LiHKG Tools
歡迎 訪客, 登入
首頁 ›› [真人真事][小甜/小圖]我的女友? (尾已爛)
作者: 林淋琳 2017-12-08 23:10:48
LIHKG Link
最後更新: 2017-12-13 19:02:52 最後擷取: 2018-01-16 17:13:16
#1 2017-12-08 23:10:48 縮小字型 放大字型

1.
如無意外,呢個應該最後一份想送比妳嘅禮物,希望妳會鍾意呢段日子以嚟嘅一切一切,會因為我,妳生命有一點點嘅不同。

幫我多謝auntie uncle 一直以嚟嘅照顧。好好照顧自己,開開心心

就係咁,我將最後一份禮物放左係林林手入面,輕吻咗佢額頭一下,轉身離開。
#2 2017-12-08 23:11:46 縮小字型 放大字型

2.
大約喺一年前,林林以一個新同事嘅身份,入左嚟我個部門。平時返工唔係老屎忽多就係多毒拎,好難得我哋個部門由於新開,請咗好多新嚟二十出頭嘅後生仔女。結果呢到自然係厹泛濫,日日返工撩女傾偈多過做嘢

:喂,今日新嚟果個女仔ok喎,幾索,聽講仲要係單身
我回以一臉不屑嘅眼神
:你條條女單身都話ok㗎啦,係邊啊,睇過

林林比我嘅第一印象其實唔係靚果種,係優雅脫俗,清純得黎有氣質果種女仔
:未去到好索姐,Ok啦

雖然把口係咁講,但我知道林林係呢個場,已經係Top 10%
#3 2017-12-08 23:13:51 縮小字型 放大字型

3.
性人曾經講過,你抱住一隻厹心態就去撩女,點撩你都似隻厹咁,汪汪汪。

已經失戀左年半嘅我當然亦都冇諗多,望左林林一眼,就返埋位。其實呢份工我只係早林林入職半年,喺到識左啲同事朋友,有自己小圈子咁

到左中午LUNCH HOUR,好自然行去搵埋朋友出去,咁啱有個朋友坐係林林附近
:喂,行得未,咁勤力有人工加呀?
呢個時候我留意到林林係到左望右望,有啲徬徨咁,出於人道嘅立場,惟有關照一下新同事

:Hello,妳叫咩名啊?
:我姓林,平時啲人叫我林林㗎
:妳係咪未識到朋友啊,不如同埋我地一齊食啦
:好啊

就喺咁,我哋食左第一餐Lunch,同之後好多好多個Lunch。林林係一個好害羞內斂嘅人,成餐飯問一句答一句,完全唔會有多餘嘅廢話,又或者,佢根本唔想同我哋講嘢
#4 2017-12-08 23:16:10 縮小字型 放大字型

4.
往後嘅日子,林林都係同我哋一齊食,我都開始發現,原來佢只係比較怕生同慢熱,唔係冇嘢講。林林係個英國海歸嘅Fresh Grad,做左幾個月audit firm

:有嘢做就要做到好晏先走;做晒自己啲嘢,但成間公司都冇人走,又要起碼坐到八九點先敢行,放假又話要返嚟幫手,女仔真係好難頂
:唔怕啦妳都係啱啱畢業,仲可以揀下試下先決定嘅
:啊係喇,嚟緊OP 有Chill out Party 妳同唔同埋我地一齊去玩啊
:好啊

識左林林兩個月之後,終於有我哋第一次嘅outdoor活動
#5 2017-12-08 23:28:17 縮小字型 放大字型

5.
果晚,我哋一行六個人入園,雖然林林呢兩個月以嚟都係同我哋食晏,但始終我同其他同事朋友早係大半年前入職時已經識落,林林未完全融入晒我哋。作為邀請人,都唔想佢覺得被冷落,玩得唔開心,所以全晚我都有捉住林林講嘢,一路玩一路食

