LiHKG Tools
歡迎 訪客, 登入
首頁 ›› [老土甜故]隔籬單位黎咗個單親阿媽 (連載中)
作者: 機場先接的士佬 2017-11-17 00:18:44
LIHKG Link
最後更新: 2018-01-08 20:52:37 最後擷取: 2018-01-20 18:23:01
#1 2017-11-17 00:18:44 縮小字型 放大字型

話說兩年前某個禮拜三,本來訓得好地地,隔籬單位晨早七點幾就鑽野
心諗大佬唔係咁玩我呀嘛 難得今日無工開想瞓耐啲都唔得
衫都唔換著住件赤裸上半身 充滿怒火咁走去隔籬屋拍門
無幾耐有個師傅開門走咗出黎
我「喂師傅,成7點全村人都訓緊覺架,係唔係一定要咁早鑽野啦」
佢「唔好意思唔好意思,就快埋尾差少少手尾,唉個客急起貨無計,唔好意思」
個人吵完醒少少諗得理性咗 人地都係搵食 再者大家都係同行都可以理解佢
睇佢個樣都幾單揸手 呢排多公屋入伙大家搶住分餅食
所以我都係唉咗一聲拎個尾睬就返入自己屋同枕頭塞住耳仔繼續瞓

隔離屋上手係一對老人家 都成70幾歲 走廊行過見到都有打下招呼 係呢度都住咗好多年
聽聞返大陸養老 直到半個月前先知見佢地搬走咗 無幾耐轉咗第二手就開始搞裝修野

過咗兩粒鐘再起返身 己經聽唔到鑽野聲 睇怕都鑽完哂野 心情即刻舒暢咗唔少
難得放假懶懶聞咁煮完個米粉 開住部ps4邊食邊打三國志
過咗一陣聽到有人係度講野 又係隔離屋傳出黎 我開住大門通風所以聽得都幾清楚
男嗰個係頭先個裝修佬 今次多咗條女
條女就咁聽聲應該都30幾歲 語氣帶有無奈
「上次你話牆身嗰度執咗喇 小姐你睇下收唔收貨」
「呢度...同埋呢度好似仲有少少霉」
「其實都唔覺眼 反正你呢度之後都會放傢俬」
「唔係咁嗰喎應該 一開始講好咗執好哂架嘛」
「小姐 出面你搵人都係咁架 呢度樓齡咁舊 你個價最多可以做到咁 最多我而家幫你油多陣防潮啦 當我送俾你喇靚女」
「唔...咁麻煩你執多次」

聽完佢地講野真係心裡面笑出黎 個師傅話就話幾有禮貌
實際可能唔夠價做 但不嬲交牆都要靚靚仔仔交畀人
應該都係個師傅冇鏟底 求其洗走發霉位就直接上油
雖則我都係做咗裝修一兩年,但以我而家經驗唔使埋去睇都估到係咁
因為我自己都有咁做過 急起貨上黎無計 怪就怪隔籬屋個女人唔好彩
唔知個女人結咗婚未 如果結咗呢裝修講數呢家野應該搵老公男人黎傾
如果個客係男人有時真係會俾佢拋塞 不過人地而家眼見你女人仔梗係食住你

「執好架喇你睇睇啦小組,我要走喇小姐,你有問題可以隨時再call我上黎睇睇」

聽到個師傅走既執哂架撐急急腳既腳步聲走咗 睇黎真係急住下一場
唔知好奇心作崇定職業病發作咩 我著住人字拖短褲
就咁行咗出去過參觀下其他行家既手工 望兩眼博個女人睇唔到我
間屋鐵閂大門都中門大開 係走廊離遠望入去
嘩真係估中咗 一撻撻發霉位都幾明顯 個師傅油防潮都只係緩兵之計
雖則個位第日會傢俬 就算唔講美觀 由其將軍澳呢啲地方咁潮濕
咁樣搞法住夠一兩年就好快會見到蜘蛛紋 伴隨住既就係陣灰碌落
間屋二人單位一眼望哂無咩好睇 一睇完諗住趁個女仔未發現我偷望佢間屋嗱嗱臨返入屋
廢事人地以為我恥笑佢就唔知
點知佢係廁所走出黎 我同佢視線重疊 呢個時間好尷尬
佢一定知道我聽完佢地講野就出黎八掛望下間屋 覺得有男人老狗可以咁八掛
原來我諗住開口打破呢個忸怩既氣氛,點知佢行近門口,對我開口先

佢「唔好意思先生,今朝裝修係唔係嘈到你地,個師傅剩就到朝早過黎」
我「無咩野啫 裝修係咁
佢「我姓陳,我地呢緊下個禮拜會搬入黎,多多指教」
我「我姓張,大家咁話,呢度幾好住架」
佢「哈哈,希望第日唔會俾到麻煩你地」
我「哈哈 唔會唔會 唔阻你先」
佢「再見」

意料之外就係個女人幾靚 30中左右大我幾年 把聲幾溫柔 有幾分女人味但又唔算姣嗰種
清清秀秀 賢慧型嗰種 不過佢著衫就普普通通 身材都一般
講完幾門面寒暄說話 佢無理我繼續周圍張望間屋四周 呢度影嗰度影
佢神情好似幾憂心咁皺起眉頭 睇怕佢自己都唔收貨 奈何佢一個女人仔唔夠牙力講唔贏個師傅
無幾耐我返咗佢屋企之後 聽到佢大門關咗 但係冇走人既腳步聲
可能佢怕其他鄰居好似我咁八排又出黎望 搞到我都唔好意思
有一樣野 我留意到佢頭先講我地兩個字 睇怕佢都係新婚少婦或者同男朋友同居
辛辛苦苦抽到公屋呢個安樂窩 點知俾裝修野搞到焦頭爛額 睇怕佢都有排執
其實佢應該裝修野叫佢老公出黎講比較好 無咁容易俾師傅拋到
不過可能人地老公工作繁忙抽唔到身 都係唔好理人地家事
剩係諗到有個幾正既人妻住喺隔籬都幾爽
#2 2017-11-17 00:19:33 縮小字型 放大字型

就係咁 大概下個禮拜佢地搬咗過黎 佢自己咁講 其實我都冇親眼見到佢地
我平時返工朝7晚6 睇心情有陣時堂食埋先返 有陣時攞外賣返去食
本來都期待呢個月有陣時會係走廊望到人妻兩眼 返工都醒神啲多過飲咖啡咁傷身
點知成個月都冇發生以上既相遇

終於一個月後 嗰日我有工開7點幾就起行 係lobby等咗陣lift
突然間聽到我間房嗰邊走廊傳出鎖鐵閘喀嚓聲 我個心泛起一絲既興奮
唔通係陳小姐 聽聲都似佢屋企 腳步聲愈來愈近 點知竟然係一個中學學生妹
我搬住呢度6年都未見過呢個妹妹仔
佢皮膚幾白 個樣嬌嫩 俾人一種楚楚可憐既感覺
同陳小姐一樣紮馬尾 不過個頭都亂亂地 應該都遲起身趕返學
嘩見唔到人妻有個學生妹都唔錯 趁部lift未到 我禮貌咁同佢講聲早晨
佢原本用手整緊條裙 聽停低轉個頭望我呆咗幾秒 冷淡咁回應返我一聲早晨
應該佢唔會覺得我係痴漢阿叔掛 前幾年我仲覺得自己好後生 雖然近年做事開始有些力不從心
體能差咗 髮型都開始向後移 不過都係31歲未到阿叔級 個樣都仲見得下人
我安慰自己佢只係太眼瞓一時之間唔知點應我 入到lift佢低頭玩手機 出lift之後各走各路
佢返學條路同我拎車條路唔同 成程車我都諗呢個學生妹邊個 點解之前無見過佢
好有可能係陳小姐個女 唔通佢地三個人住一個二人單位 環境咁逼迫
總結出佢地屋企真係幾窮 加埋裝修成件事合理哂

我之後發覺得我估啱一樣野 都估錯咗一樣野
估岩既係佢地真係好窮 估錯既係佢地純粹係一個單親家庭
係一個另一個住咗幾耐既同一層鄰居阿嬸係lift度大家冇咩野好講 某日無啦啦講我知
佢同我一樣都幾八掛 佢講到佢地兩母女身世好慘 老公衰賭差人地好多錢 玩失蹤留得佢地相依為命 陳小姐一個打三份工
裡面好大成份佢估估下作先黎 完全唔可信
唯一我相信阿嬸既係單親家庭既講法 話說真係冇見過佢老公/男友出現過
之後一個幾月我試過一兩次倒垃圾撞到陳小姐,大家微笑點頭打個招呼就完
反而見得最多係佢個女 嗰排我多工開 每朝都七點幾出門 而佢既返學時間都好固定
幾乎兩日就撞到一次 佢長期維持未訓瞓既狀態 打下哈欠同摔下眼 黑眼圈都幾深
每次我都係我先同佢打聲招呼 佢都冇再塞機好快回應我 只係語氣都係好平淡 都叫有做禮貌既
學生妹佢散發一種少女香 每次行過都好香 唔似香水味咁濃烈 老實講係幾好聞
雖然咁講好變態 但等佢一齊入lift唔知幾時開始變咗種習慣 見唔到學生妹會周身唔聚財

本來我同個學生妹都係一句起兩句止,有一日朝早嗰個阿嬸 我同佢三個咁岩一齊入lift
阿嬸換哂一身運動裝 fing下手熱身應該都係落街散步 學生妹都如常返學
平時同阿嬸都係講下「你返工啊?」「你落街做運動啊?」「返工好啊個人無咁悶」「做運動好啊對身體好啲」無營養既野
點知呢次阿嬸一黎就用誠懇既眼神就問起我一樣野 問我可唔可以幫佢個仔間新屋裝修
佢個仔之前都係度住 讀書幾叻入完港大讀醫做醫生搵到下錢 過年大時大節返黎食飯都見到佢著到身光頸靚
上年年尾仲結埋婚有請埋我 之後佢同老婆搬咗去出住
前排都有聽阿嬸講過下呢排佢個仔而家物色緊想再搬過間再大些既屋說話去港島住近返工 同埋個孫就快出世
叫生不如叫熟 阿嬸都算好野 我都幾佩服咁有錢佢都精打細算 難怪佢教到個港大仔出黎
佢無講裝修呢單野預算價錢 但係照道理都應該係人情價
生意差既時候呢個師奶人情會變得格外重要 唔可以睇少師奶既人脈
尤其而家班師奶個個都有幾個微信 whatapp群揸手
只不過呢排都多job做 我同師傅同班兄弟班都無停手 但係想推又唔推到 就咁客氣咁話佢搬咗到時搵我無問題
阿嬸笑到見牙唔見眼 又係咁奉承我話我手勢好又剩 因為前排我幫佢一個朋友公屋裝修 結果佢朋友都幾滿意 搞到我都有啲沾沾自喜
我以為學生妹係一旁玩手機冇理我地無出過聲 點知後來先知原來條學生妹一路都偷聽緊我地講野 條女都算古惑喇

我都奇怪點解之後某一日我賣外賣諗住返屋企食 六點幾左右我臨入門口見到陳小姐出去倒垃圾
我從來都未係呢個時間撞過怇 因為據我所知佢收七點幾
佢見到我拎住個外賣 笑住同我講
佢:「又食飯盒啊,無益啊」
我:「哈哈 一個人懶得煮」
我應該幾肯定未有一次俾佢見到我買外賣先真
一定係阿嬸衰多口同佢講我單身 孤苦咁次次都係叫外賣食 無人無物好慘 佢真係好八掛
搞到陳小姐咁快就對我有咁既印象
佢「我煮緊飯 轉頭不如你過黎一齊食 今日煮多咗餸」
我「唔使咁客氣喇」
佢「你當幫下我地兩母女囉 兩個人真係食唔哂呢」
#3 2017-11-17 00:19:56 縮小字型 放大字型

陳小姐突然咁容氣點好意思 無啦啦咁好心叫我一個平時只打下招呼既男人入佢屋食飯
正路都應該避諱下 始終佢都有個女係度 好在自問都算正人君子 安份守己 AV情節都留返返自己屋打J用
唔通佢鍾意我 佢都大我幾年 平時又冇咩兩句 應該都唔會睇得我上眼
或者有咩陰謀 想問我借錢定咩 我地兩母女山窮水盡 逼於無奈求求你借錢俾我地 賣身賣咩都得唯獨個女唔可以賣
不過最大可能真係煮多咗餸 可能今日對佢地黎講係咩特別日子 出於可憐我單身佬
我唔應該咁多疑 人地一番好心 盛意拳拳
我扮到有些難為情唔想哂咗個外賣咖哩飯 佢同我講話可以留返聽日食

我「你咁客氣我都好難推,咁多謝先」
佢「哈哈,咁轉頭我煮好我叫阿盈叫你啦」

原來學生妹叫阿盈 一個幾普通既名

我返咗自己屋企 百無聊賴咁睇咗陣電視 轉咗幾個台都無野好睇
走廊周不時都飄來飯香 佢同我既大門都打開咗所以聞到 應該都就快開飯
大概半個鍾睇睇下新聞有人黎拍門
學生妹著住短背心短褲走咗過黎 呢次係我第一次見到佢唔著校服 感覺幾清新

