嘢!終於搵到喇!」

佢好興奮咁拎起咗件白色吊帶連身短裙「今日咁熱,最啱著依件」

然後佢慢慢企起身,突然就開始寬衣解帶。

「嘩!你做咩啊!?」我畀佢嚇到飛起。

「換衫囉,做咩啊?」佢不以為然,好快就除咗件面衫,上半身完全坦露。

「點解唔入廁所換啊!?」我掩往雙眼,但仍然喺罅隙之間睇到佢嘅身影。

佢一路調整佢個無肩帶前扣胸圍一路話「依喥得我同你,大家都係女仔,怕咩喎」

我嘗試合埋眼睛,但我做唔到,佢白滑嘅軀體深深吸住我。

「你覺得我應唔應該換過第二個bra啊?依個好似唔係好襯件衫...」

佢輕輕解開前扣,

咔一聲,胸圍反開兩邊。


但就喺佢準備將個bra除落嚟嘅時候,我大叫

「啊!!!唔得喇!!!」

佢嚇一嚇「咩事啊!?」

「我好急尿啊啊啊啊啊啊啊!!!」

佢笑住咁話「痴線,咁你咪去屙囉」

我一支箭咁標入廁所,閂埋門,喘哂氣咁望住鏡中嘅自己。

差一啲就鑄成大錯...

如果藉住假扮TB嚟得到任何甜頭,我一定原諒唔到自己,因為依啲簡直就係人渣嘅所為,人人得而誅之。

好彩及時懸崖勒馬,否則就同嗰啲扮gay佬食女嘅仆街無分別。

我唔係聖人,但我好清楚自己條底線喺邊,假如扮TB可以令佢開開心心嘅,我無所謂。但要我搏懵抽水呢,sorry,我做唔到。

搵凍水洗完塊面之後個人冷靜返好多,我不斷提醒自己,要適時抽身,喺感情嚟到之前就要全身而退。

我信,我一定能夠做到...
#25 2017-10-20 16:51:47 縮小字型 放大字型

依家嘅我地正身處喺一間抺茶甜品店。

Macy去咗買嘢食,而我就坐咗喺張枱喥無所事事。

記得對上嗰次同女仔單獨食飯,都要數到中學時期。嗰陣膽粗粗走去同暗戀咗五年嘅女仔表白,點知佢同我講話要畀啲時間佢考慮吓先。

咁嗰時個人仲細,經驗淺,on99以為仲有機會,但其實畀人收咗兵都唔知。拖吓拖吓拖咗成年,其間我不斷付出,又送禮物又整嘢食,以為咁樣就可以打動到佢。但原來一開始就已經定咗輸贏,佢對我根本無任何感覺,只不過係唔識得點去拒絕我咁解。

直到畢業前嘅一個夜晚,我終於約到佢出嚟食飯,但佢就喺個餐飯入面正式拒絕咗我。佢同我講話想專心讀書,出嚟做嘢之前都唔會拍拖。

咁我話「我可以等吖」

但佢話「you deserve better」

嗰餐飯完咗之後,我成晚都坐咗喺個公園喥喊,慨嘆天意弄人,生不逢時。但其實個天根本就無玩我,只不過係我不懂自知,先至會咁執迷不悟。如果嗰時陣識得搵盤水照下塊鏡,諗吓自己嗰柒樣會唔會有女鍾意,我諗我一定慳返好多無謂嘅時間同金錢。

嚟到依家個人長大咗,學識咗做人要有自知之明依個道理,所以近幾年嚟都無再追過任何女仔。可能你會話我懦弱怕事,但其實我只係唔想畀人hurt多一次姐...


「做乜仲唔食啊?」


Macy好興奮咁叫到成枱都係甜品,而我就掛住遊魂。

「食啊食啊,依家就食」

我將一啖抹茶tiramisu擺入口,𡁻咗兩𡁻,應該就好食嘅,可惜我對甜嘢一向麻麻,所以就算幾正都好,我都係唔識欣賞。

「好唔好味啊?」

「ok嘅」

「我就覺得超好食喇」

佢不停咁食,露出一個好幸福嘅表情。

我諗佢真係好鍾意食甜品,如果唔係唔可能蛋榚當lunch食。

「你一陣係咪去樂天世界啊?我都想一齊去啊」佢話。

「你唔係話想去小王子村咩?」

「咁你話嗰喥遠,聽日去好啲嘛」

「哦...ok囉咁...」

「做咩姐,你好唔想同我一齊玩咩?」

「咁又唔係...」

「咁就得啦!」

佢突然企起身,跟住拖起我隻手「宜家即刻出發!」

「吓?咁急?啲嘢唔食嗱?」

「傻豬嚟嘅,我食哂喇,快啲行啦」


陳美詩,天真、可愛、蠢。

佢仇恨男人,但最愛食甜品...
#26 2017-10-21 00:55:32 縮小字型 放大字型

樂天世界係一個韓國嘅主題公園,類似香港迪士尼,但相對上就細好多。想去嘅原因係因為我個friend Mathew話我知裡面有個show好好睇,啲吉祥物會玩哂人形蜈蚣疊羅漢,中間仲會不時穿插滴蠟噴火心口碎大石,真係聽到都覺得過癮。

一入到場,Macy就好興奮咁拉住我走嚟走去,一時影吓相,一時又玩吓機動遊戲。

玩碰碰車嗰陣,佢就突然拓海上身,百幾公里攔腰撞埋嚟,搞到我差啲連個肺都嘔埋出嚟。

但望住佢天真爛漫嘅表情,少咁一兩個肺又算得係啲咩吖...