:玩小丑 好唔好
:唔好喇佢地會驚
:佢地驚?你驚咋下嘛

無錯,我係個畏高嘅柒頭,由細到大到去到高嘅地方就會驚,唔係驚由高空望落去,係成日覺得啲建築唔穩陣會爛左跌落去

雖然冇玩到小丑,但係林林全晚同我哋一齊玩其他機動遊戲,食嘢飲嘢,睇得出佢都玩得不亦樂乎。咁啱林林住嘅地方同我只係差十五分鐘車程,而且有巴士會經晒,我地就一齊搭車返去。

:覺得我哋呢班人點
:都幾好啊,好開心咁
:咁以後叫埋妳出黎一齊玩啦
:好啊

自從果晚,我同林林都多左嘢傾,有時放工仲會一齊搭車返屋企
#6 2017-12-08 23:43:58 縮小字型 放大字型

6.
:妳睇下,下星期青衣戲棚開幕
:係喎,好多嘢食咁,但我未去過呢啲
:咁下星期一齊去啦
:好啊,佢地呢?
:佢地唔係陪仔就溫女,一係就嫌遠,妳同我去囉
:好啦咁

今次係我第一次同林林單獨出街,冇特別準備啲乜,因為根本就冇諗過其他。

我發現林林係個好典型嘅女仔,見到嘢食就會好興奮,全部都想試,每樣買完拎上手,都會相機食先,食唔夠兩啖就叫我幫手食晒佢

喺果日我開始覺得林林都係一個好可愛嘅少女,簡簡單單,鍾意食,鍾意訓。但我並冇發覺原來佢仲有另一面,遠遠超乎我想像嘅一面。
#7 2017-12-08 23:53:38 縮小字型 放大字型

7.
接下嚟嘅日子我哋都有成日whatsapp 傾偈,收工一齊搭車,開始成日會分享啲生活上嘅事。當然我都有輕輕filrt下佢,但佢都係冇咩反應輕輕帶過,而我只係覺得佢比較內斂。

兩個月之後,我同林林不約而同咁喺差唔多日子,分別同自己嘅朋友去大阪旅行,中間有幾日overlap,而我哋都約左一晚出心齋橋。

果晚我哋去左夾公仔,因為佢好鍾意Hello Kitty,於是我搵左部機起勢咁夾,夾到佢都覺得唔耐煩想走嘅時候,終於夾到

:輕鬆,就是咁簡單
:你睇下自己夾左幾耐比左幾錢先喇



一路講佢一路好開心咁攬住隻公仔,同我去咗跑步人到影相。而我,亦都乘機搭住左佢膊頭。
#8 2017-12-09 00:04:31 縮小字型 放大字型

8.
佢並冇抗拒或者推開我,咁我當然打蛇隨棍上,話送埋佢返酒店。

有人話過離咗鄉個人做嘢會大膽咗。我都冇諗過自己會咁樣搭住佢,但就係突然心血來潮想搭住佢,攬一攬佢,之後返酒店嘅成程路我隻手都冇離開過佢肩膊。

沿路我哋都一直有講有笑,分享自己呢兩日嘅行程、經歷,但唔知點解有種感覺,覺得係因為太突兀,可能好似比人非禮,佢果下唔識反應咁,先會比我搭住
#9 2017-12-09 00:59:03 縮小字型 放大字型

9.
喺佢返香港嘅前一晚
:不如我聽日嚟接妳機啦,妳買左咁多嘢
:唔洗啦,廢事你專登入機場
:唔怕啦,我都要搵日返去還wifi蛋
(因為我真係on99咁拎左返屋企冇還)