佢「食得飯喇」

之後我未行著緊鞋佢己經一支箭走返入自己屋 無諗過帶我入屋
我只好自己行出去打開佢屋企大門 入門除鞋講咗聲打攪哂就自己入咗屋
呢次第一次入佢屋企 成間房一眼睇哂 睡房連客廳 一張雙人床 側邊擺個衣櫃
中央地放一張幾細既飯檯 地下堆放一箱箱紙皮箱 裡面放滿雜物
佢地都搬咗成兩個幾月 仲好似岩岩先搬入黎咁 電視梳化書檯化妝檯咩都冇 連電腦都冇點做功課
開始覺得佢兩母女真係幾可憐 仲請我食飯真係點好意思 食都食得唔安落
學生妹己經坐咗係坐咗係飯檯 玩住手機等開飯
陳小姐捧住最後個蒸水蛋行出黎
總共四樣餸番茄炒蛋 蒸水蛋 炒菜心 栗子炆雞翼 加多個滾湯 真係幾好餸
滾湯唔夠位放佢攦咗係廚房 但就算係咁放四樣餸都己經好逼
我隻手避無可避都會貼住陳小姐隻手 我用右手佢用左手 但係佢無為意到
佢地兩個動也不動 兩個人不約而同都望住我 我先理解到佢地係等緊我去夾餸先
真係當到我成個尊貴客人咁 我即刻開口話打攪哂 大家食飯 我隨便夾一雙雞翼食先
隨即佢地兩個先夾飯食
陳小姐煮得幾好食 家常小菜煮得都唔失禮
人靚煮野又叻 真係一流人妻
FF如果佢做我老婆生活一定好美滿 不過加埋學生妹有啲礙事

我:「陳小姓你煮啲野幾好食啊 好入味」
陳小姐:「你咁講我就放心,仲擔心緊啲家常小菜唔知岩唔岩你食」
我:「我自己一個住, 平時食野好求其 呢餐真係好豐富,多謝你地先」
陳小姐:「張生你啱食幫手食多啲啊」
#4 2017-11-17 00:20:08 縮小字型 放大字型

突然之間學生妹插口講野 話題一百八十度大轉變
講既野完全冇連貫

學生妹:「阿媽,上次個師傅仲會唔會黎」
陳小姐:「應該唔會喇」
學生妹:「有冇搞錯啊 仲係一忽忽咁刻突 難得我地而家有間屋 」
陳小姐:「無計啊 佢地話呢啲問題舊樓係咁 同埋都己經畀哂錢佢地」
學生妹:「我唔信佢地囉 阿媽你俾人呃咗喇 下次你叫埋我同佢地講嘛」
陳小姐:「呢啲裝修野你同我都唔熟 同埋呢啲野大人講得啦」

學生妹雖然視線唔望我 但係俾說話我聽

學生妹「張生佢好似識裝修」
我一臉愕然 來唔切反應 上次同阿嬸係lift吹水嗰次學生妹全程都聽到實一實 估唔到佢記得咁清楚

陳小姐「張生你做裝修?」陳小姐乘機問多一句
我「係啊...我而家暫時做緊呢行」
學生妹:「你可唔可以幫手睇睇 係唔係真係冇得救」
陳小姐:「阿盈 唔好咁冇禮貌 人地客人係黎食飯」
我:「哈哈,好小事,我幫手埋去睇睇」
陳小姐:「會唔會麻煩到你」
我:「唔麻煩,真係好小事,我都唔知幫唔幫到你地」
陳小姐:「咁麻煩哂....」

原來呢餐飯完完全全係一個局 佢地兩母女精心設計一個陰謀 知我識裝修專登請我食飯
仲搞到我有一刻認為陳小姐係唔係鍾意我
所有野只不過都係做戲
引我入屋食飯 之後逼到我一定要幫佢地手 仲要兩個都咁好戲 表情言談咁自然
睇黎呢兩個女人唔簡單 好有機心 一唱一和到咁流利一定係長期而來所建立既既默契
唔通佢地兩個係專呃錢既慣犯 先叫我幫佢地搞裝修 慢慢愈來愈熟 幫得一次總有第二次 借錢 走佬 呃第二個單身佬
諗起都不寒而慄 女人真係好可怕
但眼見陳小姐都唔望我 個樣都好難為情 應該都有啲心虛
反而學生妹面不改容 繼續食飯好似無野咁
不過佢地真係幾窮,其實幫手睇下無咩所謂 佢開到聲我一定都會幫 有得幫女人做事展現出男人可靠一面當時好
只不過俾人做一大場戲食飯又剩始終有一種俾人搵笨既感覺
雖然都知佢地屋企可能真係太窮 逼於無奈咁做
#5 2017-11-17 23:29:05 縮小字型 放大字型

食完飯陳小姐話陪唔到我一齊睇 今日成日做完野好攰想去沖個涼先 同我講聲對唔住 我梗係冇所謂
而學生妹就自動波執檯 入廚房洗碗 仲遞支牙籤畀我撩牙 都算唔話得
佢地兩母女一直以來都應該係互相照顧對方先可以捱到而家

呢餐食到好飽 好耐都冇平日食到咁飽 搞到唔係好想郁
衰在佢地屋企冇梳化 又唔可以上人地女仔張床 如果唔係都想攤下先
不過頭先先應承咗佢地 轉頭會幫手睇 理解到佢地兩母女好慘 消咗氣都唔記得哂佢地點做戲法 諗住都係食埋健牌就馬上行去牆身度檢查 始終太夜留係女人屋企唔係咁方便

拍煙盒既時候 覺得自己好似置身於一個溫馨家庭裡面 做咗一家之主咁享受天倫之樂 洗碗煮飯留俾女人佢地做 忍唔住嘴角偷笑
突然間無端端背脊被人拍咗一下 原來係學生妹 佢握住個羽毛球拍 我無深究佢無啦啦邊度搵個球拍
雖然唔痛 但都嚇咗一跳 有一刻我有啲心虛以為佢見到我笑 識穿我既念頭

我「得喇我唔會走數」
學生妹 「你講咩呀」
我 「吓?」
學生妹 「我想講好大陣味,好臭」
我「咩好臭」
學生妹「你行出去食得唔得」
我「哦...哦對唔住」

我都未食佢就話臭 我好心幫你地手 學生妹仲要求多多 食支煙都要阻住哂 使死人啊
咁我又唔想特登返屋企 唯有行出去後樓梯食 點知學生妹嗌等埋 佢除低手套抹下隻手 跟住我走咗出去
佢對拖鞋大隻腳兩三個碼 應該係出黎嗰陣求其著咗陳小姐對鞋
唔通原來學生妹咁不良有食煙 唔知陳小姐知唔知佢食煙 知道都應該幾激氣痛心
既然一早講你都有食開咁就唔使趕我出黎喇
但又唔見拎煙出黎 斷估都想R煙食 咁佢又唔係我個女 佢品行點唔關我事 請佢食支煙無咩所謂
我係後樓梯點完自己嗰支 遞咗一支畀佢 但係佢一面大惑不解

學生妹「你俾我做咩」
我 「你唔係想食咩 唔好同你阿媽講就得 請你食我無咩所謂」
學生妹 「我唔食架」
我 「我食開係得m3 要卡碧我俾錢你自己落去7-11買」
學生妹 「妖 我係話我都唔食煙啊」
我 「咁你跟我出黎做咩」
學生妹 「𥄫住你睇下有冇走佬」
我 「我似咁冇信用咩」
學生妹 「同你又唔熟 點知你」
我 「我講過會算數既」

佢翹住手𥄫實我 我心諗使唔使啊妹妹仔你 我咁大個人唔會走女人數喇
同女一齊煲煙試過 俾控煙斷正都試過 被人𥄫住我食煙真係第一次
佢頭先又話怕煙臭 而家又係度陪我一齊吸 睇怕裝修壇野對佢地兩母女真係幾重要 著緊到咁
我一路食佢又唔講野 唔耐煩咁𥄫住我 場面一片寂靜 個氣氛都幾奇怪
如果個八掛阿嬸咁岩行過見到 都唔知點收貨 一男一細路女係後樓梯聲都唔出聲搞咩 佢著得件短背心短褲 陣間大做文章話我非禮學生妹 不過都係自己嚇自己 阿嬸呢個時間應該係屋企睇緊tvb
#6 2017-11-17 23:29:58 縮小字型 放大字型

通常我同人食煙都博吹水冇咁悶同收風 未試過相反好似而家咁無聊
所以我諗住嘗試打開話題 只不過腦裡面一時之間諗唔到同佢有咩野好講 大家唔同年齡有代溝
既然佢一貫形象係學生妹 都係行啲問佢讀書野無死

我 「阿盈你而家讀緊中幾」
學生妹 「做咩咁叫我 同你唔熟」
我 「咁你想我點叫你」
學生妹 「唉唔...是但你點叫」
我 「你未答我讀中幾」
學生妹 「中四」
我 「即係黎緊就快考會考?」
學生妹 「你唔好咁八掛啦 快啲食埋佢返入屋 成八點幾喇 你唔可以留咁耐」
我 「咁你返入去先都得既 我食埋會返入去」
學生妹 「信你都得 你唔好偷走咗返你間屋度啊 仲有啊」
我 「咩啊」
學生妹 「而家冇人叫會考架喇 阿叔」

佢笑得好奸咁擰轉頭打開防煙門走咗 隔住門仲回頭望我有咩反應
而家啲靚妹都幾串 串過我地嗰代咁多 居然叫我阿叔
得31歲就被靚味叫阿叔係嚴重打擊我既自尊心 唔想認又唔得 自己都知自己事
係細路女既世界 差1,2年己經差好遠 更何況同佢差10幾年
雖然都知佢只係搵機會專登笑下我 想報復我叫佢阿盈 咁你係叫阿盈呀嘛我無嗌錯
你係我個女 個名係我改改得難聽可以怨我就話啫 事實又唔係
聽到佢阿叔唔知好嬲定好笑 俾佢搞到冇哂癮 食剩一半掉咗落地摔幾下腳返入佢地屋

我調整表情返入佢地屋 唔好俾學生妹睇到我好介懷 扮到若無其事
陳小姐都仲未沖完涼 仲聽到花灑既灑水聲 自細屋企一屋都女人 都習慣佢地沖涼沖好耐
而學生妹繼續洗埋啲碗佢 佢唔煩住我仲好 等我可以專心咁睇牆身
我行近牆身度睇 就咁睇發霉位都幾多 上手師傅手工真係幾差 專業道德都冇 咁就起貨交場
如果係我判黎做 就算個價唔多夠做都未至於可以做到咁差
#7 2017-11-17 23:30:21 縮小字型 放大字型

當行近到佢地挨住張床既牆身位睇 無可避免要浪起腳係床邊睇 佢地張床個位咁岩係死角 學生妹係廚房睇唔到我
雖然我冇心邪 同自己講做野啫 但係正常女人係唔鍾意 一個對佢冇好感既人 男定女都好行上佢張床 見到要解釋都要費力
所以鬼祟d嗱嗱臨睇完佢 落足耳力聽住水聲 睇下學生妹或者陳小姐有冇行過來
講還講 女人張床真係好撚香 仲有佢地兩母女一齊瞓混合起來 陣女性馨香好好聞 如果定力唔夠都己經攤咗落去 尤其岩岩食完飯
個膽大咗 聞完有啲興奮 故意咁揭開少少張被睇 實在抑壓唔到好奇心
一打開 被裡面底褲 胸圍 衫褲 襪亂成一團 不過又未去到污糟程度
同我以前家姐一模一樣 有人黎就用張被遮醜先博見唔到 點會估到有人上佢張床睇野 老實講我男人一個張床都整齊佢地好多
放眼一睇 佢地唔使驗都一定係兩母女 平時都隱約留意到佢地個波都好細 所以我都分唔到邊個胸圍打邊個
只知道 陳小姐睇落真係只係一個單親阿媽 全部都係清一色bra都係白同黑bra 極為普通
無話咩著比老公睇既情趣bra 不過都有機會可能收埋咗唔俾佢個女見到
諗到呢度佢一個人頂起成家頭 要照顧個女 無咁多心機執好間房好都正常
某程度上都可以講得出佢地只係兩個典型普通既女仔女人

我驚陳小姐隨時沖完涼 大概睇完牆身 落床遮返住張被同拉平返個床單印 當冇事發生過
專注返落裝修度 目測成間房整體要救返唔大問題 扑咗幾下牆身至少冇空心 做幾下功夫 翻手搞應該救得返
師傅教落批灰想快可以用石膏粉 但就算加完 間屋雖細但再快都要一兩日 當我怕咗佢地兩母女 順便義務深入啲幫手睇埋英泥層有冇事 睇下有冇裂紋同鼓起 係既話批盪出事都幾大工程 不過手上又冇漆剷同發白水 睇唔到落去 架撐無記錯應該放咗係屋企
我走咗入廚房同學生妹講 直接話想返屋企攞架撐 佢擰轉個頭都懶就咁答聲「哦」
其實我返個自己屋企拎少少野 一兩分鐘唔使要同一個妹妹仔交代先係 隔離就係我屋企
只係講咗保定底廢事等陣陳小姐沖完涼 粒聲唔出佢地以為我走咗

行返入屋先發覺搵唔到 唉真無記性 唔記得咗前排先放返去架車度 咁樣落去真係愈黎愈似阿叔 俾學生妹講中咗
半三夜間唔落街攞啦 冇架撐唯有死死氣同返學生妹講返 佢用一副懷疑既表情同眼神審視我 問我係唔係扮野唔想幫手睇
咁我唯有解釋其實都唔使工具住 暫時目測到冇咩大問題 要搞係要哂少少時間但絕對整到返
仲專登拋行業名詞大佢「批灰」「菜膠」「石膏粉」「光油」「乳膠漆」 將我諗到既詞彙彈黎出黎 講個問題所在係邊
學生妹停哂手聽我講 其實佢應該唔知我講一大輪咩野 一頭霧水 不過佢自尊心應該幾強
扮到大人口吻「係囉」「都估到係咁」「聽過人地都咁講過」好似咩都知咁 唔識扮到識 不甘示弱 呢方面佢幾有天份
可能驚我知佢地唔識野 借機加佢地價 因為最後佢都有補問