「我地跟住玩啲咩啊?」


玩完一輪機動遊戲之後我地就去咗小賣部買嘢食。

「um…睇show?我個friend好似話幾好睇」我將一舊韓式炒年糕擺入口。

「好喎,咁我地快啲行喇」

「吓?我未食完喎」

「一陣出去請你食朱古力火鍋啦」

「屌呀?又甜嘢!?」

佢無理到我,然後就將我夾硬拉走。


去到睇show現場,見到一隻二隻吉祥物喺度on99咁跳嚟跳去,我就知道我又畀人昆撚咗,乜撚嘢滴蠟噴火長隆式馬戲團,原來全部都係呃人嘅。

我真係好想大聲嗌回水,可惜又無得上一頁出返去。

「啲吉祥物好cute啊!」Macy睇得相當投入。

「唔乸喺掛?我以為喺西洋菜街睇緊啲阿嬋跳舞喎」

「你唔好咁衰啦,人地笠住個頭套好辛苦嫁」

「我畀幾舊水入嚟睇佢扭屎忽花仲辛苦啊!」


睇完個show之後我興個火屎,買咗兩支可樂起勢咁隊。

「TeddyTeddy,我見到前面有個攤位遊戲贏咗可以換隻成個人咁高嘅吉祥物公仔啊,快啲過去睇吓咯」

因此,我地行到去兒童王國,喺個射擊攤位前面停落嚟。

「係依到喇,我要贏個大奬!」

點知佢玩咗十幾廿萬won都仲係乜都拎唔到,其間仲要係咁向人投訴「你個嘢壞咗啊」

見佢咁失禮人,真係睇到都覺得尷尬。

「等我嚟啦」我忍唔住出手。

「你得唔得嫁?」

我陰陰嘴笑咗一笑。

然後再拎起槍管,𣈴準,Shoot!

呯!呯!呯!呯!呯!

五發全中,終極大獎,Get!

「嘩!你好犀利啊!」

「哈哈哈,乜你唔知我有個綽號叫葵青遊戲王咩?」

「真係㗎?點解嘅?」

我用一副不屑嘅眼神嚟望佢。

「屌你老味,街頭魔法王咩!」
#27 2017-10-23 21:50:03 縮小字型 放大字型

想喺喥同大家重申一次,遊戲王依個雅號絕對唔係浪得虛名。

由細到大,我做乜嘢都廢,讀書廢、運動廢、做嘢廢,就連打機都廢過人。有時喺喥諗,不如我唔好叫Teddy,索性叫條廢柴算喇。如果要搵個同我最相似嘅人嚟做例子,應該就只有叮噹入面嘅大雄最貼切。

但無論一個幾廢嘅人都好,都總有一兩樣潛能,而我嘅潛能就係玩攤位遊戲。雖然好明顯我嘅潛能就係無能,不過依樣確實係我唯一搵到自己價值嘅地方。

記得中二嗰年,我名符其實廢到無朋友,真係連一個朋友都無。每次放學,所有男男女女都結伴而行,男嘅就一齊打機打波,女嘅就去商場食玩買,唯獨我孤零零一個四圍蕩。

有次返到屋企,老母問我「放學同同學去咗邊喥玩?」

我就吹水FF話同成班friend去咗唱K。

老母聽到之後感動到喊咗出嚟,一路擦住眼一路話「嗚嗚...仔,你捱咗十幾年,終於識到朋友,我真係老懷安慰喇...」但其實我只係一條毒撚鳩fingfing咁fing咗去冒險樂園喥掟彩虹。

嗰陣時每日放學都會去掟,一掟就幾粒鐘,掟吓掟吓,掟到成個攤位嘅禮物都畀我贏哂。之後我就去玩其他遊戲,又玩吓玩吓,玩到成間冒險樂園嘅獎品都畀我攞哂。

自此之後,全香港嘅冒險樂園都將我徹底black list,勒令我五十年之內都不准再踏入冒險樂園半步。我拎住十五個裝滿獎品嘅紅白藍膠袋企喺商場門口,明白到依個世上經已無遊戲可以再難到我。

最後我租咗三架客貨van,將所有贏返嚟嘅獎品都捐哂畀保良局。佢地為咗表揚我嘅善德,就將我個名例入佢地嘅歴史名冊。

嗰陣係我人生中最光輝嘅一刻,而我嘅遊戲生涯亦喺當時寫上句號。但估唔到7年後嘅今日,遊戲王居然會喺韓國再度重生!
#28 2017-10-23 22:38:19 縮小字型 放大字型

「Gaming King!Gaming King!Gaming King!」

依家我企喺掟豆袋攤位,只要再打中一個鐵罐就會得到終極大獎。而全個樂天世界嘅入場者都畀我吸引過嚟,為我歡呼喝采。

「Teddy加油啊!仲差一個咋」

Macy好緊張,因為獎品係佢最鍾意嘅minion公仔,而且足足有7尺咁高。

「放心,一定會中」

依個時候,成個樂園嘅保安都已經過哂嚟,表面上佢地係嚟維持秩,但事實上佢地真正嘅任務係嚟𥄫住我,睇我有無出老千,如果一有破綻就會即刻制服我,跟住吊銷我所有贏返嚟嘅獎品。

我望住依班無知嘅保安,恥笑佢地嘅天真。

十二個攤位遊戲,十二個終極大奬,全部都係人咁高嘅巨型公仔。

我自信滿滿咁拎起豆袋,望住Macy笑咗一笑「準備收禮物啦」

呯!

豆袋以完美嘅軌跡擊中鐵罐,7尺minions,Get!