接佢機果陣,佢啲朋友見到我即刻係到起哄
:Wow 男朋友仔接機
:我條仔肯定唔會做呢啲
:之前又唔介紹

林林有少少尷尬咁同朋友講拜拜,過左嚟我到一齊去搭車

我見佢都唔介意朋友見到我,好似係個好嘅開始,果種突兀感應該慢慢就會消失

跟住成程車,我都有攬住佢,一邊聽佢分享旅行嘅嘢,一邊幫佢拎行李返去
#10 2017-12-09 11:31:32 縮小字型 放大字型

10.
當我以為一切開始上左正軌,諗緊幾時正式問佢做我女朋友之際,又出現咗我始料不及嘅發展

幾日後收工,我同佢行去搭車,手背掂住手背,好順手咁就拖住咗佢,佢亦都若無其事咁同我有講有笑,呢刻我嘅心情就好似美斯入波為國家隊奠定勝局咁,好想即刻跪底剷草

上到車,佢冇啦啦話有啲想同我講,呢個時候我已經感覺到係咩事
:我想同你講啲嘢,但我怕你唔開心
:妳講啦,冇事喎
:我一直當你係朋友
:....... 做咩姐,我都冇叫妳做我女朋友
:咁點解朋友要拖住

呢刻我嘅心情就好似美斯入波為國家隊奠定勝局,但球波吹左越位
#11 2017-12-09 12:27:16 縮小字型 放大字型

11.
我同佢去左佢屋企附近一個公園,我叫佢過嚟比我攬住,佢又真係照做 我哋係胸貼胸果隻攬,我完全感受到佢玲瓏浮突嘅身形,但呢刻嘅我完全冇時間比下半身思考

我係佢耳邊輕聲問道
:做咩事啊,一直都好哋哋
:我覺得你係個好好嘅朋友,同你係好多嘢傾好好笑,但你唔係我鍾意果種

我完全on左無賴mode
:做咩姐,我明,我都冇要過妳做我女朋友,比個機會自己試下唔好咩?
:我好清楚自己想要咩,你唔會係我想要嘅男仔
:咁妳想要點嘅男仔?
:起碼唔似你咁on9,我自己已經夠on9,我唔想另一半都係咁,我想佢成熟啲可以照顧到我啊
:同埋我鍾意果啲唔會好似你咁有咁多異性朋友,所以我一直都當自己係你其中一個玩得埋嘅異性朋友咋
#12 2017-12-09 17:19:18 縮小字型 放大字型

12.
其實故事嚟到呢到應該完,只係一個on9毒拎以為大家成日傾偈分享生活,唔介意有身體接觸,就以為人哋都對你有feel,宜家好人卡都派埋,柒夠喇收皮啦。

但果刻我只係諗,追女仔一向都要時間、耐性,真係有幾多人可以一見鍾情,一拍即合,都係需要時間慢慢相處。果刻嘅我,只係想留佢係我身邊

:我明㗎喇,比啲時間我啦,我哋又唔係真係相處有咩問題

果一晚,我唔單止冇同佢不歡而散,而且聽佢講左好多以前係外國嘅事

佢喺外國讀書果陣,識左啲朋友落bar落club玩,比男仔呃過感情。當然我相信佢有啲嘢隱瞞左,或者冇講晒出嚟。但我都開始明白,點解佢想要個成熟,有安全感啲嘅男仔,唔係同佢嬉嬉哈哈,鳩下鳩下嘅人
#13 2017-12-09 22:08:47 縮小字型 放大字型

13.
唔知有冇人同我一樣咁倔,咁厚面皮,個女仔講到咁仲要痴住唔放手,但正正係因為呢點,先會有以後嘅故事

經過果一晚,我更加決定咗想好好追林林一次。或者之前嘅我,成日同佢嘻嘻哈哈,冇嚟認真,咁隨便就拖左佢。我想比佢知道我係真心,唔係玩玩下。

於是我開始計劃一連串嘅活動,想同佢一齊經歷多啲,創造多啲屬於我哋嘅回憶,等佢可以依賴我。

之後嘅時間,我哋都變返之前咁,有傾有講,一齊食飯收工。當然我間唔中都有借啲意拖一拖佢,佢亦都冇反抗鬆開
#14 2017-12-09 23:14:34 縮小字型 放大字型