學生妹「咁你可唔可以幫手整埋」
我「平日未必得我都要開工 你地方便係度既話 我星期六日抽時間過黎應該無問題既」
學生妹 「咁唔該哂 幾錢你搵返我阿媽傾 不過唔怕同你講我地冇錢」
我 「吓」
學生妹 「平啲唔該 你唔想我地嬲你既話 唔好唔記得你都痴咗成餐飯」佢完完全全係度發窮惡
我 「大家街坊我收好平架咋 到時完工求其係咁咦畀張利是我咪算」
學生妹 「真係?」
我 「真係啊」
學生妹 「講真?」
我 「係啊係啊 應承你」
學生妹笑住咁講 「咁好喇 最多我以後唔叫你做阿叔」
我 「咁叫咩」
學生妹「叫返張生囉 你以為咩啊」
我 「哦 哈哈 最好啦」
#8 2017-11-19 05:23:14 縮小字型 放大字型

我循例問下阿盈佢使唔使幫手洗 佢笑住話唔洗就洗完 叫我係飯檯休息下得了
我係看準佢就快洗完 同埋而家佢差緊我人情先問 斷估都唔會真係叫我洗

過多陣我係飯檯碌下手機 陳小姐開廁所門香噴噴咁行出黎 成頭濕淋淋 飄發住洗頭水既香味
成日慣咗家姐同以前女朋友 係屋企沖完涼都好隨便用涼毛巾就包著行出黎 搞到我有錯覺以為所有女人沖完涼都係咁
但只見佢著住普通白色鬆身衫短褲冇野好睇 同平時一樣化淡妝 塊面紅紅地 唔怪得搞咁耐原來抹乾哂再化埋妝先出黎
斷估知我外人係度 都要化返妝先見人
佢見到我 反應有啲羞赧 細細聲再同我講多次對唔住咁失禮 有客人係度走去沖涼 我揮手話我一啲都唔介意 大家返工辛苦都明

陳小姐拎完風筒吹住頭 憂心咁挨住我坐捉問我牆身既事 坐到咁近啲水都滴咗唔少落我隻手度
阿盈訓係床度同人傾電話 無理到我地
我將同阿盈講既野同佢重複講一次 不過唔似玩阿盈咁拋書包 儘量簡單咁講解成件事 希望講重點講到佢明

佢「本來剩係叫你黎食餐飯 叫你睇完 而家仲要麻煩到你黎幫手執」
我「其實唔止你地 呢度好多街坊知我做裝修 都有搵過我幫手 大家隔離左右 幫到咪幫囉」
佢 「但係錢嗰度 真係唔使? 錢呢啲我覺得要均真 無所謂不如照俾返你 出面咁樣執通常收幾錢」
我 「真係唔使呢 我無理由唔收其他街坊剩係收陳小姐你地架嘛 我不嬲當練下手工 唔好笑我而家我同我師傅手工仲差好遠」
佢 「你都講到咁...咁多謝你幫手先 你頭先話今個六日可以過黎?」
我 「唉係喎頭先醒唔起 要鑿野既話禮拜日唔整得 我禮拜五休息 可以五六過黎」
佢 「禮拜五啊...我地應該未必得 我同阿盈要返工同返學」
我 「咁」
佢「不如我畀條幾條匙你 你自己入黎整」
我 「陳小姐你地唔介意 我無咩問題」
佢 「有咩會介意 除非你係賊啫入黎偷野啫 你做咩無喇喇唔出聲既 唔通俾我發現咗你真係? 吓」
我 「係啊咁你都你發現 我以為我掩飾得好好」
佢「哈哈哈哈哈 你唔好引我笑」

陳小姐佢都幾講得笑 有知情識趣既一面 同呢種女人相處幾開心

佢「其實可以點叫你」
我「喔 你叫我阿文得喇 個個都咁叫我」
佢「阿欣」佢輕拍一下自己心口咁講
我 「咁我以後叫你欣姐」
我口快快衝口而出 完全出於點計都好佢大我幾年既尊重 講完都驚自己有冇講錯野 我偷望佢一眼有咩反應 佢表情冇變化 佢應該唔計較我咁叫佢
佢「好」
我「整牆身會幾污糟 呢排你會唔會同阿盈去親戚屋企住先 要去到起碼禮拜三
張床同檯我幫你做保護唔怕污糟 其他好在你地一箱箱紙皮箱 我搬過去擺住我屋企先」
佢「好啊 一於咁話 都夜喇 會唔會阻到你 今日真係唔該哂你呀 我搵埋條匙俾你先」

佢遞咗串匙俾我 同我講再見打咗聲喊路 返入關廁所門卸妝洗面 睇怕佢都返工好攰 返到屋企又要煮咁多餸
不過女人真係一刻都唔鬆懈 做女人都好辛苦 專登花多少少時間頭先沖完涼要再化妝 點都唔肯素顏 搞著自己
我都諗住走既時候 摸摸個袋 搵到一支煙出黎 係頭先原本想請阿盈請嗰支 本能反應我拎出黎諗住食
點知阿盈發現咗 二話不說係床度遠處飛個枕頭過黎 掉落地下度 同電話嗰個人講等陣先 目露兇光咁睥住我 我先醒起呢度係禁煙
做手勢同佢講唔好意思 作勢擰轉身要走人既時候 佢飛埋佢阿媽個枕頭過黎 我心諗又咩事
佢邊傾返電話 邊指住掉咗係地下嗰兩個枕頭 示意叫我執返畀哂佢 我拋物線都算輕力咁逐個飛返畀佢 飛中佢個肚應一應 佢嗌咗聲「喂」
我扮聽唔到走咗出去後樓梯食埋支煙 經過今日同佢兩母女關係進一步親近 開始可以嗌佢地個名
#9 2017-11-19 05:23:42 縮小字型 放大字型

如是者過幾日禮拜四晚同佢地講完再見 大概互相交帶一下 佢地簡單執咗啲野去佢阿哥淘大花園度暫住
禮拜五六我做咗免費勞工 咩幫其他街坊裝修係有 不過最多都係打個折 唔似而家得封利是仔
我落去同地下同保安 同埋阿嬸幾家人隔離左右單哂聲通咗天先 廢事等陣有咩投訴
阿嬸佢聽到我話幫阿欣佢地裝修 話未參觀過佢地間屋 仲拖埋另一個師奶一齊跟咗我入去 公屋啲人係咁多事
初期佢地見到牆身溶溶爛爛 異口同聲咁戥佢地兩母女慘 誇獎我有義氣
之後話題轉咗去又問我幾時可以有期幫佢個仔間屋裝修 我耍住佢答話你買咗樓先
佢話快喇 岩岩個佢地入咗票紅磡新盤 貪嗰度校網好 佢有啲微言埋怨佢新抱其實係想近娘家多啲
明明之前有個中西區都唔明點解唔要 中西區仲近佢個仔返工 嗰度校網都唔差 話佢新抱好自私
師奶B又附和佢 話自己嗰個新抱太完美 唔係好鍾意佢 我心諗完美都有錯 人總唔搵野挑剔下都唔安樂
講講下佢地七嘴八舌自己圍內傾是非 我話怕油漆撻落地會整污糟佢地 佢地先肯走話都晏 係時間落街做運動
阿嬸話佢地做完運動會食下午茶 問使唔使幫我買埋外賣 我諗佢極力想討好我第時搵我幫佢個仔 我都係婉拒咗佢 廢事轉頭又上黎煩我

趕走咗佢地之後 我幫佢地鋪哂保護墊先 佢地張被早就褶好哂 衫都冇亂放 雖然佢地應該唔知我知佢地秘密 只係睇黎佢地走之前都有防範 驚比我發現 所以我剩係索咗一索佢地張床當補償 醒神啲就開工 塗發白水鏟底 成幅牆撥咗層舊灰 就咁睇應該英泥嗰層無事
佢地屋企細都有好處 裝修嗰陣可以快手啲搞掂 批灰上埋油一兩日整哂 而啲料我係其中一個客嗰單野到偷啲過黎用
隻面油色係阿欣揀畀我 佢嫌舊隻色太深
油完之後最大問題係陣味好重 我放咗幾碗醋係地下 等陣味可以兩三日內快啲散哂佢

到咗下個禮拜三夜佢地返咗黎住 阿欣阿盈佢地都對手工好滿意 好感激我幫手 封咗象徵性20蚊利是俾我
問我禮拜六得唔得閒 話點都要請我食多餐飯 我應承咗佢地
禮拜六朝早我行過撳佢地門鐘 想問佢地今晚幾點食 可以預下時間返
「黎啦」一打開門阿欣己經換哂衫 化咗淡妝 同平時一樣咁靚 打開鐵閂笑容滿面同我講早晨

佢「咁早既」
我「係啊早晨 無我想問今晚係唔係食飯 有冇話幾點」
佢「你預啊 大概7點幾囉差唔多 唷你行過黎幾步路好快啫」
我「咁好啊」
佢「你黎到岩喇 問定你先 今日食炒飯好唔好 得我地兩個 阿盈佢出街」

心諗唔通佢真係咁現實呀嘛 辛辛苦苦幫完佢地先得個炒飯食下 唔出街食都至少學上次四樣餸啊

我「我都講過我咩都食 無咩所謂」
佢「有你咁講就得啦 7點啊記住啊」
我「一定 係喎阿盈佢仲訓緊啊?」我多口問咗句
佢「係啊 佢星期六日唔使返學 個衰妹次次都訓到十點幾」
我「後生女係咁 太陽照住都唔知醒」
佢「我平時返工慣咗咁早...其實...己經慣咗...如果唔係我都會訓得好晏 」
我 「我都慣咗喇 唉人大咗想訓耐啲都會自己醒」
佢「仲有冇其他野搵我」
我 「無喇 今晚見」
佢 「Bye」

講完之後佢閂埋門當時一刻我冇理解到佢講呢番說話既用意 語氣變得好平淡 只隱約feel到佢有啲唔開心
#10 2017-11-19 05:24:39 縮小字型 放大字型

到咗夜晚搵佢 而家我己經好似熟客咁自己打開鐵閘大門入佢屋 間屋得佢一個阿盈出咗去
佢著住同上次一樣既圍裙 心情幾靚 好似又冇咩野 可能朝早係我多心 個炒飯同湯一早整好哂 好歡迎拉我入去廚房幫佢手
佢話佢屋企張檯實在太逼 今日不如拎埋啲飯同湯去我屋企食 想搵我幫手端啲碗碗碟碟餐具過去
我聽到有啲緊張同興奮 呢排我去得佢地屋企多 呢次係佢第一次調返轉黎我屋企坐 之前未邀請過佢地黎
我開咗屋企對門 太暗打開燈 一入門口佢微微鞠躬講咗句 唔好意思打攪哂黎食飯

我「唔使咁客氣喎 都冇其他人」
佢 「要既」

我地set好哂啲野鋪完張檯 食野之前佢話間屋好大想參觀下 我帶住佢繞場一周
經過我間房嗰仲話同想像好大分別 以為我一個人住啲野會好凌亂 我差啲講出口話冇你地咁亂
佢仲講笑話不如想同我交換間屋 呢度有電腦 電視 書檯咩都有 佢地咩都冇 我一支公唔使住咁大 我笑得好尷尬
佢拍拍我膊頭話講笑啫唔使咁認真 電腦 書檯係有 不過仲放係阿哥屋企冇時間搬過黎啫
行哂之後我地坐低開住電視食飯 不過我地基本上冇睇電視都係傾計多
終於知點解佢話煮炒飯 佢嗰日式醬油炒飯好鬼惹味 忍唔到添多咗碗

佢「嘩好唔公平喎 點解你一個人住到咁大既單位 我地細你咁多」
我「你咁講架 以前呢度我同家姐 兩老一齊住 先分到4人單位」
佢「佢地搬哂出去?」
我「我老竇前年走咗 個死人家姐幾年前結婚搬咗出去住 佢同我姐夫要返工無時間睇住我兩個侄 搵我阿媽搬埋過去湊」
佢「做咩咁叫你家姐 你地關係唔好架?」
我「冇 叫慣咗啫 我同佢關係okay既 剩係講我 講下你啦 你有幾多兄弟姊妹」
我 「7個 我己經係最細嗰個」
佢「大家庭喎你地 你最細個個都最鍚你」
我 「大家庭都有大家庭唔好架...」

佢好似有啲唔想講呢個話題落去 靜咗落黎 要轉一轉話題先得
望住電視睇tvb啲節目 睇下搵唔搵到話題講下 而家啲新既藝人冇個識都唔知有咩好講
佢見我望都擰轉頭陪我望咗陣電視 但好快冇咩興趣擰返轉頭繼續食飯
我諗起雪櫃前排買咗打藍妹 本來諗住禮拜日睇曼城用 問佢飲唔飲酒架
佢話唔太識飲 驚飲完亂講野 我答佢剩食飯都好悶好寡 飲少少啫唔使死反正隔離就到屋企
最後佢都被我說服咗 叫我唔好笑佢 佢飲完酒塊面會紅晒塊面好樣衰 我保證一定唔會笑佢
我去廚房拎咗個杯畀佢 開一罐藍妹幫佢倒 要幾多自己嗌停 升到上三分一佢嗌停 其餘既我自己飲返
同佢乾完杯 好斯文咁逐啖逐啖咕嚕飲落去

我「你煮既野真係好好食」
你 「呢個我唔會謙虛喇 好細個己經開始煮野食 你講得出我都識煮」
我 「麻婆豆腐呢?」
你 「識啊 點解你要問麻婆豆腐」
我 「冇 我自己鍾意食咁解」
你 「下次我煮俾你囉」
我 「多謝先」