「Yeah!」

Macy飛撲過嚟攬住我,感動到喊咗出嚟。

「嗚嗚...我終於得到個好似姚明咁高嘅minions喇...我要同佢結婚」

「傻西嚟嫁你」我話。

佢抬起頭,用水汪汪嘅雙眼望住我。

「你會嚟飲嫁可...?」

我摸一摸佢個頭「梗係會啦,話哂我都算係半個媒人喎」

佢突然𡃶咗我塊臉豬登一啖「多謝你啊」

我摸住被𡃶嘅臉頰,臉紅耳赤,心跳加速。

「嘩,咁多公仔點搬返酒店啊,等我拎去送畀啲小朋友先」

然後佢就推住架載獎品嘅手推車,將啲公仔逐一派發。

所有小朋友都即刻衝哂過去圍住佢,佢就笑住咁叫佢地一個一個慢慢嚟。


依一刻,我覺得佢係一個天使,身上散發出一陣陣嘅光芒。

我真係好唔爭氣,我好唔爭氣咁愛上咗佢...
#29 2017-10-24 22:27:14 縮小字型 放大字型

最後Macy將所有公仔全數派發,只係淨返佢鍾意嘅minion公仔。

「啲小朋友真係好得意啊」佢從人群中返到嚟,笑住咁話。

「吓?係咩?明明成班小魔怪,無啲家教,一味靠搶」

「唔係吖,我覺得佢地都幾守規矩」

「咁都叫守規矩?望住班生番我仲以為有喪屍,所以要搶物資」

佢冷笑咗一聲,然後望一望天。

「天黑喇,我地走咯」

「嗯...」
#30 2017-10-24 22:27:46 縮小字型 放大字型

折返途中,穿過繁華嘅鬧市,我同Macy一人一個膊頭,一左一右咁將隻minion公仔孭返去,非常注目。

「係呢,你覺得我地一陣搭地鐵嗰陣洗唔洗幫隻公仔買多張飛啊?」

「我諗唔洗喇掛...」可能因為多咗一份愛慕之心,對住佢我開始變得有啲尷尬。

「咁好啦,但如果有人問起,我一定會話畀佢知阿Bob(隻minion)係我男朋友」

「你鍾意啦...」

點知上到地鐵,真係有個阿嬋走埋嚟摸隻公仔。

Macy即刻好激動咁話「Hey!Don’t touch my boyfriend!」

個阿嬋畀佢嚇咗一嚇,細細聲講咗句「this girl is crazy…」跟住就行開咗。

講真,佢真係痴痴地嫁...
#31 2017-10-24 22:28:14 縮小字型 放大字型

返到Macy間酒店附近,我地隨便搵咗間餐廳食晚飯。

食完之後,我就送到佢返酒店門口。

佢攬住隻公仔,依依不捨咁望住我,依個柔弱嘅表情,足以將我徹底融化。

「聽日...你會陪我去小王子村嫁可?」

嚟到依個地步,我已經無辦法再放低佢。

「會啊,你想去邊我都會陪你去...」

「真係㗎?點解嘅?」

聽到依句咁煩厭嘅說話,乜嘢心情都畀佢搞亂哂。

「係啊係啊,唔好煩喇,快啲返上去訓覺啦」

「知喇,做乜無啦啦咁燥底啫」

「無嘢啊,走啦走啦,如果你聽日遲到我唔會等你嫁」

「車,好叻咩,byebye你條尾」


佢轉身離開嗰陣,我會心微笑。

依種小打小鬧,令我感受到一陣甜蜜嘅幸福。

我唔會天真妄想到認為自己可以佔有佢,但喺有限時間內,我希望一直留守喺佢身邊,盡我所能咁去照顧佢,守護佢,做隻堅毅不屈嘅侍衛兵...
#32 2017-10-25 21:45:15 縮小字型 放大字型

小王子村,亦即係小法國,位於南怡島附近,由東大門出發大概需要兩個鐘頭車程。

我約咗Macy朝早八點喺佢間酒店嘅大堂等,但係我六點半就已經起咗身,食完個早餐都仲有大把時間。

於是我就喺酒店附近嘅範圍行吓,欣賞吓韓國朝早景色,順便幫Macy買份早餐。

行到七點三左右,就搭咗一個站地鐵去到Macy間酒店,坐喺個大堂喥等佢落嚟。

但等咗好耐,依然係杳無聲氣,佢whatsapp個last seen仲係琴晚嘅12點半。

我開始覺得有啲唔對路,所以嗱嗱臨撥咗個輪畀佢。

「喂.....?」

聽得出佢仲訓緊。

「你訓醒未啊?我book咗班ITX(火車)10點半嫁,你再唔落嚟就遲到喇」

「哦...」

「快啦!」

「...10分鐘...」

噗!cut咗線。

跟住我每隔十分鐘就打一次電話催佢,但佢每次都係叫我等多十分鐘。

最後搞到9點半先至斯斯然落到嚟,足足遲咗成個半鐘。

「小姐啊,依家幾點啊?」

佢一路搽handcream一路話「女仔係要花時間打扮吓嫁啦,點同你地啲TB求其笠件T就行得啫」

「你早啲起身唔得嘅?」

「唉,匆匆忙忙咁去旅行又有乜意思啫,我地無必要辛苦過平時返工返學吖」

「唔係話有無意思啊,係你尋晚話八點半ok我先book十點半車飛嫁,如果你係唔得嘅我就唔撚book咁早啦!」

我嘅語氣有啲重,嚇到佢lag一lag機。

「你咁大聲講嘢做乜啫!咁我真係起唔到身吖嘛!你估我想㗎?你又唔早啲打嚟叫醒我?你早啲叫醒我咪無事囉!所以係你唔啱!你唔啱!你唔啱啊!!!」佢嬲到撓埋雙手擰轉身。

唉,我真係無哂辦法,佢個人就係咁蠻不講理。

眼見再拗落都只會沒完沒了,唯有認個低威,快快手解決件事。

「係喇係喇,我錯哂得未啊?」

佢依然係鼓埋泡腮

「我唔覺得你係真心喎」

我繼續做衰仔,向佢90度鞠躬

「對唔住,係我唔啱,請你原諒我」

佢終於擰返轉身

「算你啦,下次唔好喇」

見佢笑返,我都鬆咗口氣

「我可唔可以問個問題?」

「你依個咪問題囉!」

「對唔住」

「講啦」

我輕輕咳咗兩聲

「敢問一聲,尊貴嘅Macy小姐,究竟我地行得未呢?」

佢笑住咁撓起我隻手

「行得喇,衰人」

我搖頭嘆息

「唉...」


從此以後,任性兩字,就將會成為Macy嘅代名詞...
#33 2017-10-25 23:50:48 縮小字型 放大字型

前往南怡島嘅途上,我地心情愉快。

耀目嘅陽光加上暖和嘅天氣,絕對係出門遠行嘅好日子。

走過繁忙嘅大馬路,進入充滿途人嘅地鐵站,Macy笑住咁話

「覺唔覺望住人地返工返學,而自己就準備去玩,個感覺好爽啊?」

「過兩日我地咪同佢地一樣...」

佢突然猛抓頭髮「啊啊啊!唔好題啊啊啊!好不安啊啊啊!」

我一頭霧水「象仔(思覺象)...?」

佢停咗落嚟,望一望我,然後噗一聲笑咗出嚟

「哈哈哈,你點知我扮緊佢嫁?」

「我得閒都會上吓連登嘅...」

「哈哈哈」

估唔到佢都有咁古靈精怪嘅一面,

係就係on9咗啲,又唔太好笑,

但睇落,又真係幾可愛嘅...
#34 2017-10-26 18:00:24 縮小字型 放大字型

經過半個鐘左右嘅車程,終於到達咗轉乘ITX嘅中轉站。

一路上,我同Macy有講有笑,一時傾吓影相,一時傾吓學業,好似將今朝鬧交嘅事情忘記得一乾二淨。

但原來依段風平浪靜嘅短暫時光,只不過係暴風雨嘅前夕。

「我好肚餓啊」由地鐵站行過去轉火車嘅途中,Macy突然開口話。

「估到你啦,所以我一早買咗早餐畀你食喇」我喺背囊入面拎咗盒韓式飯卷畀佢。

佢望咗一望,露出不悅嘅表情「我唔食依個啊,都唔好味嘅」

我有少少失落,原本諗住佢會好開心啦,點知佢一啲都唔領情。不過好彩,我擁有多年做兵嘅經驗,習慣畀女神冷待,心理質素尚算強悍。

「咁你想食咩啊?」

佢諗咗一陣,然後話「um…不如我地返去食尋日嗰間抹茶甜品店吖,我好掛住個抺茶tiramisu啊」

嘩屌!咁大逆不道嘅說話佢都講得出嘅!?