14.
兩星期後嘅星期六,我帶左佢去大尾督水庫果到放風箏,今次係佢成世人第一次放風箏,當佢見到隻風箏飛到又高又遠果陣,好開心咁不停影相。

見到鍾意嘅人開心,個心會有一絲絲悸動,想繼續比幸福佢嘅感覺。

但慢慢我發現,佢並唔係我想像中咁開心,咁享受。

完左開頭嘅興奮,發現佢開始嫌曬,拎左褸包住佢白晢嘅肌膚,我見時候都差唔多,就同佢左落下面巴希雅燒烤到晚餐。咁樣係個爐到燒串燒食亦都係佢嘅第一次,當佢主動拖住我去睇有咩食物揀,果刻我覺得一切都值了。
#15 2017-12-09 23:41:04 縮小字型 放大字型

15.
放完放箏,食完燒烤,是日行程並未結束。我準備左啲滿天星,一路拖住佢,一路同佢慢慢行返上堤壩。

:今日71 好似有煙花睇
:我先唔會出去睇,咁多人又迫
:冇人叫妳出去睇,妳合一合埋眼
:做咩啊
:妳合左先啦

就係咁我點著左啲滿天星,佢聽到啲滋滋聲就打開左隻眼
:呢個係我為妳一個人放嘅煙花
:嘩好靚啊,點解嘅,邊到搵返嚟㗎?



就喺咁,我一路笑住咁幫佢點著一枝又一枝滿天星
#16 2017-12-10 10:12:56 縮小字型 放大字型

16.
玩完滿天星,我癱咗係水庫條橋上面,望住個天空,跟住示意佢訓落我攤開嘅手臂到,佢望左我一眼,訓咗落黎。我就同佢一齊肩並肩訓咗係到,望住天空

:可惜今日個天唔係咁好,唔係應該會睇到多啲星星
:呢到夜晚喺幾靚幾舒服,如果日頭唔係咁熱咁曬嘅話
:都係好嘅體驗黎嘅係咪
:從來都冇男仔咁做過,之前最多都喺試過帶我騎馬
:咁我咪好特別,拎左妳第一次
:做咩姐你
:我覺得妳同之前追過我果啲,有啲唔同
:點解?有咩分別
:唔知啊,總之就係感覺有啲唔同,唔係淨係得on9

我忍唔住轉身夾硬錫左佢一啖,佢當然即刻推開我,喺我地未嚟得切反應之際,個天開始慢慢落起雨,仲愈落愈大。
#17 2017-12-10 11:31:16 縮小字型 放大字型

17.
我哋即刻執野飛奔離開,去過嘅都知道,果到真係冇遮冇掩,啲雨只能夠用好撚柒大黎形容,我同佢兩個全身都係濕撚晒,好似比人扔左入洗衣機洗完出黎咁。

我哋一路跑到落下面camp site隔離有瓦遮頭嘅位置,非常狼狽,想拎紙巾出嚟抹,點知連紙巾都係濕撚晒。我望住佢,佢望住我,係到笑。我都留意到,黑色嘅bra 已經係佢濕透左嘅白Tee 上若隱若現。

當雨開始稍為變細,我哋跑左去前面燒烤場個公廁擰返乾啲水,簡單清潔。為咗唔想佢冷親,出到嚟我即刻捉左佢去搭的士。落車果陣張凳都見到濕咗嘅屎忽印,我諗真係咁大個人都未試過濕到咁返屋企。

我已經唔知今次對於佢嚟講,係個好定唔好嘅回憶
#18 2017-12-10 14:44:08 縮小字型 放大字型

18.
完成左第一個活動,我覺得同林林嘅關係亦都明朗化左,講嘢都大膽咗

:行得未啊
:等多我15分鐘
:咁我走先喇
:寶貝
:唔識你

早喺林林去日本果陣已經成日講話想買對波鞋,我喺網上見到有對幾靚嘅白粉波鞋就訂咗,果日拎去比佢

:嗱比妳㗎
:咩嚟㗎?冇啦啦做咩比嘢我?
:妳睇下鍾唔鍾意
:幾靚喎,點解要送鞋比我嘅
:之前妳一路都話想要嘛,著住佢,咪好似我陪住妳行之後嘅路咁
:好sweet喎,多謝。你點知我咩碼㗎
:妳試下啱唔啱先啦,之前有次借啲意問過妳