咁講法下次仲有得食佢煮既飯 照住條路走分分鐘有得發展落去
諗起都開心 呢度初頭都好地地 只見佢愈飲愈醉 塊面開始紅 飯都食得慢咗
#11 2017-11-19 05:26:09 縮小字型 放大字型

佢 「點解你唔提我」
我 「提你咩」
佢 「提我今日餐飯係黎多謝你 多謝你幫我地兩個手裝修 冇你係度我真係唔知點算」
我 「好濕碎啫 手板眼見功夫」
佢 「點解你要幫我地」
我 「一場鄰居 幫到咪幫囉」
佢 「我覺得你呃我 我知你一早知嗰日請你食飯係做戲想搵你幫手 我啲戲咁假 點解你仲肯幫我」
我 「我覺得你地...」
佢「覺得我地慘 想可憐我地」我未講完俾佢打斷咗
我 「我冇咁覺得 你醉咗喇唔好飲喇」
佢 「點解你覺得我醉咗」

佢塊面完全漲紅哂 己經放低咗對筷子冇再食炒飯 係咁飲係咁飲唔顧女人含蓄形象
用陰聲細氣既聲 窮追不捨咁追問 成個人變咗呢一個人咁 定呢個係佢本身性格 充滿疑問內心好不安
咁多「點解」俾佢盤問到好疲憊 佢一隻手托住腮 另一隻手用手指撥弄個杯 又輕彈又打轉
無端端佢帶傷感語氣吐出一句 泛起淚光

佢 「你知我單親阿媽黎架可」
我 「隱約都有少少感覺到」
佢 「你係唔係覺得我一個老女人 帶住個女 好慘 好慘想可憐我地」
我 「我唔覺得你老 你仲好後生」
佢 「唔覺 咁點解上個禮拜 上個禮拜你叫我咩欣姐 今朝又 又話我早起身唔再係後生女 我大你幾年啫應該」

佢輕力用拳頭鋤我心口一下 鼓起個嘴 女人真係記仇...原來佢一直記住心裡面 上個禮拜件事我都唔記得哂 佢記到而家
我懷疑自己觸動咗佢個神經

佢 「你估下我而家幾歲」

咁敏感既問題都唔知點答佢 我開25先 佢雙手托住腮 眼神呆滯望住前方 擰哂頭冇望我 28 又擰頭 30又擰頭 一歲一歲加上去
直到33佢冇再擰頭 但又唔出聲應我 又靜哂 咁樣我都心知答案 之前仲一直以為佢係35 當然呢個直覺 死都唔可以同佢講
佢又再問我返而家幾歲 我答話31 佢話唔信 要我拎張身份證俾佢睇 睇完佢數手指默念陣半分鐘先計到答案
真係醉得幾交關 後悔咗早知唔叫佢飲酒 而家點收貨先好
佢成個人自暴自棄一樣 自言自語

佢 「個個都覺得我老 同事 屋企人 朋友 而家連鄰居都覺得」
我 「我冇啊...真係架」
佢 「好殘而家我 又多斑粒 33歲...」
我 「你諗多咗 我都睇唔到」
佢 「你敢唔敢錫我 你覺得我唔殘」

佢放低雙手本來望實我 慢慢隻眼合下合下想瞓咁 屌我心諗由佢喇 我都開始wing wing地 唔理咁多 被佢一直問都煩到死
一野鍚咗落佢塊面度 錫完左面到右面 又錫返左面 佢冇畀反應 好柔軟佢塊面呢個係真
#12 2017-11-24 06:39:40 縮小字型 放大字型

錫得㷫起 錫到落去酒窩位就停一停 我抽返起個人 望下阿欣有咩反應 成個人依然呆滯失魂咁 眼晴合下合下 應該連我有冇錫落去都唔知
飲完酒色心起上黎有啲唔夠喉 吞咗啖口水 借住酒膽諗住睇下可唔可以錫埋落個嘴度尾齋 之後先叫佢起身
猶疑咗陣唔知上唔上好 錫嘴個風險大咁多 不停去諗阿欣講嗰個「錫」字範圍去到幾大 可以包括好多地方
只要殘既地方都計入去 我挨近啲睇佢個嘴唇 輕力擦走唇膏 睇下有冇乾裂起死皮 到時錫完都有藉口兜到 點知又冇 岩岩先到10月中 中秋節先過完無耐 佢本身又唔似皮膚乾燥嗰種膚質

仲係度猶豫不決之際 佢個身抖動咗一下 眼簾半垂 醒返個樣好唔舒服 意識返緊黎 佢用兩隻手遮住扭曲緊塊面 問我有冇地方攤低透下
隻手搭住我膊頭去咗梳化攤低 我閂返電視等無咁嘈 佢好辛苦咁蒙住塊面輕聲呻吟
對住我做口型講個水字 想叫我斟水畀佢 我用我隻杯斟畀佢 點知佢鬆開左手望一望 問有冇第二隻 唯有我再去搵第個二杯畀佢
唔畀仲由自可 斟完畀完佢仲辛苦想嘔 話個頭好暈唔知廁所係邊 佢坐起身搭住我膊頭由我扶佢行過去
去到廁所佢想踎低之前 我本來幫佢拍背睇下會唔會好啲 被佢拒絕咗話好肉酸 講聲唔使推我出返去遠啲等 壓到啲聲好細聽都唔聽唔到
閂埋門幫佢開抽氣扇之後我係梳化一路等 隔咗兩三分鐘陣佢係裡面問我而家幾點 阿盈10點就返 我答9點3左右 阿欣話聽唔清楚佢我講多次 講完佢話叫我執住野先

佢叫到我嗱嗱臨執野洗碗 剩返啲炒飯我包保鮮紙放落雪櫃留聽日食 個味噌湯無計其實唔太岩我飲唯有倒咗佢 廁所阿欣估用緊我唯有等陣佢出黎先倒落馬桶度 差唔多執哂野 洗哂啲碗過左陣坐返去梳化 開手機睇下 佢又係裡面嗌出聲 搵我幫佢係飯檯拎佢嗰部Z3畀佢 想睇下whatsapp 我攞完過去敲一敲門 佢匿係門後伸隻手打開少少隙縫 就咁攝完畀佢 講聲唔該又閂返 大概5分鐘之後 佢沖完廁自己腳步蹣跚咁走近黎梳化 個樣都有啲唔舒服不過面色好咗啲 想行過去扶佢 佢話唔使 淨係叫我坐出啲 拎走咗個遙控放係茶几度 我郁一郁前完阿欣塞個頭窒落去後面 個鼻貼住我後腰位 佢伸直隻腳係我後面打側身 嘔完佢講野清醒咗好多 一黎就緩緩彈句

佢 「你要去沖涼喇 好大陣汗味」
我 「轉頭我去沖」
佢 「頭先搵唔到第二隻 用咗你個牙杯浪口」
我 「無所謂 你見點有冇好啲」
佢 「把口浪完仲好臭 唔好擰過黎」正當我想擰轉頭睇下佢 佢立即反應到舉起一隻手扶正我塊面唔畀我擰過去 之後放返低
雖然答得九唔答八 不過起碼好過頭先場苦難好多 起碼己經冇再係咁問點解
我 「使唔使浪多次 我扶你去廁所」
佢 「唔洗喇 攤多陣走 而家幾點」
我 「差唔多答半」
佢 「可唔可以答九叫醒我 如果我唔小心訓咗 唔該」
我「好啊」

閂完電視機之後 大家默不作聲靜落黎 呼吸聲又細 靜到連樓下啲人打籃球拍波同叫喊聲都聽到
我望住兜湯想倒落去廁所 最慘又行唔開 阿欣背住我成塊面貼埋黎我唔郁得 我又唔敢擰轉頭睇佢有冇瞓到
就係咁張開眼固定咗個姿勢15分鐘 期間拎咗兩支煙出黎食 夠鐘嗰陣我細細聲叫佢夠鐘起身

佢「嗯 頭先瞓唔到」冇瞓又唔早講唔出聲 早知我頭先去個廁所

阿欣坐起身撥直返頭髮 整下條褲 望望個鐘 叫我啲碗碟可以聽日朝早先拎返過去畀佢
雖然塊紅面仲係好紅 但己經無咁暈可以行得到了
佢行過去飯檯停低諗咗陣 隨手拎起一個籃妹空罐 見到咁吓唔係又想仲飲嘛 我頂唔到第二次
又唔係佢只係搖個罐幾下 問我可唔可以飲埋淨返幾啖 佢話想拎走個罐返屋企 唔知想用黎做咩
我無理咁多一口氣咕嚕飲哂 遞咗畀佢 佢著住鞋講唔該 仲叫唔好等陣行出去 最好聽朝朝早先行出去倒垃圾 順手倒埋其他空罐
我同佢講再見 點知佢冇應我直接行咗出去 到底而家我地係咩關係
#13 2017-11-24 06:40:14 縮小字型 放大字型

第二日禮拜日我一朝早八點幾走去倒垃圾 倒完行去阿欣佢地度拍門
本來以為阿欣己經起咗身 敲咗陣門冇人應 廢事嘈親佢地
行落街買大快活早晨 買咗3份吉列魚柳餐外賣 飲可樂加火腿通 諗住等陣佢地起身可以搵佢地一齊食
藉口都諗理 一於話多謝佢尋晚餐晚飯 要回禮請返佢地 希望可以善用呢個受完禮再回禮既輪迴
買完行返上去 佢地都仲未開門 阿欣前排講過話佢地要開住門對流先夠通風 所以時佢地留係屋企嗰陣都會開住門
如果佢開咗門代表佢地是但一個起咗身 我係屋企食住嗰度餐等佢地
到咗十點半左右終於聽到佢地開門聲 我部咗5分鐘先再行出去等冇咁明顯
我一行過去佢地門前就見到阿欣己經係檯度食緊麥片 我揚手叫佢過黎 佢望一眼身後仲訓緊既阿盈 著住拖鞋閂埋門行出黎
神色精神飽滿 化好妝 一啲都唔似尋晚飲完酒 不過對住我冇咩表情 唔似平日都笑盈盈咁

我 「你見點呀」
佢 「無咩野 訓到好淋十點幾先醒 做咩野」
我 「尋晚啲碗仲係我度....」
佢 「係喎唔記得咗 我過黎拎」
我 「唔使我轉頭拎俾畀你 尋晚嗰餐多謝你 我頭先買多咗兩個早餐你地食唔食 做緊特價買多咗」
佢 「唔洗喇多謝 我整咗麥片」
我 「阿盈食唔食?」
佢 「佢仲訓緊 星期日我地都食麥片 佢應該唔食喇 仲有冇其他事搵我」
我 「你等陣有咩搞」
佢 「同阿盈落街打羽毛球 仲有冇其他野」
我 「樓下今日轉咗新密碼 你收到通知架可」
佢 「之前收到 如果冇野 我仲未食完早餐」
我 「無喇...咁我拎埋啲碗畀你」
佢 「唔該」

佢對我反應突然冷淡咗好多 感覺都幾強烈明顯 係咁好似想打發我走咁 唔想傾落去
我尋晚係唔係做錯咩野 唔通佢尋晚有意識知道我錫咗佢嬲咗我 同埋俾我睇佢到飲完酒醜態而尷尬
但係明明佢嘔完之後都無咩野仲好地地 仲提我去沖涼 訓咗梳化後面 如果係嬲我一早返咗屋企
隔咗日可以變咗咁多 完全冇路捉 女人真係好難捉模 完全唔知佢諗緊咩
佢閂埋門企係門口出面等我 個氣氛鬼鬼祟祟咁唔想俾阿盈見到我咁 我入屋拎返啲碗出黎畀佢 佢平淡咁講聲多謝就折返入屋
好難唔去在意佢短短一日既變化 明明仲以為可以借餐飯耐晚關係再親近啲 點知仲疏遠咗
晒埋兩個早餐 我頂籠食到多一個 好濟太飽另一個我送咗畀阿嬸佢食

晏就我揸車過去荃灣探家姐阿媽佢地 落到樓下打畀家姐問佢係唔係屋企 確認咗之後上咗去佢度坐
一入門口兩個侄仔加隻哥基就衝出黎歡迎我 兩個細路扯住我隻腳入屋 死都要我陪佢地玩
阿媽見到我就問我幾時帶女仔返屋企畀佢過目 我敷衍答佢話有對象快喇
而家同阿欣既事十劃都未有一撇 更何況佢啱啱先仲嬲緊我 都係冇講咁多
#14 2017-11-24 06:40:56 縮小字型 放大字型

家姐同姐夫啱啱全部人食完午餐 係客廳睇緊電視 我行埋去飯檯一齊吹水 侄仔佢地係側邊自己玩ipad 而阿媽返咗入房休息
我由細到大都好佩服家姐 佢大我兩年 俾佢耳濡目染到好祟日
以前佢中學讀書差到極點 買YES睇學染髮追明星 日日掛住玩icq溝仔
最後結局當然係會考得3分 但佢既心態覺得有3分己經好滿足 諗野好樂觀
佢試過一腳搭兩船 聽住佢講電話講到係男仔既錯 自己先係受害者好理直氣壯係咁喊 喊到嗰男朋友都原諒佢 覺得係自己錯唔夠關心佢
我以前用icq溝女都會問佢意見 咩造型 對方星座性格係點 都係佢指點我 雖然後來先知佢既技巧同YES裡面寫既野一模一樣
家姐佢讀完ivy出黎係旅行社做野 一皮野都冇 唔知點解死好運經朋友介紹 識到而家我既姐夫 拍拖拍好耐結埋婚
姐夫考咗會計牌搵到下錢 個人又穩重成熟 年紀大家姐幾年月講野好風趣 好男人一個我都為家姐開心 可以脫離公屋走進私樓
佢兩個關係好融洽溫馨 住私樓 而家一年去兩次日本旅行 一次台灣 近排煩緊兩個仔入幼稚園既面試
我一路想搵機會單獨問家姐意見 傾訴下點拆阿欣單野 但全程都係聽佢同姐夫講上嗰次日本有幾好玩 大阪城有幾靚 章魚燒有幾好食 叫我下次真係要去一次
得佢地講冇我講 每次想插口講野家姐佢都會「你聽我講先 日本真係...」完全無理過我感受 一味聽佢講講講
差唔多講到4-5點 臨走先關心我幾時帶女朋友返屋企 話阿媽好擔心我
明明我一路正題都係想問溝女佢又一直阻住我 我略略講話識咗條30幾歲既女人想同佢發展下 但無提起阿欣係單親媽媽仲有個女
家姐佢畀咗係日本買既保濕面膜我 叫我送畀阿欣 話如果個女仔話皮膚差送呢個最好
叮囑我呢次一定要成功 如果唔係阿媽己經構思緊經親戚同我介紹個大陸工廠女仔
個女仔好鍾意劉德華 一直都想要黎香港住 老公年紀不拘 有正職有地方住就心足