我真係嬲「你係咪玩嘢啊?我地趕緊時間嫁,依家先嚟返轉頭?仲洗撚去南怡島咩!」

「但我真係好肚餓啊,我地晏啲再去都得嫁啫...」

「無啊無啊,無得傾啊,快啲行喇」

我夾硬拉住佢隻手向前行,但佢死都唔肯喐,仲要踎埋起地下

「我成朝都無食過嘢!無力行啊!」

我搖頭嘆息,表示無能為力。

對住一個咁任性嘅女仔,你同佢撐得越行,佢就只會企得越硬。

「唉...咁你依家想點啊?」

佢諗都唔洗諗「我想食蛋糕」

我望一望錶,大概仲有半個鐘頭時間。如果同佢一齊返去嘅話,就一定趕唔切。所以最折衷嘅辦法就係我一個人趕返去買,跟住帶返嚟畀佢食。

「一係咁啦,我依家返去買,你就坐係喥等我啦」

佢隨即笑逐顏開「真心咩?」

「係啊,你唔好走開啊」

佢向我敬一敬禮「知道」


大家係咪好佩服我呢?

依啲就係做兵嘅奴性,你地班凡夫俗子係唔會明嫁喇...
#35 2017-10-26 21:11:51 縮小字型 放大字型

我以最快嘅速度由地鐵站跑上地面,截咗架的士之後就即刻畀咗幾萬won個司機,吩咐佢盡量開快啲。

大概用咗三個字時間就去到間甜品店門口,我叫個司機等一陣,然後就即刻衝入間鋪頭,買咗兩件抺茶tiramisu,跟住又即刻衝返上的士。

整個過程半個鐘都唔洗,我都不禁佩服咗一吓自己嘅效率。

我滿頭大汗,喘哂氣咁將盒蛋糕遞畀Macy

「嗄嗄...拎住啦」

「嘩,你咁快買到返嚟嘅」

「快啲食啦,無時間喇...」

佢好開心咁打開盒蛋糕,但食咗一啖之後就即刻黑撚哂面,仲放低埋隻叉。

「做咩唔食啊?」我疑惑。

佢搵隻叉撩吓撩吓「溶哂嘅...」

我望一望件蛋糕,雖然側邊溶咗少少,但其他部分都仲好完整。

「溶得嗰少少,將就吓食埋佢啦,唔係你一陣又嗌肚餓喇」

「暖嫁,點食啊?」

「出面天氣咁熱,我有乜計啫」

「我都話咗同你一齊返去食嫁啦!你又唔聽我講!」

「喂!小姐啊,班火車唔等人嫁,你係咪要為咗件蛋糕而嘥咗兩張車飛啊!?」

「我...」佢想反駁,但搵唔理由,谷到成塊面都紅哂。

「無嘢好講啦嘛」我話。

佢好嬲咁睥實我,然後突然大發脾氣。

「總之我就唔食啦!!!」佢大力將盒蛋糕揼落垃圾桶。

呯!

我目定口呆咁望住佢。

今次真係忍唔住喇,我身水身汗咁趕去買嘢返嚟畀佢食,佢居然咁樣糟蹋我嘅好意?

「屌!你痴撚線㗎!!!?」我大聲爆鳩佢seed。

「係啊,咁又點啊?」

「唔好煩喇,各有各玩啦!」

「好啊,我都唔想見到你,走啦」

「屌!」

我一腳踢落個垃圾桶喥洩憤,然後嬲爆爆咁轉身走人。


真係頂佢唔順喇,

今日起,我要同佢一刀兩斷!
#36 2017-10-28 01:10:02 縮小字型 放大字型

轉身離開後,我頭也不回,不斷向著火車站嘅方向走。

我真係好無用,成世人都未試過發咁大脾氣,搞到依家全身震哂。

但究竟因乜事要咁嬲呢?

Macy嘅性格一向都係咁,又唔係啱啱先知。

既然一早知道佢個人係咁任性,咁又點解要為著佢嘅任性而執著呢?

唔通可以要求佢喺一兩日之內完全改變佢嘅性格?

咁當然係無可能嫁啦,所以仲可以怨啲乜呢?

正如去明將食壽司,你明知道舊紅豆軍艦係伏嚟嫁喇,但你死都要夾嚟食,食完仲要發哂脾氣咁話難食,然後又要投訴又話剩,你覺得咁樣合理咩?你班friend都肯定指住你個頭話你on9啦。

代入返去依家個處境,我明知道Macy係港女性格公主癌、三尖八角難相處,但偏偏硬係要衝個頭埋去服侍佢,甚至鍾意埋佢。

之後人地做返啲合乎自己性格嘅行為,而且又無貨不對版,但我竟然嬲鳩佢話佢太過完美地飾演自己?係咪好唔合理先?人地本身就係咁嫁啦!

諗吓諗吓,突然覺得好撚後悔,點解頭先要咁意氣用事呢?

唉...唔通我真係要返轉頭氹返佢?
#37 2017-10-28 02:29:53 縮小字型 放大字型

對唔住,依一刻我做唔到。

我暫時無辦法放低我嘅面子。

可能你會問:尊嚴依樣嘢,你明明由出世嗰刻就已經放低咗,但點解偏偏喺Macy面前就咁顧面子呢?