呢對鞋喺我送比林林嘅第一份禮物,亦都成為左佢最鍾意著嘅波鞋。每次我見到佢著,都會暗暗自喜,覺得佢記得我講過嘅嘢,喺我陪住佢行啊哈哈
#19 2017-12-10 18:15:30 縮小字型 放大字型

19.
送比林林嘅呢款波鞋,其實我都有一對男裝嘅,實情係對有私心嘅情侶鞋

:不如聽日妳著果對波鞋
:好啊,咁你呢
:妳話呢

我簡直係欣喜若狂,佢主動問返我睇下會唔會同佢一齊著,老虎蟹都話著啦,果晚收工我哋就好似真係拍緊拖咁,著住情侶鞋,行咗陣街,食飯。但係送佢返屋企果陣

:你陣間落車先啦,唔洗送我

唔知點解,果種唔好嘅感覺又出現返晒
:又做咩事啊
:冇嘢啊,你落車啦
#20 2017-12-10 18:42:39 縮小字型 放大字型

20.
我冇落到車,粒聲不發咁送到佢返屋企樓下

:喂啊,做咩姐,Sorry囉
:冇嘢
:冇嘢你又咁,點先可以唔嬲啊

我輕輕拉左佢過嚟,錫左林林個咀一下,佢冇推開,於是我又錫多左幾下

:滿意未啊

我攬住咗佢
:我哋以後會變成點?
:我都唔知啊

糊里糊塗咁就成為咗我同佢初吻嘅晚上
#21 2017-12-10 23:21:09 縮小字型 放大字型

21.
追女仔嘅過程中,最令人又愛又恨莫過於曖昧中不明不白嘅苦澀味,你唔知對方喺咪都有同樣嘅感覺;唔知可唔可以令對方都對你產生果種感覺。

似有還冇,當你以為再下一成嘅時候,又比對方推一推開,若即若離。你可能好比心機,付出好多好多,但你可能會一無所有。

我已經開始唔清楚,林林喺想比機會我,定喺想繼續拒絕我。但當然,無論喺邊個答案都好,我都唔會放棄。
#22 2017-12-11 08:42:51 縮小字型 放大字型

22.
如是者又過左一個星期,果晚我約左林林去又一城,但我地兩個都好似有啲嘢咁

:你係咪又有嘢
:冇啊,妳先似係有
:我哋可唔可以唔好再喺咁?好哋哋拍一晚拖得唔得?
:好啦

我心裡都不禁都有啲愕然,咩料呀,咁順嘆?又暴風雨前夕呀

:咁講得咩事未
:你講先
:我有偷望到妳成日同個男仔whatsapp,果個邊個嚟?
#23 2017-12-11 10:15:31 縮小字型 放大字型

23.
林林有少少失笑
:噗 原來你就喺因為呢樣嘢啊,果個係以前公司嘅前同事嚟,我哋冇嘢㗎
:好啦,咁妳又做咩事啊
:早兩日你咪話約左個朋友食飯嘅,果個喺咪女仔嚟
:喺呀,妳又喺因為呢樣嘢呀
:佢喺以前大學啲同學,寫專欄嘅,佢有篇嘢想問我拎下題材姐
:所以我先話唔鍾意咁多異性嘅男仔
:唔問又唔喺,問又好似太干涉
:咁我以後主動同妳講啦好冇
:所以話好似我以前果啲咁冇異性朋友就唔洗煩

我有少少炆
:點解妳喺都要拎我同以前果啲比較姐?我就喺我,點解妳唔相信我可以用我果套嚟錫妳

林林衝過嚟橋住我,拖住我隻手
:喂呀,Sorry,唔好成日扮嬲啊你

又喺一個幸福嘅晚上,我真喺好希望可以一直都喺咁
#24 2017-12-11 17:56:12 縮小字型 放大字型

24.
幸福感並唔喺維持左好耐,只係短短過咗一個星期多啲,我就正式體驗到林林嘅脾性。當晚收工之後約左佢去鑽石山睇戲,但我發現一有空餘時間,行開行埋,佢都會同上次個前男同事whatsapp,我有小小面露不悅,但林林完全不聞不問。