拎完個面膜走咗之後我食埋晚飯黎去屋企 一到步就直接行去阿欣屋企按門鐘
阿欣打開門 著住家常裝 見到係我個樣依然同朝早一樣冇咩表情

佢 「做咩」
我「冇 我個家姐唔知點解送咗個係日本旅行買既面膜畀我 問我有冇人要 我自己男人唔岩用 睇下你要唔要」
佢 「點解送個面膜畀我 係咩意思我唔明」
我 「er....用完呢隻面膜皮膚好啲 呢隻野幾好架電視都有賣 我家姐試過唔錯先再買」
佢 「咁我收咗佢 幾多錢我畀返你」
我 「話明送既 唔使錢梗係」
佢 「多謝」
我 「岩用下次我再叫家姐買」

佢拎完就即刻閂返門 我唔可以睇唔到佢表情係點 不過唔使睇樣應該都好開心 學班fd話齋有邊個女人唔鍾意禮物

我臨瞓10點幾 開部手機睇 一入介面就收到阿欣既whatsapp
我本身有兩部手機 一部開工用 另一部收工用 一收工同六日就會熄開工嗰部 以免被人轟炸 係得星期日臨瞓前先會開返睇下啲客有冇搵我
開工嗰部因為上星期幫手裝修阿欣加咗我 私用收工嗰部冇加過 遲下仲會有機會 我而家自己無啦啦就走加佢好唐突
打開同佢whatsapp既message睇 只見佢cap咗張淘寶網既圖畀我 圖中係我頭先畀佢嗰隻面膜連價錢 人民幣成400幾蚊
張圖下面有段野 係兩個鐘前send過黎

' 係唔係呢隻'
' 係' 我覆返佢

隔咗5分鐘佢覆返我 估唔到佢咁夜仲未瞓 一睇只見一個okay emoji表情就無下文了
我真係R哂頭 到底係咩意思 我完全理解唔知佢咩意思 心諗可能佢只係網上查下價錢啫 見到咁貴好感動好想多謝我掛 無在意到去咗訓
#15 2017-11-24 06:42:19 縮小字型 放大字型

第二日朝早返工例牌係lobby撞到阿盈 佢而家進化到會主動同我打招呼 幫完佢地裝修真係唔同哂 一下子地位提升咗好多
同佢傾計起碼會答我野 放低部手機 唔再係一句起兩句止
而家已更了解佢啲野 佢讀緊康盛花園間中學 九月嗰陣搬過黎一開始就唔到時間
好早就出門口 要坐巴士上山 慢慢直到而家掌握到遊走遲到邊緣既返學時間 唔怪之得佢頭一個月冇見過佢 佢仲好自豪未遲過到咁耐都
佢仲苦苦央求 問我講畀屋企wifi密碼佢 佢屋企冇router 部手機又得3G收得好差
話就話係阿欣搵佢幫手問我 計我話根本佢自己想要
不過呢啲野好閒 我講畀佢知叫佢抄低 我個密碼廢事改直接設定用放工手機嗰電話號碼
佢set咗個密碼落手機之後多謝我 成個人樂不可支 笑容滿面 而家啲學生妹真係冇wifi生存唔到
我本來想問問佢知唔知佢阿媽點 但諗諗下覺得呢啲野都係大人既事 無謂問佢

夜晚做完一日野 我本來諗住熄部開工手機 突然間收到阿欣既message 好緊張咁即刻開黎睇 就係簡單一句

'收唔收到'

我不明所以 心諗收到咩 唔通佢回禮送返禮物畀我
但又唔好意思行過去問佢 淨係覆佢

'收到咩'

得咗成晚都冇覆我 明明己經藍tick咗 屌啲女人可唔可以唔好吊人癮
係憎我就直接講 咁我都可以知難而退 大家頂多做返點頭之交點鄰居
難得而家佢而家走進我既生活 對佢又有好感 嗰晚聽到佢言語中既寂寞不安 作為男人都想保護佢
但而家講啲唔講啲 完全唔知佢呢句野係咩意思
足足要等到我禮拜四 過咗3日打開地下大堂個信箱先發現到
裡面除咗銀行信同一啲單之外 奇怪的係放咗400幾蚊係度 第一眼見到以為邊個派錢咁好
我企係信箱前 諗咗陣先諗到呢400幾蚊 同面膜佢send畀我睇張圖個淘寶一樣
一早講過唔收佢錢 而家佢死都要畀返錢我做咩 又唔親手畀我特登經郵箱俾我 同埋佢地家境咁拮据 仲要拎400蚊出黎都好困難
無理由要拎女人既錢 我塞返啲錢落去佢個信箱 佢個郵箱連住係我郵箱右邊
點知第二日我再開個郵箱睇 啲錢又放返係我度 我當場開whatsapp覆返佢

' 個面膜係手信禮物黎 真係唔使畀返錢我'

阿欣又藍tick我睇完冇回覆 開始意識到佢可能嬲咗我 但係嬲咩完全無頭緒
佢禮物照收 錢要又堅持要畀返我 要分到咁清楚 唔要大不可以退返畀我 我最多拎去畀阿嬸用
我好想當面畀返錢佢 敲佢地門 佢唔知點解冇咁既勇氣 知道佢逃避緊我
如果唔係佢早就大可以直接過黎我屋企畀返錢我
當晚我實在忍唔到訓唔著 煙都食唔落 半夜三間上discuss女人心事頻道踩上去問班女人意見 將我同阿欣相識既過程打出黎
點知第二朝一睇 班女人就算我己經專登刪減咗錫阿欣既情節 班女人仲可以屌我借酒行兇 問佢地都哂氣 諗諗下得一班人可以幫我手
#16 2017-11-24 06:42:34 縮小字型 放大字型

禮拜五我冇工開 全日漫無目的地揸車周圍兜 諗緊都諗唔通
以前溝女無一個係咁 岩就一齊 唔岩就理都唔理你
會唔會阿欣係單親媽媽例外啲 成世都從來未接觸呢種女人
夜晚約咗以前做跟車識嗰班FD今日去德福篤波 順便問佢地意見
以前大家都仲未有女差唔多每個禮拜返上去揼邪骨唱K過夜 而家佢地個個結哂婚 全部收心養性 轉咗間唔中幾個月先一齊上去一次
佢地對女人好理解 係group到笑我同講上討論區問女人野冇用 就算講到現實 女人邊個會去幫第二個女人搵幸福 唔講是非己經偷笑
揸車過去一見面就譏笑下對方 問下返工點 屌一個人做三個人既野點做 呻幾時出花紅 想幾時辭份西工 一齊搵啲生意搞下 次次黎黎去去都係傾呢啲
落到場打到二十幾度 大家飲住野食煙 我將來龍去脈同佢地講一次 由第一日阿欣佢地搬過黎 到放錢落我信箱既事鉅細靡遺講一次
打咗成兩粒幾鐘到mark鐘之前大家係咁傾為我分憂 得出結論阿欣應該係黎m 唔使太上心 經期飲咗酒皮膚會變差 對身體好傷所以先會唔開心咁多日
叫我想同佢發展 繼續送多啲送野畀女人就得 珠寶香水首飾化妝品呢幾味是但一樣都好 30幾歲既女人都係鍾意呢啲野 唔會有例外
唔使特登花時間諗佢地諗緊咩 箋哂自己時間 班女人都唔知自己諗緊咩其實 聽完又講得幾有道理 呢次我無輸都幫佢地畀波鐘當多謝
打完波大家講實咗下次上去水立方嗰期就分道揚鑣 但老實我個人覺得阿欣係啲無咁膚淺既女人 淨係鍾意珠寶 見佢著衫都唔講究
我同佢又唔係真係識咗好耐 唔知佢實際鍾意啲咩 唯一我諗到我可以問既得阿盈 佢係阿欣個女應該最清楚

我同阿盈佢既撞到機會通常都係得朝早返工返學時間
當然我可以主動夜晚或者六日拍門搵佢 但阿欣都好大機會會係度 撞見佢會好尷尬唔知講咩好
同埋無啦啦走去搵一個學生妹都好奇怪 我同佢都冇兩句
唯一只可以引蛇出洞 等佢自己黎搵我 方法有一個保證萬試萬靈
禮貌六我知阿盈係屋企 所以我係router度扯條光纖線出黎 等個wifi冇訊號
不出所料 唔使5分鐘佢氣沖沖走過黎拍門
#17 2017-11-28 02:36:38 縮小字型 放大字型

一開完門俾佢 阿盈手揸住部手機 個樣心急到死 氣急敗壞
唔講仲以為我差佢錢 佢只著住件著心短褲就衝出黎

佢「做咩事個wifi 點解用唔到」
我「壞咗啊 我而家整緊」
佢 「點解係要禮拜六先黎壞」
我 「部野係突破要壞 我都唔想架」
佢 「咁仲要整幾耐啊 我急用啊」
我 「你入唔入黎坐陣先 無咁快 我share住畀你先」
佢 「快啲喇」

好心借個wifi 而家真係好似我差佢錢咁 啲語氣差到又西 同講粗口無咩分別
我打開門畀佢 話說呢次輪到佢第一次入我屋企 不過佢好似唔四周圍關心
行入屋直接搵張凳就坐咗落去低頭望住手機 唔講仲以為佢睇緊咩重要網站 原來只係上緊facebook睇野
不過佢上緊咩唔關我事 最緊要佢而家入咗黎 我要搵呢個機會套佢料 但要講既野要好小心 諗清楚先好講
我總覺得阿欣唔想阿盈知道我同佢既野 如果唔係嗰日佢唔使專登拎個空罐返屋企扮自己飲酒
呢個係我呢幾日先諗到當中玄機 單親阿媽唔多唔少都會顧住自己仔女感受
阿盈己經16歲 平時見佢都算過得開心 應該都唔希望再改變現狀
呢個我都可以理解 特別係嗰日我地孤男寡女係間屋度去飲酒 阿盈知道咗點都會有啲介意
我扮整緊個router佢開口問我先 呢個真係估佢唔到

佢 「喂」
我 「做咩」我拎住個螺絲批扮整緊個rounter 實際上插返條線就得 做戲做全套
佢 「你係唔係畀咗個面膜我地」
我 「係啊做咩」
佢 「仲有冇多啲啊」
我 「你要黎做咩」
佢 「用囉 仲可以做咩 有冇啫」
我 「有冇咁快用哂」
佢 「呢隻好用呀嘛 啲大人佢地都用呢隻 啲同學都好羨慕我有
如果你冇就算啦 快啲執返Wifi佢先啦呢個急啲 禮拜六啊今日」
我 「有我再畀你 可能要兩三個月後 你可以自己買都得啊」
佢 「我地邊有錢啊 你又唔係唔知 我仲係讀緊書」

佢講到好燥講得都幾大聲 好似覺得我明知佢地身世仲要問 不過我真係幾佩服佢可以自認窮

我「講明手信 有我再畀你喇 唔會收你地錢」
佢 「我信你架喇 唔好呃我」
我 「話時話 點解你阿媽唔用個面膜」
佢「唔知 淨係問我要唔要想唔想用 佢用唔著 我就拎咗去用」
我 「你阿媽有冇話鍾意啲咩」
佢 「做咩咁問」
我 「冇 我問下啫」
佢 「唔會無野 你點解要咁問」佢好大戒心 想知點解我問既用意
我 「冇 你唔好同你阿媽講返 上次咪幫你地裝修 我將你地啲紙皮箱搬過黎既時候 有箱野我以為係垃圾 我唔小心掉咗」
佢 「點解你可以咁唔小心架 係邊一箱 有冇再搵多次」
我 「聽你阿媽講 好似係佢鍾意既野 你知唔知係咩 我想去買返」
佢 「阿媽有睇開小說囉 買咗好多本係屋企」
我 「有冇話係睇開咩小說」
佢 「愛情嗰啲囉 以前有睇個叫亦舒 而家唔知 我細個會同佢一齊睇 而家冇lu」

我諗緊邊Q個叫亦舒 完全無睇小說既習慣 出黎做野之後除咗報紙真係冇咩機會接觸文字
不過呢個真係好好既情報 估唔到阿盈原來咁有用 不枉我自編自導整壞個router引佢出黎
但佢真係好蠢 整唔見箱野都可以信 明明裝修嗰陣時己經交收哂啲野 阿欣完全都睇過清清楚楚 阿盈佢都仲可以信我講既野
#18 2017-11-28 02:37:22 縮小字型 放大字型