答案好簡單。

喺我嘅人生入面,我一直擔當住一個負累嘅角色,因為太廢太無用,乜都做唔到,所以只能放下面子,慣性地去依賴別人。

但嚟到韓國,遇到Macy,我嘅角色定位徹底轉變,由負累變成carry,帶住佢周圍去,幫佢做好多,令我覺得自己不再一樣。

然後嗰份打飛機式嘅自尊就開始慢慢膨脹,喺Macy面前,我就係強者,所以為咗保全顏面,死都唔肯認低威。

我同自己講,我一定唔會返轉頭,今次無論點都唔可以認衰仔。


然後一直行一直行,終於嚟到乘搭ITX嘅月台。

等車其間,無事可做。

我拎咗部電話出嚟撳咗兩嘢,但覺得好無聊,跟住又拎部相機出嚟睇咗兩嘢,都一樣係咁無聊。

剎那間,我感到非常孤獨。

原來一個人去旅行係咁悶嫁,之前明明都唔覺。

自從有咗Macy嘅陪伴,旅程確實開心咗好多。

到依家突然淨返自己一個,周圍變得寂靜無聲,我開始有啲唔習慣。

But古語有云,本是無一物,何處惹塵埃?


我無聊地擔天望地,祈求著火車快點到來。

但就喺依個時候,我竟然喺月台幕門嘅倒影裡面發現到有個人喺垃圾桶後面閃閃縮縮咁窺探緊我。

而依個人,除咗係Macy之外,仲可以係邊個吖...

我會心微笑。

原來佢一直喺背後偷偷跟住我。

好!就睇吓你搞乜花臣

依個跟蹤遊戲,我接受!
#38 2017-10-29 22:57:12 縮小字型 放大字型

數分鐘後 火車到來

我扮作若無其事咁行上車 揀咗一個比較當眼嘅位置坐低

Macy見我坐好後 就急急腳咁走上車 然後坐咗喺一個同我相隔兩行左右嘅位置上

我戴上耳機 假裝聽音樂

實際上 係透過電話反射嚟觀察佢嘅一舉一動

佢用手袋擋住塊面 不時又伸個頭出嚟望吓我 但又怕我發現 跟住就斯斯縮縮咁收返個頭入去 真係睇落都覺得好笑

隔咗無耐 列車開出

可能係旅遊淡季嘅關係 車內空空如也 全個車卡只有我同Macy再加兩對家庭

我見有啲肚餓 於是拎咗今朝買嗰盒韓式飯卷出嚟食

無意間 又留意到Macy嘅視線

佢成朝無食過嘢 望住我盒飯卷露出一副垂涎欲滴嘅表情

哈 但今次唔會再可憐你嫁喇 即管等你餓一陣 當係一個小小嘅懲罰 鬼叫你頭先唔領我情呀


跟住一路上都係風平浪靜 個半鐘頭嘅車程話長唔長 話短唔短

臨到站前 我再用電話螢幕窺探一吓Macy嘅動靜

意想不到嘅係 佢居然訓著咗覺 仲要係熟睡嗰隻

真係有無搞錯!?

邊有人好似佢咁 跟蹤人都可以訓著覺嫁


眼見火車即將到站 Macy依然係無任何甦醒嘅預兆

我諗如果無人叫醒佢 佢真係訓到火車回程都未起身

喺無計可施嘅情況下 我唯有慢慢行到佢身邊 細細聲喺佢耳邊講一句 起身喇 再輕輕力拍一拍佢膊頭 然後見佢準備甦醒之際 即刻悄悄地離開車廂

佢迷迷糊糊咁張開眼睛 擦一擦嘴角上嘅口水 稍為清醒過後 隨即露出驚慌失惜嘅神色 佢焦急地左顧右盼 但依然尋找唔到我嘅身影

就喺依個時候 我不經意咁喺佢車窗旁邊出現 扮作啱啱落車 向住電梯嘅方向走

Macy猶如重見希望 拎起個手袋就即刻衝落車


唉 真係想send個message畀佢叫佢跟得認真少少

有乜理由畀人跟嗰個反而仲辛苦跟人嗰個吖

我苦惱地搖一搖頭

到底依個咁廢神嘅遊戲 仲要玩幾耐啊...?
#39 2017-10-30 04:13:25 縮小字型 放大字型

嚟到充滿歐陸風情嘅小法國村 人流開始變多

為免喺人群中走失 我顧意放慢腳步 令Macy可以易啲跟蹤

我又不時拎出電話自拍 藉此嚟確認佢嘅位置

喺前置鏡頭入面 經常影到Macy慌慌張張嘅表情

原來喺佢漂亮嘅外表底下 都會有花容失色嘅一面

如果遲啲同佢好返嘅話 我一定會畀返啲相佢睇 到時佢肯定會嬲到核爆 然後即刻del撚哂啲相佢


慢慢地 我地行到去一個小型噴水池嘅旁邊

一直顧住留意Macy嘅舉動 都忘記咗旅行本身嘅意義

我拎出相機 藉住鏡頭嚟觀賞四處嘅風景

一棟一棟五顏六色嘅小木屋

屋與屋之間不時穿插住小王子書中出現過嘅人物同畫面

睇得出設計師非常用心咁去將唔同嘅主題溶合埋一齊

但老實講 我唔識欣賞

講真 依啲咁嘅呃錢旅遊景點 留畀啲港女打卡就話啱啫 我堂堂一個高大威猛(168)氣宇軒昂嘅男子漢 又點會對依啲gay佬嘢產生興趣吖 如果唔係Macy話想嚟 我真係一定唔會嚟

求求其其影咗幾張相之後 我再次找尋Macy嘅身影

佢企咗喺一個小王子公仔側邊 似係想影相 但又驚我無啦啦走開 所以遲遲唔敢行動

見佢咁辛苦 兩面不是人 我就搵咗張長櫈坐低 再拎部電話出嚟扮打機 等佢覺得我一時三刻走唔開 可以好放心咁去影相

睇吓 依啲咪叫用心良苦囉...
#40 2017-10-30 05:00:01 縮小字型 放大字型

佢同個小王子公仔自拍咗幾張之後都好似唔太滿意 感覺上係想搵人幫佢影張全身照 但又猶豫不決 又怕怕羞羞唔敢開口

雖然我好想幫忙 但依個又唔係現身露面嘅好時機

於是我見咁啱有個師奶坐喺隔離 就塞咗張一千won畀佢 問佢可唔可以幫前面嗰位姑娘影張相

師奶爽快地答應 仲要拒絕接收賄款 霎時令我覺得人間有愛

得到幫忙後 Macy好有禮貌咁答謝點頭

望住佢依個咁恭恭敬敬嘅樣子 真係好難聯想到佢發起爛渣上嚟係幾咁蠻不講理 不過人係有好多面嘅 就算你喺唔同人面前有唔同嘅樣子 都唔代表你係戴住假面具去做人 你只係根據不同嘅處境 飾演不同嘅角色 歸根究底 每一個都係你