:我去M記買個包

開場前十五分鐘左右,我諗住佢未食嘢,雖然心裡有啲不快,但都想買啲嘢比佢衣下肚,始終要兩個半鐘後先有得食,我就急步行快小小,佢跟係後面,我間唔使都有望返轉頭睇佢,直到我喺M記買完嘢出嚟,發現佢唔見咗

我打左幾次比佢都冇人聽,我心入面大叫,今鋪仆街了,唔係掛,洗唔洗失埋蹤,都冇鬧過佢或者講過啲咩,咁大反應!?我內心雖然一直抱怨,但係身體就一邊係商場行嚟行去搵佢

:妳去左邊啊
:嬲都唔係咁樣粒聲唔出走左去下嘛
:理下我先好冇?
:咁樣係點姐,有咩見左面再講啦
:Sorry囉,我係有做得唔好嘅地方,但妳都唔洗咁下嘛
:可唔可以聽我電話先
#25 2017-12-11 22:21:11 縮小字型 放大字型

25.
唔知打左幾多個電話,Send左幾多個msg比林林,直到我都準備放棄行緊落地鐵站之際,佢終於聽左我電話

:妳去咗邊啊?
:你係邊?
:行緊落地鐵站,妳喺邊啊,我哋仲睇唔睇?
:喺邊等
:去返戲院門口等啦

成場戲雖然我都有郁下佢掂下佢,但佢完全唔理我

:你坐返好啲睇戲得唔得姐

結果成套戲我都唔知講乜,個心淨喺到諗,做咩事姐唉,明明喺我嬲佢掛住同人whatsapp在先,宜家要氹返轉頭,早知唔嬲好過嬲,真係冇撚用
#26 2017-12-11 22:22:07 縮小字型 放大字型

26.
:嬲完未啊
:.......
:Sorry 囉,我係有啲忟妳掛住同人whatsapp姐,我去買M記都係諗住比妳食之嘛
:咁忟就可以咁樣行先唔理我?
:我都有回頭望下妳架嘛,Sorry囉,以後會拖實妳唔會再鬆開好冇
:哼
:應承我以後唔好再咁樣走左去好冇?我真係驚㗎大佬
:有咩唔滿意妳打我鬧我但唔好咁走左去呀
:好啦我都有啲唔啱Sorry

我同林林都承諾咗大家以後都唔會再亂咁走左去。但我完全冇諗過林林會有咁大脾氣,有一刻我仲覺得會因為呢啲咁無稽嘅事搞到以後到死不相往來。但當我靜一靜,問自己,值得咩?個心就會推我去氹返林林。
#27 2017-12-12 21:02:37 縮小字型 放大字型

27.
經歷過呢一役,我同自己講要醒醒定定,步步為營,再行錯一步就會萬劫不復,永不翻生。同時,我都開始計劃我哋嘅深圳一天遊。

雖然話係計劃,但其實都冇咩可以計劃,都係行下街食下嘢,唔通帶佢揼邪骨咩(利申:未試過),汲取咗上次經驗,我都唔會再大熱天時帶林林去行東門呢啲地方。

上網睇左好耐深圳有咩地方值得去,其實真係唔多,平時上去都係食餐飯即日來回。睇睇下見到有個叫海岸城嘅地方,喺個好大嘅shopping mall,所以唔洗諗,就呢個。
#28 2017-12-12 21:05:02 縮小字型 放大字型

28.
海岸城嘅感覺就同平時香港啲shopping mall 差唔多,充斥著各個連鎖嘅名店,食肆。再悶都好,重點係同邊個一齊姐

:嘩你睇下,咁得意嘅
:呢個好似好好味咁
:好想食麻辣燙
:好啊,同妳去搵下

每次去親一啲佢未去過嘅新地方,林林都會好似個小朋友咁,見到啲新奇有趣嘢就喺咁捉住我叫我睇下,所以我好鍾意同佢去啲佢未去過嘅地方,咁佢就會好似個細路女咁拖實我




當晚帶左林林帶左林林去食鐵板燒,見到佢望住個餐牌喺咁督呢樣督果樣,流晒口水咁嘅樣,我竟然覺得好開心好幸福,我都覺得自己有少少變態。
#29 2017-12-12 21:06:08 縮小字型 放大字型