我 「你唔好你阿媽講 我想靜靜雞買返」
佢 「得喇 你快啲整返個wifi先喇」

我用個身遮住佢既視線 輕力插返條wifi線 然後同佢講返整好咗
佢用手機check完有返wifi 唔理人就直接行返去自己屋企
佢走咗之後我開電腦查下邊個亦舒 查完wifi先知係個女小說家 都出過唔少愛情小說
著衫出街去新都城間中華書局 未行過呢啲地方 搵咗好耐都搵唔到 最後搵咗店員幫手先係文學架度搵到亦舒既小說
隨便拎咗兩三本上手睇睇 睇唔夠幾頁就放棄咗 直接畀錢走人算 連會員申請都無搞
係唔係女人先鍾意睇呢啲愛情小說 又悶又唔實際 阿欣都33歲都仲鍾意睇愛情小說 對愛情有憧憬
我等到夜晚先再敲佢地門 阿盈逢禮拜六夜晚都會出街
阿欣佢打開門 我仲以為會好尷尬 但我唔知邊度黎既勇氣 連門面野都唔想講多句 爽快啲單刀直入算

我 「你買咗幾本書 想送俾你」
佢 「多謝」

佢睇一睇個封面收入懷中 阿欣既爽快直接真係搞到我嚇咗一跳 我一樣門面野都廢事講多一句 連我送咩書都唔問就要咗
就咁就收咗佢 搞到我塞機咗幾秒 反應唔到唔知點講落去 我格硬都要講落去 而家再唔講以後真係搵唔到機會講

我 「本書係愛情小說 唔知岩唔岩你睇」
佢 「你又知我鍾意睇」
我 「咁...我都係估下 行過經過買咗幾本你要唔要」
佢 「呢幾本我有了...」
我 「咁...er....」
佢 「你都買咗囉 都無得退返 你送畀我我照收囉」
我 「可唔可以老實講 你係唔係嬲咗我 點解我送咩畀你都照收 我知我嗰晚做錯咗 唔應該請你飲酒 我想同你講對唔住」

其實諗深一層 我講得好戇居 我送咩佢都照收根本係件好事 只係因為成件事好奇怪 佢咩都收照又問兩句都唔問 完全唔係佢諗緊咩

佢 「我無嬲你」
我 「咁 唉我唔識講 點解你對我咁冷淡」
佢 「唔好係走廊講啲野 人地會聽到 入屋講好唔好」

佢想打開鐵閂畀我入去 但係我用力推個鐵閂唔畀佢開 可能係幾晚都訓唔夠既關係 我表現得好粗暴

我「你係度講畀我知先喇 我己經成幾晚訓唔著喇 到底我做錯咩野」
佢 「你入黎先啦」
我 「你係度同我講喇」
佢 「咁不如....我轉頭落街買野 你一唔一齊去」
我 「去啊」
佢「轉頭我再whatsapp你 你返入屋先...」
#19 2017-11-28 02:42:02 縮小字型 放大字型

我己經顧唔到隔離左右 師奶佢地會聽到 阿欣佢好似怕人地會聽到 怕啲閒言閒語

返到屋企呆等半粒鍾 阿欣先whatsapp我 叫我係走廊等佢按lift先 佢著埋鞋就出黎 我等咗陣食咗支煙 佢由屋行咗出黎 著住件無袖背心 呢次真係咁耐以黎見佢著得最靚一次

平時都好街坊裝 可能因為我每次見親佢都係棟樓度 就算返工佢都著到好普通冇咩變化
著到同我平時見學生妹出街look一模一樣 化個妝雖然同平時唔多太大分別 覺得佢形住佢化得用心咗
唇彩同腮紅都深過平時 專登為我而做 就好似想同我約會一樣 不過都係我FF多
我地之前既範圍都離唔開28樓 從來都未試過可以落街 我心情既興奮又忐忑
到底佢諗緊咩 點解會叫我一齊出街 係唔係代表我有機會

落到樓我地一齊行去百佳 我地一人揹住個環保袋 佢拎住個白色公仔圖案環保袋 我嗰個係阿盈用開既袋 一個雙面印花字母 好女人搞到我有啲唔好意思
大家慢慢咁行 咩野都冇講 搵唔到野開口 唔知有咩可以同佢講 點解做男人可以做到咁懦弱 都成30歲人 同阿欣既關係可以咁青澀

我猶疑咗好耐 唔講野不如直接行動 行到一半既時候 眼望住前方 將插係褲袋隻手抽出黎 嘗試拖佢隻手 得下有冇著落
可能係我太心急 定係估錯佢既用意 我一埋去拖佢就即刻縮 唔通佢真係完全唔當而家係約會 純粹真係落百佳買野

衰咗呢一次我真係好尷尬肉酸 點解可以心急成咁 佢又完全冇畀個訊號我可以拖 我就拖佢個手 明明而家啲關係咁曖昧 最忌就係太心急
望都唔敢望佢 心跳得好快 真係想呢5分鐘既路程加快 我加快咗腳步佢伴隨住我一齊加快 到咗百佳我先覺得輕鬆返 起碼大家可以傾下買咩野

我負責拎架車仔 陪佢周圍行 呢間百佳唔算大 不過我地都行咗幾耐 阿欣每到一個位都睇好耐 格幾個牌子先放入架車度 精打細算得好緊要
佢見我只係推車仔 咩都唔買 佢都開口叫我都買野 唔好淨係陪佢買 我隨手拎咗啲零食 叮飯點心 佢見到我拎起拍咗我隻手一下
因為佢望見到我冇睇價錢就直接拋落去車 有啲嬲嬲地 阿欣係架車度拎返起再格過價 搵到個最平既先放入車度 又唔準我食叮飯話無益

之前第一次請我去食飯話無益係做戲 但呢次真心真意唔想我食叮飯 唔健康無益 我覺得好開心 佢咁關心我證明佢冇嬲我 我立即變咗個老婆奴咁
佢講咩我都唯命是從 任由等佢幫我選買咩 佢買咩我都要

成件事好甜密 真係好似兩公婆出黎行街買野當拍拖咁
經過水果區 仲提我要食啲水果 單身要注意營養 佢講到好婉轉 講到話生果做緊特價 買幾個送一個 佢地屋企兩個人食唔哂 一人份一半 咁樣要會抵啲
#20 2017-11-28 02:43:45 縮小字型 放大字型

嗰刻我真係覺得佢係一個好女人 佢同我講咗好多野 我沉思緊好多都聽唔入耳
應該大概係不如推架車去清潔用品度 推去呢啲嗰度 我順住意識咁跟住佢行
佢太專心買野無理到我 呢種溫柔細心 體貼 邊度搵 完完全全被呢個女人吸引住 行一轉百佳都己經睇到好多佢好女人既一面

我唔知佢對我有咩感覺 但如果佢只係睇我做只係一個隔離屋單身男人 但都可以咁關心我起居飲食 佢真係一個好好既女仔 想溝佢放係自己屋企既感覺愈來愈強烈 我都成30歲人 以前同女仔拍拖大家都玩過開心過就算 大多都係貪啲女仔夠青春 同埋扑野解決性慾用

但人愈大身邊朋友又結哂婚 自己都開始定性 而家返大陸玩都玩到無野好玩 愈玩愈覺得空虛寂寞 真係想娶一個老婆陪住 有頭家先似樣 老土啲去諗 傳統男人都係應該有車有公屋有個老婆 而家咩都有就係差個老婆
阿欣呢種大我兩年既姐姐 諗野成熟 人又靚 好識照顧人 持家有道 節儉 成個老婆格出哂黎 呢種女人好罕有

人愈大識女仔既機會唔多 中學女同學都嫁哂人 溝女地點黎黎去去都係酒吧 再唔係玩啲交友app 不過始終有種逢場作戲既感覺 好難識真心既女仔 好多人都只係玩玩下心態 難得而家個天可以畀阿欣住我隔離 咁樣講好似好衰 但真係就近方便 當然我對佢好有好感

佢單親媽媽 搵錢又唔多 要獨力養起全個家 返工都估咗佢大部份時間
身邊又應該冇其他男人 假日我見佢六日都係屋企休息冇出制 阿盈又話佢鍾意睇書咁摺 似係無咩其他特別興趣
最多陪阿盈落街打下羽毛球 平時生活應該好悶先真 黎黎去去都係屋企返工兩邊走 我抱有一種大男人心態 唔知點解好想保護佢地兩母女 好想畀到幸福佢地 覺得呢個係男人既負責

我完全唔介意阿盈做我個女 佢雖然講野好串 但都係一個好女仔 由佢肯做家務同好保護佢媽媽都可以睇得出 阿欣雖然唔想人地覺得佢地好可憐 但係我無辦法唔咁諗 我自問做咗裝修一排搵到下錢 之前都有儲落錢 又冇諗過買樓 應該可以俾到好啲既生活佢地兩個

不過我都有一種內疚感 大男人心態有好有唔好
之前一直覺得阿欣呢種女人一定好寂寞好易溝 需要男人關懷照顧 同我飲酒都係苦悶難耐 再者我同佢學歷大家都唔高 粗人一個 但我搵錢一定多過佢 月入都有兩三皮 總係覺得佢會投懷送抱 先入為主覺得佢都算過生活環境好啲既生活 自己一個好辛苦 加上睇得AV多 覺得呢種女人性生活都需要慰藉

但現實又唔係 佢一啲都唔隨便 好守禮 矜持得好緊要 儘量同我保持距離 我拖下佢隻手都唔得 我送完禮物畀佢 佢都一定堅持要畀返錢我 就算點冇錢都要畀返錢我均真清清楚楚 唔想我睇佢唔起可憐佢

以前讀中學有個坐隔離既女仔同我講過鍾意睇愛情小說既女仔都想要一段刻骨銘心既感情 而家先知佢一啲都冇講錯 我對住我呢種男人自以為是既心態感到愧慚 睇怕我如果真係要溝阿欣 一定要慢慢黎 要好認真對待佢
阿欣呢種單親媽媽 我唔知佢單身咗好耐 但佢依然有一種女生對愛情既追求執著

行到去差唔多收銀 行咗成轉都行哂 基本上初期佢都會叫自己我選 後來我所有日用品 廁紙 牙膏 立雜野 全部都係佢幫手選埋
我地經過最後臨入收貨個啤酒區貨架度 想快啲推架車加速 儘量唔好令佢憶起嗰晚飲酒既事
雖然佢飲完酒我覺得酒酣耳熱個樣佢好可愛 但係佢自己好似覺得好羞好樣衰 講咗好多唔應該講既野 又吐露咗自己真實年齡
點解阿欣佢停低定住 同岩岩揀其他野一樣 仔細咁睇價錢牌 青島 藍妹 嘉士伯逐一審視 係度格價
我借啲依話想推架車走差唔多買哂 話去收銀我畀錢先 點解佢好好奇咁問

佢 「你唔買酒咩」
我 「我今次唔買喇 下次先」
佢 「買埋啦 都黎到囉 青島最平買唔買青島」
我 「真係唔使呢 我諗住戒了」
佢 「我冇嬲你嗰晚....你想飲就飲喇 你地男人咁懶一定唔會再落街買 而家買定先」
我 「真係唔使呢 呢排唔買住」
佢 「你唔係睇波咩 我聽同事佢地講聽晚有波睇 買啦特價啊」
我 「咁啊 要青島囉」
佢 「6瓶裝平 不如就買6瓶裝囉」
我 「哦 好啊」
佢 「你想買幾多都無所謂 你自己揹返上去啫」
#21 2017-11-28 02:44:09 縮小字型 放大字型

佢笑得好開心 酒窩都出返黎 係久違係我面前出現既笑容 有返表情唔再鬱悶樣
我跟住佢笑 伸高隻手去拎青島入架車度 之後有講有笑入收銀等排隊 佢話想由佢黎畀錢 可以儲易賞錢 就快可以換到現金卷
同我可以講返笑仲算鬆一口氣 可以證明佢真係冇嬲到 將嗰晚既事記係心入面 應該仲有機會溝佢

買完哂錢我地各自將所有野塞入環保袋之後 我地行咗過去公園 放低啲野落張凳度 佢拎張單出黎想計數
睇下每樣野價錢 我借個我嗰部手機開個計算機app出黎 同佢一齊數 分返我要畀幾多錢佢
計完之後佢拎畀我睇 得200幾蚊 正路應該無咁平 我拎咗張單上手覆一覆數 數完都應該係300幾蚊
我問一問佢

我 「我數到係300幾蚊」
佢 「你畀我240我得喇」
我 「唔得 一定要畀足你 我唔想差你錢」
佢 「你今日送咗支書畀我 扣埋呢個數」
我 「唉你想我講幾多次先明 本書係我送畀你 禮物黎 你唔使畀返錢我 上次個面膜又係咁 我淨係想送野畀你」
佢 「我唔想你可憐我」
我 「我真係冇可憐你 我淨係想送畀鍾意既女人野 得唔得啊」

我最後嗰句講得好大聲 不過周圍除咗捉棋阿伯就無其他人 我知我唔應該講到咁激動 成個怒漢咁
但實在唔想再扭扭擰擰落去 不如坦白啲同佢講 得就得 唔得就算
夜幕低垂 環境好昏暗 11月既微風 街燈加上手機既燈光 照住佢既側面 真係好靚 個氣氛忍唔住都要講
我凝神屏息等睇佢有咩反應 佢無俾我嚇親 睜開雙眼 對住我微笑 撥下頭髮 我唔知點講落去求其係環保袋度拎咗支綠茶飲
大家都唔出聲 隔咗陣佢先細細聲講