環繞住小法國村行咗一個圈之後 就準備搭船過去對岸嘅南怡島

Macy一直緊緊跟隨喺相距十米左右嘅後方 睇嚟已經完全適應咗我嘅步伐

記得有一個寵物訓練員曾經同我講過 如果你想將一隻狗訓練到聽聽話話 最直接嘅方法係要隻狗不斷跟住喺你背後行 當佢想超過你嘅時候就要即刻拉住 唔畀佢有任何帶頭嘅機會 直到一個地步 隻狗就會認清你係主人 開始對你言聽計從

所以可能經過依次之後 Macy就畀我調教成一隻聽聽話話嘅寵物 反射性地服從我所有指令 哈哈哈 咁到時我咪可以為所慾為

Ok stop!FF到此為止


登上小渡輪 我即刻行到船頭外面睇風景

Macy就揀咗一個接近船尾嘅位置坐低

然後號角一響 渡輪馬上啟動

喺風平浪靜嘅海面上 船身比想像中搖晃

我用眼角監察咗一吓Macy嘅身影

佢表情甚苦 伏咗喺大脾上面喐都唔喐 好明顯 佢係暈船浪啦

好彩我尋日知道要搭船 一早配備咗暈浪丸 我拍一拍隔離個小朋友 畀咗粒出奇蛋佢 再叫佢幫我拎盒暈浪丸畀Macy

佢笑住咁點頭 輕輕鬆鬆完成任務

Macy接過暈浪丸 先先有啲驚訝 跟住周圍望嚟望嚟去 似係想尋找嗰個匿名嘅有心人

我繼續若無其事咁影相扮無嘢 唔畀佢發現任何蛛絲馬跡


因為我決定咗

喺我地未能和好如初之前 我會一直擔當你嘅sercet angle

藏身喺你察覺唔到嘅地方 默默做你背後嘅陽光
#41 2017-10-30 21:01:45 縮小字型 放大字型

渡輪安然無恙抵達南怡島。

落船後,我沿住岸邊影相,依喥風景怡人,海天一色。

鏡頭內,不時出現Macy漂亮嘅剪影。

今日佢著上咗一件淺藍色碎花長裙,頭上戴住一頂卡其色草帽。

佢默默跟喺我背後,靜靜沿住海邊遊走。

微風輕輕吹過,佢伸手按住草帽,散亂嘅瀏海為佢帶出一份不經意嘅自然美。

我偷偷按下快門,諗住遲啲帶返屋企慢慢J。


影完相之後,我就喺石灘附近稍作休息。

其實過咗咁耐,我對Macy嘅怒火都經已完全熄滅。

Macy亦無再刻意隱藏自己,就好似一早知道我發現咗佢一樣。

依家嘅情況,明顯地雙方都已經諗通咗。

相信只係差一個機會,我地就會和好如初。

記得阿媽教落,做男人,最緊要大方。

無謂為咗一啖氣,而破壞咗依段咁美好嘅關係吖。

於是我鼓氣勇氣,轉身回頭,慢慢走近Macy嘅身邊...
#42 2017-10-30 22:07:18 縮小字型 放大字型

Macy坐咗喺石灘旁邊嘅一張長椅上面。

我慢慢行到佢嘅身前,低住頭,不敢作聲。

佢望住我,兩眼通紅,身體微微發抖。

「對唔住啊,我唔應該發咁大脾氣...」我道歉。

佢無出聲,啲眼淚谷吓谷吓。

「原諒我啦 好無啊?」

佢終於忍唔住,大大聲咁喊咗出嚟「嗚哇哇哇哇...正一衰人嚟嫁你!」

我有啲不知所惜「你做乜無啦啦喊啊?」

佢瘋狂抽打我對手臂「嗚哇嗚哇嗚哇...我以為你真係唔再理我喇」

我捉住佢對手「係喇係喇,唔好再喊啦」

「如果連你都唔要我嘅話,我就真係得返自己一個喇」

「知道喇,我應承你,以後都唔會再揼低你啦」

佢突然企起身,緊緊攬實我。

「嗚嗚...係至好講啊...」

我嘗試平伏佢嘅淚水,輕輕撫摸住佢後額。

「總之,以後有Macy嘅地方,就會有Teddy啦...」
#43 2017-10-31 00:52:13 縮小字型 放大字型

嚎哭過後,Macy變得比之前更加開朗活潑。

佢拖住我四圍走,不斷穿插於漂亮嘅神木林間。

我抬頭望住樹上一片片秀麗嘅紅葉,嗰種大自然美境,唔講真係以為自己拍緊MV。

「Teddy,依邊啊,快啲幫我影相啦」

Macy企咗喺一棵紅葉樹旁邊,雙手拎住兩塊A4咁大嘅紅葉揮嚟揮去。

「係嘅係嘅,123,笑」

但喺我按下快門前嘅一剎,佢突然改變pose,古靈精怪咁用兩塊紅葉遮住雙眼,並輕輕咬住舌頭。

「搞咩啊?頭先咪幾靚」我話。

「哈哈,你唔覺咁樣cute啲咩?」

我睇返張相,佢表情趣怪,嗰條小小嘅舌頭加上一個甜美嘅笑容,望真啲,又真係幾趣緻嘅。