29.
日轉星移,由當初喺林林屋企樓下比佢拒絕,到宜家已經過咗幾個月,但佢嘅情緒就好似女人經期咁,每隔一排,總要爆一爆。

有一晚林林同個同性朋友去咗飲嘢,返到去第日就開始唔應我WhatsApp

:妳去咗邊
:做咩睇左又唔應我姐
:理下我好冇?
:發生咩事

我嘗試打電話比林林,唔係冇人聽就係比佢收我線

:做咩事突然間又咁姐
:可唔可以聽下我電話
:比十分鐘我啦好冇

其實我都知道喺咩事,但真喺冇諗到會時好時壞得咁緊要,有一刻我真係以為林林喺有人格分裂
#30 2017-12-12 22:55:51 縮小字型 放大字型

30.
過咗一陣,林林終於聽電話
:你煩唔煩㗎?
:冇啦啦又做咩事姐
:唔喺冇啦啦,由第一日我都同你講左㗎啦,真喺唔岩,Sorry
:喺唔喺妳個朋友講左啲咩影響妳姐,呢排明明都相處得好哋哋
:唔關佢事,喺你真喺唔會喺我想要嘅男仔
:咁宜家我做咗啲咩姐,又冇迫妳一齊,又冇夾硬迫妳做啲咩,唔好突然情緒到咗就發脾氣咁樣好冇
:唔知以為我殺人放火定係強姦咗個婆婆

林林有少少失笑
:宜家喺我身邊好慘,好唔開心咩妳
:都幾㗎,咁唔好拖住先得唔得姐
:得喇,乖乖哋得唔得姐
:點解講極你都唔明,晒左成晚時間都喺得個吉
:鬼叫妳生得咁靚惹人憐愛


每一次傾,講下講下總係會唔知點解就傾咗幾個鐘。我嘅心情就好似過山車咁,成日比林林扯高扯低,我已經唔知道到底值唔值得咁樣繼續落去
#31 2017-12-13 15:19:42 縮小字型 放大字型

31.
縱使內心有所不滿,但不得不否認林林正常果陣,係幾sweet 幾開心嘅

:妳今晚同班舊同事食飯不如我OT等埋妳一齊返去啦
:你有嘢要O咩?
:公司要搵嘢做實搵到嘢做啦

到左收工果陣,林林冇啦啦搵我話落緊雨

:你有冇帶遮呀?
:落雨咩?我宜家拎落嚟比妳

一走到落去,乜雨都冇,我只係見林林拎住pacific coffee嘅紙袋。佢竟然擔心我OT會餓親買咗三文治同嘢飲比我,呢個女人,我真係又愛又恨。


#32 2017-12-13 16:17:43 縮小字型 放大字型

32.
果排因為黃埔九號水產開幕,一直都想去睇下。就捉左林林同我去

最近我開始成日捉住林林影相



:點解你宜家成日都影相,你係咪就死要整啲回憶錄咁

因為我真係唔知道幾時,邊日會比林林發脾氣,發到不得不結束呢段關係,等我有個留念。

黃埔林林又係第一次嚟。我諗其實成個香港佢都冇點去過。
:妳知唔知隻黃埔號平日會開出去公海
:下咁啲人嚟行街買嘢點算?
:會有通知㗎啦
:幾時同我上船出海玩返次
:你自己上