我「我同咗你講我係單親媽媽 我唔係冇同你講」
佢 「我唔介意 我話知你有幾多個仔女 3個4個都好」

我己經豁出去 要講既都講哂 全部都係真心話
佢冇者講落去 我諗都係衰硬 提議不如返屋企先 死咗心算 我正想用右手拎起個環保袋既時候
佢主動捉起我隻右手拖住 我頭先好緊張隻手好多汗 抹下啲汗落條褲度 先再拖實佢隻手 佢隻手好柔軟 一啲都唔似主婦手粗糙
佢見到我抹汗掩嘴一笑 但冇再鬆開隻手 我拖到實一實 打死都唔會放開 我地就係咁慢慢行 一手揹住一個環保袋 拖到返去屋企樓下
去到打密碼佢先鬆開 我問佢我地而家係咩關係 但佢好似想迴避我呢個問題我 唔答我 就咁一齊答完lift各自返屋企
#22 2017-11-28 02:44:51 縮小字型 放大字型

但己經足夠回到家一直回味 飯都食唔到 諗緊係唔係己經算追到阿欣
雖然佢無表示答我 但佢肯同我拖手 己經係情侶先會做會既事
我用自己部放工手機加咗佢個whatsapp 望住佢張icon 係佢同阿盈係西餐廳影既食物照

只係分開咗一陣 就好掛佢住 想而家入佢屋企搵佢 但係阿盈己經好大機會返咗屋企 阿欣應該暫時儘量都唔想阿盈知道 玩咗陣電腦上forum睇下野 1點幾諗住上床訓既時候 發覺點都訓唔著 係被窩輾轉反覆都訓唔到 雖然沖完涼 但係拎隻手上去聞仲好似聞到佢陣香水味
我坐起身開部電話 whatsapp佢

'頭先夜晚有波睇 你過唔過黎睇'

其實睇波佢女人一個應該冇咩興趣 我一來懶唔想行太遠 二來我霎時間諗唔到用咩理由約佢 咁快約佢出街又好似太快 最好都係約佢黎我屋企睇下波
我最怕出到去就係周圍太安靜 諗唔到有冇咩好講
我以為聽日先會收到答覆 估唔到佢立即覆返我 立即好興奮 佢都仲未訓 12點幾平時佢應該訓咗先係

佢 '你仲未訓?'
我 '我未返'
佢 '返定訓'
我 '訓 打錯'
佢 ' 做咩你用呢個電話加我 '
我 '之後嗰個係返工用 呢個係平時私人用'
佢 '哦 姐係你有平時有兩個女朋友?'
我 '我講到咁你都諗到去呢度'
佢 '哈哈 講笑 係喎點解你返唔到'
我 '我禮拜六第日唔使返 好晏先訓'
佢 '我係訓唔著'
我 '點解'
佢 '聽完你頭先咁講 最衰都係你'
我 '頭先係幾時'
佢 '頭先咪係頭先 你自己知'
我 '你做緊咩而家?'
佢 '我係飯檯睇緊本書本身 之後你sd message我'
我 '睇緊我送畀你嗰本'
佢 '嗯'

我地一路由佢嗰本書 傾下隔離師奶既野 阿盈返學既野 用whatsapp咩都傾一餐
大家回顧返以前twin同cookies年代 佢以前好鍾意cookies 佢仲問我覺得佢似cookies邊個 我答似Stephy 最靚女嗰個諗住佢會開心 點知佢話一啲都唔似 佢以前啲朋友個個都話佢似elaine 完全無印象邊個黎

好似重返中學校園同女同學傾通宵一樣 雖然傾既野都幾無聊 不過仍然都覺得好開心好好玩 不過以前係用短訊幾亳子一次 一個月要幾百蚊 不過死死氣交住錢仍然可以樂此不疲同女用短訊傾計 呢種感覺完全返哂黎

半夜三間既傾計係有一種令人著迷既魅力 令你諗都咩就想傾咩 當時傾計既對象一定要係女仔先得 男人之間最多係歐聯先會凌晨傾計
我地來來回回發咗百幾二百條message 但係大家都唔想停 傾咗成半粒鐘
我有問佢不如傾電話唔好打字 佢拒絕我話唔想嘈到阿盈 阿盈係床度訓咗
佢雖然唔想傾電話
#23 2017-11-28 02:45:49 縮小字型 放大字型

佢 '我唔傾得電話'
我 '咁不如聽日再傾'
佢 '我仲未訓得著....'
我 '咁不如出去囉'
佢' 去邊 咁夜'
我 '落街行下'
佢 '太夜 我唔得 我沖咗涼'
我 '唔會去太耐'
佢 '去邊先'
我 'm記好唔好'
佢 '你出去先 轉頭我先出黎 記住開鐵閂要細力啲啊 唔好嘈到阿盈'
我 '好'

估唔到一係冇得同佢去街 一日就黎兩次 仲要佢冇點諗就應承我 聽日係星期日可以夜啲先訓都無問題
以前中學都會同班住附近一齊夜晚出去食下糖水或者m記 睇波六日都係自己落街買外賣

不過真係未試過同隔離屋既女人一齊出去 大家只係住隔離 大家都唔會點遲到法 拍拖約會方便得好緊要 我就咁短袖純色tee就出咗去走廊 等咗陣佢就出黎 佢化咗淡妝 著返頭先夜晚落街件背心 戴住大框眼鏡

平時佢帶con我未見過佢帶眼鏡 佢話除咗con廢事再戴 咁我問佢做咩堅持要化妝 佢話呢啲係禮貌黎 呻佢都唔想成日出少少街都要化妝 你地啲男仔淨係識睇樣 佢地出街好大壓力
我由答lift開始二話不說己經一路拖住佢隻手 直到行去m記

去到M記 裡面播住音樂 光線好充裕 M記24小時呢個發明真係偉大 係凌晨街坊唯一好去處
意想唔到都幾多人 幾多後生仔玩緊board game 玩到好大聲 都有一啲人坐埋一齊溫書

阿欣佢無帶con瞇住眼晴 近視睇得好唔清楚 睇唔到上面個餐牌 佢話好少黎m記食野唔知出咗咩新野

我叫佢搵位先 其實都大把位唔使搵 不過我
地想靜靜地傾計 搵咗個無咁嘈既角落位 側邊張檯有人訓緊不過阻唔到我地

佢話自己一個食唔哂成個餐 太夜食咁多會好肥 我最後走咗出去叫野 選咗脆香雞翼餐餐加大 我加大係驚自己唔夠食

凌晨黎講都算幾多人 排咗兩三個人先到我 同個應該做part time既細路哥叫完餐之後 捧住個餐返去同阿欣食 我地食住薯條傾計 唔夠茄汁我要再出去問個經理拎

佢呻話咁夜食麥當勞會好肥 聽日做多啲運動 佢既運動都係得羽毛球 佢同阿盈逢星禮日一定會去體育館book場打

至於杯野飲 我地拎咗兩個飲管去分開飲 佢叫我唔好郁個杯廢事調轉撈亂咗對方飲管 佢都唔知我心裡面不知幾想撈亂 當間接接吻咪正
佢食食下薯條停低 托住腮笑住望實我 同上次飲酒個表情一樣好可愛 只不過今次塊面無咁紅
#24 2017-11-28 02:46:07 縮小字型 放大字型

佢 「點解你可以講得出頭先既野」
我 「我講咗咩」
佢 「你話想送野畀鍾意既女仔...又話幾多個仔女都介意 咁肉麻你都講得出 你平時都係咁同其他女仔咁講?」
我 「哈哈 一時諗唔到講咩啫 淨係諗到咁講 」
佢 「我嗰晚冇嬲你其實 我自己答應咗飲」
我 「我知你唔識飲 我都唔應該叫你飲既」
佢 「嗰晚我係唔係好樣衰 無哂儀態 又亂講錯野」
我 「我覺得你幾真 飲完酒之後個性格」
佢 「你係唔係笑我架」
我 「我冇啊」
佢 「係喎我嗰晚講咗啲咩 我飲咗唔清醒嗰段時間」
我 「你唔記得咗?」
佢 「我想聽你講一次」
我 「你又話多謝我裝修 之後 死喇唔記得 係喇你又話嬲我叫你欣姐 同唔再係後生女 我澄清先我真係冇專登講你」
佢 「仲有呢 講埋落去 一定冇咁少」
我 「你唔好打我啊 之後你話自己好老 好殘 叫我敢唔敢 er.....」
佢 「敢唔敢咩」
我 「錫你」
佢 「我邊有咁講過 你係唔係作架」

叫咗佢唔好打我 佢都用隻腳係檯底踢我一下 我真係搞唔清楚佢真唔知定扮唔記得唔想認
我都廢事都佢爭論 佢唔想認就最好當無發生過件事 要快啲轉移個話題 點知佢死都要講呢嗰晚既事

我 「係喎 識你都一段時間 我都唔知你做咩工」
佢 「你唔好轉移話題先 嗰晚你話我有咁講過 咁你有冇真係錫我」
我 「我無啊 我都醉咗無錫你 我點敢真係錫」
佢 「畀多次機會你 問多你一次 你有冇真係錫我」

今次佢冇飲醉但都仍然窮追不捨咁追問我 可能呢個本身都係佢既性格
好在真係搵咗個無咩人既位 離board game班人好遠唔會聽到我地講野
兩個30歲既男女 學似10幾20歲後生仔女係餐廳咁打情罵俏
以前既我過唔到自己嗰關 都算上咗年紀仲係m記卿卿我我
不過當你真係鍾意一個女人既時候 你會發現同佢既相處係好忘我 好似當周圍既人係空氣 唔記得咗自己既年齡

我 「我可能醉咗 有鍚都唔定 我都唔係好記得喇 應該有掛」
佢 「有定冇 你唔好講到咁含糊」
我 「有喇 有喇 我都唔想架 你叫到我又醉咗」
佢 「我一早知你有」
我 「你知又問我」
佢 「我想睇你會唔會呃我」
我 「對唔住 我唔應該咁隨便就錫你 我知錯喇」
#25 2017-11-28 02:46:52 縮小字型 放大字型

做男人有時候要咁 明明唔係完全我錯哂都要攬哂上身 阿欣自己叫我錫佢 同女人講落去你永遠都唔講得贏

佢 「點解你要道歉 係因為知我有老公 佢返咗大陸做野既時候仲同我飲醉 明知我係人妻你仲錫落黎 我嬲自己點解會同你飲」

聽完佢咁講真係晴天霹靂 我嚇到合唔到嘴 原來阿欣佢係人妻 點解完全冇聽佢提過 點解佢會黎二人公屋 唔通一開始阿嬸講既野係真
自問唔係好男人 嫖飲賭吹樣樣都試過 但衰極我都有底線 人妻呢啲唔可以亂食 自己細嗰屋企老竇出面有第二個 同阿媽日嘈夜嘈 頭家散哂

有一次吵大獲 係客廳嘈到差啲老竇要去廚房黎刀 家姐聽到之後叫我同佢一齊收埋哂屋企所有既刀 鎖起房門放埋係被度 抱住我喊 用對手遮住我隻耳仔唔畀我聽到 我好記得嗰次我人生唯一一次見到家姐係我面前喊得咁勁 我嗰陣唔係好懂事所以都唔係好明佢地為咩而嘈交

最終都冇釀成血案 老竇都冇打阿媽 佢只係都同嗰個女人搬咗出去一齊 阿媽一個人做酒樓樓面 養我同家姐兩個 成日要問親戚借錢

雖然我地兩個冇學壞 但係都冇咩心機去讀書 成日淨係諗住快啲出黎做野 一中五畢業就出黎做野 做過跟車 冷氣維修 地盤 倉務 到而家做裝修

後來到我20頭既時候 老竇先認錯搬返黎同住 嗰陣時我己經當冇呢個人存在 我要到佢走咗先原諒到佢

所以我想保護女人既心態係嗰陣時形成 其他男人可以會覺得單身阿媽湊住個女係一個累贅好麻煩 如果我冇經歷過咁樣既家庭我可能都會咁諗
但係我正正見過屋企班女人既眼淚 先會睇得咁開 好願意接受一個單親媽媽
但同時都係因為咁既經歷 我覺得拆醒人地屋企既行為好卑劣 人妻絕對唔可以食 就算岩岩先開始 咁樣搞法我唯有對阿欣死存心佢 我諗完咁多野咁感觸點知佢原來玩下我

佢 「做咩咁愕然個樣 我講笑咋 做咩咁認真啫」

佢見到我失魂個樣 係我面前揮手叫我 又講笑話如果我再發呆 就會食埋我嗰兩隻脆香雞 我要一陣要反應過來 實在太大打擊

佢 「你講真定講假」
我 「我都話我講笑囉 你見我隻手未戒指就知喇 點解你可以咁蠢」

佢拍下隻手啲鹽 拎紙巾抹下隻手 反開伸出左手搭係我隻手上面 無名指上真係冇戒指
我即刻鬆一口氣
#26 2017-11-28 02:47:24 縮小字型 放大字型

我 「點解你可以講得咁真」
佢 「因為我真係嬲」
我 「你頭先又話冇嬲我」
佢 「我係嬲我自己」
我 「嬲自己咩」
佢 「同一個識咗唔夠幾個月既男仔飲酒 同佢講哂所有野 我連佢做邊行咩都唔清楚 點解自己可以咁隨便 佢可能係一個鹹濕佬都唔定」
我 「你咪知我做裝修囉 仲有我唔係鹹濕佬啊」
佢 「咁點解阿盈同我講過 話你成日朝早佢返學望住佢條裙 上次黎我地度食飯又望住佢對腳 今朝入你屋企又見到你睇緊鹹片」