「我不如地去玩rail bike咯」佢話。

「吓?唔好啦,好攰嫁喎」

佢笑住咁拖起我隻手

「唔怕喎,我地一齊踩吖嘛,行啦」

見到佢再次重拾笑容,我嘅內心就好似畀一份溫柔嘅暖意所包圍。


究竟我,係咪真係可以適時抽身呢...?
#44 2017-10-31 19:43:40 縮小字型 放大字型

Rail bike係南怡島內其中一項熱門設施,玩法係一架雙人單車,放喺一條環形路軌上面,畀旅客一邊踩一邊觀賞島上面嘅景色。

「Macy小姐,你畀吓力踩得唔得?」

大概踩到一半路段Macy就已經開始收慢腳步,去到依家直頭放棄生命踩都唔踩。

「咁我攰吖嘛,係咪休息一陣都唔得先?」

我搖一搖頭。

睇個勢,嚟緊都係要一個人踩返終點。


跟住係一段短暫嘅沈默。

Macy低住頭,默不作聲,心裡面好似埋藏住各種心事。

「Sorry啊...」嚟到兩棵紅葉樹之間,Macy突然開口話。

我滿頭大汗「唔洗Sorry嘅,你依家幫手踩返就得啦」

佢㗩咗一聲「我都唔係講緊依樣嘢!」

我望一望佢「咁你想講咩啊?」

佢聲音變小,顯得有啲尷尬「今朝啊...」

「哦,都過咗去啦,獎門人都話咗打和咯」

「喂啊,唔好講笑啦,我認真嫁,唔同你正正經經道返歉,我個心唔舒服啊」

「好啦,我接受你嘅道歉」

「聽我講先啦,係我咁任性,先會激到你發咁大脾氣...」

「咁依家都無事啦」

「唉,我成日因為你嘅外表而唔記得咗你都係女仔嚟,所以就算你有啲小姐脾氣都係正常嘅,仲有你依幾日嚟M,個人係會暴躁啲嫁喇」

「...」佢唔題一題,我都唔記得自己依幾日嚟緊M。

「不過如果你係男仔嘅話,我就一定唔會睬返你」

「哈哈,係咩」我有啲心虛。

「做男仔做到咁小器嘅話,不如死咗佢算」

我心諗,點解佢咁憎男人呢?我真係好想知道固中原因。

「其實究竟男人有咩得罪你啊?點解你要講到佢地咁十惡不赦呢?」我問。

「你想知?」

我點頭。

佢深呼吸咗一口氣「因為一個ex,佢令我對男仔嘅印象完全改觀」

「你個ex有無J?」

「有啊,乜我個樣似les咩?」

「似似地,between佢對你做過啲咩啊?」

佢抬頭望住天空,若有所思「今日咁開心,我唔想題嗰個人」

我尊重佢嘅決定,所以就無再追問落去 。

但我相信依個迷團,終會喺依趟旅程之內解開...
#45 2017-11-01 05:02:05 縮小字型 放大字型

一日嘅行程終於結束,送完Macy返酒店之後,我就返到自己間酒店休息。

澡完個涼,我攤咗喺張床上面,回想一吓依兩日所發生嘅事情。

我發現,我真係好鍾意Macy,甚至去到一個不能自拔嘅地步。

我明白依個係一個錯誤嘅決定,因為依段關係入面充滿住謊言。

但我真係無辦法控制到自己嘅感受。

可能你會話,佢有好多缺點,既任性又難相處。

但喺我眼中,佢係與別不同嫁。

時下啲港女,好識得包裝自己,最令我討厭嗰隻,係成日話自己男仔頭性格,扮撚唒真性情,成日走去同啲仔仔稱兄道弟,但實質上就喺度收緊兵,明明鍾意畀仔圍又唔撚認。

依隻女仔就算畀你媾到,佢都肯定好快比帽你戴,相信唔少人都奶過嘢。你以為佢真性情咩?Sorry,佢只係扮出嚟,相處落,仲港女過杜如風。

而Macy就完全唔同喇,佢有咩唔開心、有咩唔滿意,都會即刻擺哂上塊面度。佢唔會試著去討好你,有嗰句就講嗰句。佢係任性,但唔會刻意隱藏自己。總之佢係點就係點,唔會介意人點去睇佢。

依種不折不扣,貫徹自己嘅精神,深深打動咗我。

你話佢難搞咩?但我相信一個願打一個願捱。只要你能夠承受佢嘅任性,你就可以同佢一生一世。而喺依方面,我就係一個專家...

諗到依度,我大大力咁打咗自己一巴。

明明係要設法令到自己唔好再沈迷落去,但諗吓諗吓,居然越嚟越鍾意佢。

依家我心入面充滿住無數咁多個煩惱同疑問,真係好需要搵個人同我傾訴吓。

於是我face time咗一個叫做Jayden嘅朋友,佢係一隻無腳嘅雀仔,閱女無數,愛情經驗豐富,喺男女學上,絕對可以稱之為專家。

嘟...嘟...嘟...