直到我哋喺差唔多行完成個黃埔,林林先發現

:隻船痴住喺個地下,你玩呀

我真喺唔明點解可以一時咁白痴可愛,一時又認真鋹雞。
#33 2017-12-13 16:31:16 縮小字型 放大字型

33.
我哋沿住黃埔碼頭條海濱長廊一路拖實行到去尖沙咀

:妳以前喺咪成日落club落bar玩㗎
:都唔算成日嘅,但果邊成日都冇嘢做,咪同啲fd落下囉
:咁妳果陣個ex呢?佢比咩
:拍拖果陣喺小咗嘅,但都試過暪住佢去玩
:即喺有出軌?
:都唔算出軌嘅
:flirt 下 ONS果啲?
:flirt下囉,咁又冇ONS
:不過佢果陣都好癲,試過用find my iphone locate我係邊
:果陣去完party,啲fd話想飲嘢下場,唔想佢擔心等我,呃佢話返到咁囉。
:信任破壞咗就好難建立返
:咁我都知

喺要去到呢啲有氣氛嘅時間,先可以慢慢比我窺探林林嘅過去。佢喺點嘅環境成長?點解會變到宜家咁樣?林林點睇都係個身經百戰嘅高手,心理質素,經驗,體格,完全可以係戰場上撚到啲毒撚體無完膚。
#34 2017-12-13 17:59:15 縮小字型 放大字型

34.
啱呀,唔洗笑,我知我係果個on9毒撚。其實林林已經講到好白,比我拖下攬下只係因為佢冇所謂,但其實佢並唔鍾意。
只係我仲要唔知為乜咁捉住唔放手,纏住晒。

我成日問自己三條問題
:值唔值得?
:後唔後悔?
:宜家離開甘唔甘心?

或者到最後會一無所有,令佢厭煩,大家到死不相往來。但我有經歷過;有啲回憶;有啲體會;有所成長,佢會記得有個人喺佢生命入面做過一啲咁on9嘅嘢。

我都可以揀宜家就咁拍拍屎忽walk away,做個過客,好似我哋生命入面從未交集。Yes,又一個不敗記錄,喺我唔繼續媾佢之嘛
我只係揀左前者

我唔喺要個華麗嘅理由,包裝到自己冠冕堂皇咁去纏住佢。呢啲經歷,回憶,點講都只會屬於我同佢。

你當我On9又好厹又好扮情聖又好。人類總係會做好多on9嘢,邊個未後生過?

你有冇一個對象,會令你不顧一切?一開始就衝上道德高地看世界,將自己立於不敗之地,居高臨下去睇愛情,永遠唔會得到真正嘅愛情。

如果有一日,佢同我講同我一齊嘅時間,唔開心多過開心,咁我就自動離開啦。
#35 2017-12-13 18:58:51 縮小字型 放大字型

35.
唔知有冇人會做啲日記Journal咁記錄自己同另一半嘅事。喺唔知幾時開始,我開左個IG AC,記錄住我同林林嘅生活點滴,做咗啲乜,點解嘈交,我嘅心情。

當然呢個IG到宜家都喺得我知道,真喺一個屬於自己嘅回憶錄,等我有一日望返,可以慨嘆自己年少輕狂。

所謂當局者迷,旁觀者清。感情如果真喺你講句on9就可以完,咁都真喺幾兒戲。

呢一日,要加入嘅記錄,喺我們的第一件情侶衫。我哋去咗元朗Yoho 行街。
#36 2017-12-13 19:02:52 縮小字型 放大字型

36.
:嘩Jack Wills做緊Sale,呢件粉紅色恤衫好似幾好睇
:喺唔錯,妳睇下有冇碼先啦

行到男裝果陣
:咦呢件薄荷綠恤衫都ok喎
:隻色喺幾靚
:咁咪可以襯返妳果件做情侶裝
:唔想同妳情侶裝喎,睇埋其他

:呢款冷衫都ok啊,冬天可以著,反正宜家咁平
:咁妳咪買
:下你唔買呀?

我心入面會心微笑
:咁我揀咩色好
:呢隻藍囉,入面著恤衫都應該幾好睇

我哋去左更衣室試衫(分開),佢試完出嚟我攬住佢望塊全身鏡

:都幾襯
:邊個要同你襯,我哋試埋另外果件先啦

最後我哋恤衫同冷衫都買咗