「喂?」佢接聽咗。
#46 2017-11-01 05:02:46 縮小字型 放大字型

鏡頭內,戴住黑框眼鏡嘅Jayden依然係咁英俊。實不相瞞,喺我第一次見到佢嘅時候就已經封咗佢為偶像。

「Jayden,我有啲嘢想問吓你意見」

「屌你老母啦,知唔知英國依家幾點啊?晨咁早打嚟嘈醒我」

佢依家喺英國劍橋讀緊Master,同我依啲讀唔成書嘅垃圾有著天壤之別。

「Sorry啊 但我真係好煩惱...」

此時,突然有一個漂亮嘅金髮鬼妹喺鏡頭入面出現。條鬼妹啱啱起身,喺床上面伸咗個懶腰,上半身只戴住一個黑色喱士bra。

「條女係...?」我問。

「我SP」

「吓...?」

「Hey Alison,Come here!」

Jayden叫咗條鬼妹過嚟。

「This is my friend Teddy,say hi to him」

條鬼妹坐咗喺Jayden大脾「Hi~Teddy you are so cute」

佢竟然讚我cute,我都唔知點回應佢好,唯有尷尷尬尬咁向佢揮一揮手。

「Hey Alison,show him your breast」Jayden對住條鬼妹話。

「You sure?」

「Yea,he is one of my best friend」

「Okay」

「吓,喂,唔洗喇」

點知條鬼妹真係拉低個Bra,成對波連埋對粉紅色lin頭喺鏡頭面前fing嚟fing去,睇到我直直bird極。

「Alright,you can go now」fing完一輪之後Jayden就推開咗條鬼妹。

「咁樣好咩?」我問。

「Of course,好嘢梗係要同兄弟開心share嫁啦,更何況條女公廁嚟嘅,一雙玉臂千人枕」

「唉...咁我都係唔阻你喇」

「屌,有咩就快啲講啦,扭扭擰擰成個女人咁」

然後我就將依兩日所發生嘅事一五一十咁講唒比佢聽。

「你on9?」依個係佢第一個評語。

「我都係逼不得已先——」

佢打斷咗我嘅說話「斬攬啦,無將來嫁」

「我就係唔想...」

「點到你唔想啊,有乜理由媾女媾到要扮TB吖?你係咪個腦有事啊?入廠照照穩陣啲喎」

「照過啦,醫生話我有退伍軍人症,無時無刻都想當兵」

「收皮啦屌,你連兵都唔係啊,姊妹嚟咋你,訂定套姊妹裙喺人地結婚嗰日著啦」

「咁咁...咁我依家可以點啊?」

佢托住頭,諗咗一陣。

「我覺得你依家嘅情況係,四個字,谷精上腦」

「吓?」

「去叫個雞啦,射完個精你就會清醒返嫁喇」

「真係?」

「係啊,信我啦,一陣收咗線之後我send個地址畀你,去到你話係Jayden介紹過嚟啦」

「件事唔係咁簡單呢...」

「唔講喇唔講喇,係咁啦」

然後佢cut咗我線。

再隔幾秒,就收到佢send過嚟嘅地址。

《高麗棒子風俗店》?

我望住網頁上面一個又一個好似韓星女團咁嘅小姐,條賓周蠢蠢欲動。

或者Jayden講得啱,依家嘅我,最需要嘅可能係一個清晰嘅頭腦。

我穿大衣,離開酒店,向著一片聖地出發...
#47 2017-11-01 19:29:08 縮小字型 放大字型

其實人生,原來有好多時都唔知自己喺度做緊乜。

就好似我嚟到依棟設計新穎嘅商業大廈,走入一間好似VIP lounge咁嘅雞竇。

我問自己,到底諗清楚未?

係咪真係要將珍貴嘅處男之身獻畀一隻雞呢?

但西裝畢挺嘅男經理無畀時間我去考慮,就將我帶到去一間品格高尚嘅高級套房。

我坐咗喺一張真皮梳化上面,前面嘅小茶几擺放住幾盒不同種類嘅萬寶路,同埋一兜看似非常貴價嘅朱古力。

操得一口流利普通話嘅男經理問我

「先生,要喝點甚麼嗎?」

而為咗鎮靜依家緊張十分嘅心情,我需要一啲酒精嚟麻醉自己,所以我諗都唔洗諗就答佢

「干邑」
#48 2017-11-01 22:41:13 縮小字型 放大字型

男經理依照我嘅吩咐,拎咗一呈干邑過嚟,即係威士忌。

我輕輕小酌咗一口。

濃烈嘅酒精沿住喉嚨燃燒到胃部,令人精神為之一振。

此時男經理向我遞來了一支煙 。

平時唔食煙嘅我今日突然好想試一口,籍此配合我猶如浪子般嘅行為。

將煙根放喺嘴邊,輕輕吸入,呼出,自覺瀟灑無比,其實就柒過柒姑碌。

「先生,請問你想要甚麼類型的小姐呢?」

我合埋雙眼,腦海內浮現出Macy嘅身影。

佢皮膚白皙,身型纖幼,個胸畀盡應該有B。喺我想像當中,佢嘅乳頭係酒紅色,而且好細粒,好似兩粒提子乾釘咗落對波度咁。

越是幻想,性慾就越是強烈。

唔通,真係要揀條好似Macy咁樣嘅女?

Nononono!

點可以咁做嫁!

今晚嚟叫雞嘅目的就係要洗走對Macy幻想,依家居然將兩件事撈埋一齊?

無可能!

於是我狠下決心,決定pick一個同Macy類型完全相反嘅小姐。

「經理!唔該同我揀個黑肉、肥底、大波,乳暈最好大少少,麻煩唒」
#49 2017-11-03 02:15:46 縮小字型 放大字型

喺等待小姐來臨其間,我坐咗喺床邊不斷咁諗,

到底頭先嘅決定係咪正確呢?

依家嘅情況可以向兩面發展,好嘅話,嚟緊嘅小姐有機會好似TVB陳偉琪咁嘅樣,雖然唔可以稱得上係靚,但都叫做過得去,法官大人問起上嚟都可以毫不猶豫咁話屌。

但最壞嘅情況就係條女好似欣宜咁嘅款,亦即係一塊舉世無雙嘅豬扒,就算要我蒙頭入閘都頂唔撚順。

諗吓諗吓就越諗越驚,點解頭先唔正正經經揀個瘦底白滑大波呢?依家先嚟同經理講話後悔仲嚟唔嚟得切嫁?

不過為咗日後唔會留下啲乜嘢陰影,死死氣做一次笠水狗都要嫁喇。

但喺我正想打電話畀經理話要換人之際,門外就傳嚟咯咯兩吓嘅敲門聲。

Oh my god!

睇嚟一切都已經太遲喇...

我全身抖震,抱住視死如歸心情,慢慢將房門打開...
#50 2017-11-05 01:34:36 縮小字型 放大字型

「Hello Sir」

世事往往係咁難以預料。

當我以為今次肯定死撚梗嫁啦,點知眼前依位韓國佳麗嘅外表竟然相當唔錯。

肥美嘅身型加上小麥色嘅肌膚,驟眼睇仲有啲似澀谷果步,身上同樣散發住一股淫蕩嘅氣息。

依次執到實喇,雖然我未屌過西,但都知道依條女肯定好撚好砌。佢嗰對掩蓋不住嘅上圍,真係望一望都已經出唒汁,如果佢一陣幫我夾腸仔,我諗應該唔洗十秒就會射咗出嚟。

我木定口呆,眼甘甘咁望實佢。

佢一身賽車女郎嘅造型,甚是誘惑。

我就嚟把持唔住喇!好想即刻扯爛佢條裙,然後起勢咁屌屌屌啊!

「Hello?」

佢喺我面前揮一揮手,令我從一片幻想當中清醒過嚟。

「Hello...」我非常尷尬。

「You speak Chinese?」

「Yes,a little bit」

佢笑一笑,帶點可愛咁話「你好~」

相信嚟過韓國嘅朋友都知道,佢地嘅服務性行業有7成都識得講簡單嘅普通話,所以朝鮮澀谷果步亦唔例外。

佢將我由門口引領到床邊,示意我盡量放鬆一啲。

「First time?」佢問我

「No,second time」

我當然唔會如實作答,如果答咗yes,佢一陣恰鳩我唔識嘢揸流灘咁咪好蝕底?

佢眯細雙眼望住我,然後搵食指掂一掂我鼻尖話

「你說謊」