屌佢老母 雖然唔係真係想屌阿欣 不過嗰條靚妹表面上平時而家返學同我有講有笑 我又畀wifi佢用又送面膜 之前仲人情價收封利是幫佢地裝修 都算對佢唔話得 條靚妹係咁唱我作故仔 同阿欣講我壞話 講到我成個鹹濕阿叔咁 我最多有陣時係會唔覺意有望過佢一兩眼長腿 其他都係佢作得就作
估唔到原來佢暗地裡咁憎我 睇怕佢保護阿欣既意識好強 唔想其他男人同自己阿媽一齊 佢雖然而家都16歲仲差兩年先係大人 不過呢個青春期年紀心智都唔會好成熟 始終唔夠可以接受到阿媽拍拖既懂事程度
或者佢都受過傷害 認定我不懷好意 屈男人鹹濕呢個就係絕 好難澄清洗脫
佢屈我既地方都係阿欣平時唔係度 作故仔佢點作都得

我 「我冇啊 阿盈可能誤會咗 我真係冇望佢」
佢 「我信你既...點解阿盈咁唔鍾意你 要咁樣話你」
我 「冇啊 而家平時朝早見到佢都有講有笑無咩野 你唔講我都唔知佢憎我」
佢 「你以後同阿盈關係有冇得好啲」
我 「我會儘量諗方法修補」

佢講以後 唔通真係承認我地係一齊 不過一諗到阿盈呢個阻礙 第日應該有排煩 點樣先可以令到佢唔憎我

佢 「話時話 你而家返開咩工」
我 「咪裝修囉 幫完你屋企裝修你都咁問 玩野啊」
佢 「淨係一份裝修全職?」
我 「係得一份」
佢 「搵唔搵到錢」
我 「都搵到啲既 好境都有3萬一個月」
佢 「咁多」

佢表情好似好驚訝 好似一直都唔知裝修係搵多錢 仲以為我要身兼幾職先夠食
不過佢而家先知 可以知道佢至少唔係為咗我啲錢而來 所以都幾開心
雖然我搵錢唔係多 不過而家我既能力養佢地唔使問題 可以畀到飽飯佢地 最多揸少啲車省油錢
#27 2017-11-28 02:47:58 縮小字型 放大字型

佢 「你就好搵咁多 我搵得萬幾蚊 仲要返七最遲放九」
我 「我都冇問過你返咩」
佢 「我返美心」
我 「美心係 我唔熟唔知呢間野 係餐廳 西餅 定係餅廠度返」
佢 「美心西餅 做店務嗰啲 幫手上貨收銀 抹下野咁 唔算多野做不過搵得好少」
我 「之前做咩咁你」
佢 「做咗好多年美容」
我 「做咩唔做落去」
佢 「又要跑數sell野 好大壓力架 你未做過唔會明 好唔岩我 我唔識講野做戲又唔叻 同埋年紀大咗唔夠其他妹妹仔爭 而家做店務輕鬆好多 雖然都有啲麻煩客不過做耐咗都知點應付 同埋而家返將軍澳近返屋企 坐兩三個站就到寶林 早放買埋餸可以煮飯畀阿盈食」
我 「你都係後生女黎啫而家仲 我係客都會幫襯你做美容」

佢嘟起個嘴 哼我一聲扮嬲 覺得我專登逗佢開心

佢 「你以前做咩」
我 「做過好多工喇 一時之間講唔哂 跟車啊 冷氣維修咩都做 嗰陣都係見野就做 係呢一兩年先想搵返門手藝專心做裝修」
佢 「仲以為你做咗好耐添 啲手工咁好」
我 「哈哈 搵到下飯食既而家我 可以養到你地兩個」
佢 「邊個話要你養 我講過唔想你可憐我地 我地兩個萬幾蚊都生活到 」
我 「我係要養你地啊 我係要多管閒事 鬼叫你住係我隔離 鬼叫我鍾意你」

我既語氣係好粗魯 佢聽完我咁講本來想我打一下 但又飛到一半縮返隻手 低住頭食住雞翼 陰陰嘴笑 個樣好靦腆
其實我都大概明白佢唔想人地可憐佢既意思 呢句野我參透咗好耐 佢唔止講過一次 所以我特別在意
佢唔想人地當佢係單親媽媽可憐先要佢 係真心想人地當一個係一個女人仔 鍾意佢既性格而愛佢
呢種心態其實好矛盾 一方面唔想人可憐佢 另一方面其實都好軟弱 同佢相處一段時間都覺得佢唔似咁堅強既人
想男人照顧佢分擔佢既憂愁 見佢笑到咁甜就知 低住頭唔抬起望我 變到成個小女人咁 邊有女人唔想男人保護佢畀到幸福佢
特別係佢萬幾蚊應該維持到生活 絕對買唔到咩奢侈品 佢應該都想畀阿盈過好啲既生活
我真心想佢地過多啲日子 先會咁樣同佢講

佢 「你想唔想聽我講我以前既野 例如...例如我以前既男朋友 你先再考慮同唔同我一齊」
我 「我唔使再諗了 應該話呢排諗咗好耐 結論都係我真心想同你一齊」
佢 「你聽我講先 我唔係你想像咁好既女人 你聽完再決定好唔好 我唔想對你有保留」
我 「咁你講」

我地都食哂啲野 差杯野飲未飲哂 M記好播唔播而家先黎AGA播首<<一>>
「尋尋找找為何都找不到 為何有無盡孤苦的單數 合意的 永遠最難擁抱 未見到答案的傾慕 和伴侶無奈永遠差半步」
頭先咁好氣氛又唔播 整播歌系統條友都唔識做人 而家先黎播有咩用 仲好似攞境咁
寧願佢播返陳奕迅首信任 而家阿欣既語氣嚴肅咗好多 因為佢想講返佢既前度 完全唔岩時機
連班board game友都走哂 得返啲訓覺既人 除咗我地講野聲就得返歌聲 首歌真係好玩野
#28 2017-11-28 02:52:16 縮小字型 放大字型

佢 「嗰次食飯咪講過我以前我係大家庭 我阿媽係我中一再婚 我同兩個阿哥跟阿媽搬去後父度 佢對我地好好 同自己親生仔女一樣鍚我地
只不過屋企太多人又細 所有家姐阿哥大我好多 佢地都搬哂出去住結婚 後父生既一個家姐雖然大我好多 但係對我特別好 因為兄弟姊妹裡面得我地兩個女仔
佢成日借啲愛情小說畀我睇 我嗰個家姐結咗婚有個好好既老公 所以由細到大我都好羨慕佢 好睇重愛情 直到中四嗰年鍾意咗一個大我兩年既師兄
一齊咗排住拍拖冇讀書 考完會考我跟佢搬咗出去離家出走 我試過同屋企人傾 話想直接出黎做野 但係嗰陣屋企好反對 連我家姐都好反對 日日係咁嗌交
因為全家都畀哂資源我讀書 想我可以做到全家第一個考入大學既人 重考都唔緊要 但係我真係唔鍾意讀書 細個淨係鍾意出街玩 無心機讀落去 同埋太鍾意呢個男人 想同佢一生一世 佢嗰陣己經出黎做野搵到份工 我想跟佢一齊 我無理屋企反對同佢搬咗出去」
我 「唔」

阿欣講咗咁多飲完啖野 清清喉嚨 繼續講落去

佢 「我地一齊咗半年我就有咗 即係阿盈 嗰陣我覺得好開心 我自細都想嫁到個鍾意既人 有一對仔女成家就滿足 同我家姐一樣 諗返起都好傻 我驗完同佢講 佢完全唔想要阿盈 又唔想結婚 仲話我點解唔食避孕藥 係度逼佢結婚 我嗰陣真係完全無咁諗 而家唔想結遲啲都無所謂 生咗阿盈之後我地有經驗能力再結都唔遲 到嗰陣我先睇清楚呢個人 佢完全唔想負責任 之後半年佢個人變哂 成日搵我好多缺點黎講 幾乎日日都嗌交 為咗少少野爭執 家用又唔畀 如果唔係我本身有做全職 根本生活唔到 最後我頂唔順呢個人 對佢死咗心 想自己湊大阿盈 離開咗佢一個人住」
我 「唔」

我反思自己一定唔可以做咁既男人 絕對唔可以犯同樣既錯 阿盈點對我都好 我都應該當佢係親生女看待
講到呢度佢都好堅強 言語間聽得出佢無後悔呢個決定 不過佢愈講落去愈傷感 開始眼濕濕

佢 「生咗阿盈落黎 係醫院見到佢第一眼好可愛 隻眼好似我 嗰刻我同自己講 我自己一個都冇問題 唔使靠男人都得 嗰陣細個諗野好唔成熟 倔到死都唔想搵阿媽幫我湊 唔想靠父母係度鬥頸 點知我自己一個真係唔得 要睇住阿盈返唔到全職 淨係日頭放阿盈係家姐度幫手睇住 錢少咗好多唔夠用 返唔到長工 好辛苦好想死 每日返完工己經好攰 又要整家頭細務 昏睡完又畀阿盈扎醒 病咗都要返工 錢又唔敢洗 咩娛樂都冇 朋友全部都疏遠哂 人生就好似得返湊女一樣
有一晚我真係崩潰 我飲咗好多酒 坐係窗台抱住阿盈諗不如自殺算 跳落去一了百了 但係我都係唔敢膽 最後無跳落去」
我「你都唔算阿盈受苦 你覺得阿盈係無辜 」
佢 「唔係 我唔係咁諗 我份人好可怕 我點解可以咁恐怖 嗰個係唔係先係我黎 嗰刻我唔係為咗阿盈 我淨係諗到我自己 我覺得自己仲有青春18 19歲 點解要受呢啲苦 我覺得自己仲可以值得有更好既將來 更好既愛情 阿盈係我既負擔 之後成個月我腦裡面淨係不停諗...不停咁諗 不如唔要阿盈送佢畀保良 局算 我都可以重新開始過 當呢一兩年行差踏錯 或者真係聽阿媽講再讀返書 可以再嫁過好啲條件既男人 當冇生過佢出黎 我嗰陣點解可以咁自私 阿文我係唔係好自私 當初口口聲聲話要生阿盈落黎 為咗自己將來又想唔要佢 如果阿盈知道我咁諗過點算」

佢講到呢度咬住唇啜泣 眼淚係咁流 我怕周圍有人睇到佢喊 坐過去佢嗰邊 將佢抱入懷中伏在我心口度喊 成件衫都濕哂

我 「算喇 都夜喇 唔使講落去喇 我唔覺得你自私 你自己一個人咁辛苦 一時諗錯咗都正常」
佢「如果最後唔係家姐發現到我有問題 叫埋阿媽...叫埋阿媽...同...同我一齊同我見社工 阿盈而家可能己經住緊保良局 做緊... 做緊孤兒」
我 「你最後冇送到咪得 你自己一個人喧咁辛苦湊足佢咁多年 阿盈而家到咁大 都好生性」
佢 「你唔好同阿盈講得唔得 我唔想佢知道我係一個咁既阿媽」
#29 2017-12-01 21:49:23 縮小字型 放大字型

阿欣己經喊到收唔到聲無再講落去,伏係我心口度抽噎,M記紙巾都用哂,唯有任由佢整濕件衫。

呢番說話應該佢埋藏係心裡面好耐,一直耿耿於懷,佢信任我先想同我傾訴,其實佢無必要同我坦白講佢以前既野 ,就算佢唔講我都唔會走去問佢。

佢想我了解佢既全部,毫無保留咁袒露一切,唔想對我有咩隱瞞,呢個我己經好感謝佢 。

最重要係阿欣最後都冇送走阿盈,獨力辛苦湊大阿盈到而家,根本過去係點唔重要,奉獻咗自己青春16年,無時間拍拖談情,付出咗咁多,如果唔係成熟同堅強根本早己經放棄。

佢講完之後我反而更想保護眼前呢個女人,等佢可以重新體驗青春 ,可以尋回失去既幸福。

經理行過黎關心問我地有冇事,我講聲唔好意思,有一兩個本來訓緊既人起咗身 用好奇既目光望住我地,阿欣應該係聽到經理咁講 ,伏係心口度哽咽 ,驚阻到人壓到喊聲好細,慢慢平靜落黎 。

我講笑話早知頭先叫餐拎多幾張紙巾,佢唔爭氣笑咗一聲,我見都好夜成2點幾,帶住佢一齊返屋企,沿途只有輕聲既嗚咽,返到樓下己經停止咗,臨入屋佢講咗句聽日whatsapp我,就各自返入屋訓覺。

第二朝禮拜日訓到10半,尋日一日之間太多事發生起伏太大,熟睡咗成晚好好訓 ,一起身刷完牙,過咗陣先收到阿欣whatsapp我,睇怕佢都岩岩起身。

'你今日有冇野搞'
'冇 做咩'
'阿盈想要部電腦 你可唔可以陪我地買 借呢個機會要同盈打好啲關係啊'
'無問題啊 阿盈有冇想要咩類型'
'我地唔係好識 有冇介紹'
'去黃金高登可以慢慢睇'
'好 你食咗野未'
'未食'
'食咗先去好唔好'
'好'
'我同阿盈講 話你係有車 可以慳車錢先搵你幫手 咁樣講好唔好'
'好'
'轉頭15分鐘出面等?'
'okay'
#30 2017-12-01 21:58:57 縮小字型 放大字型

阿欣咁快叫我出街,去幫阿盈買電腦,應該係想我借呢個機會同阿盈混熟,幫佢買電腦氹佢開心,我當然要展現男人可靠既一面,但其實我對電腦知識一竅不通,我部機都係搵朋友請佢食餐飯幫手砌。

我可以做到既只有車佢地去深水埗,陪佢地周圍行。

睇完阿欣段whatsapp應該希望我地關係唔好公開住,暫時就當我係熱心協助鄰居既人 ,再加上而家所謂既關係只可以叫做互有好感,阿欣都仲未答實我地到底而家到咗係咩關係,所以現階段未可以畀阿盈知道,要一步一步黎,等佢願意接受我。

我地三個一齊行去食大快活趕得到食尾班車早餐,兩餐當一餐食,平時通常如果外賣早餐先會去大快活,堂食多數都係食一間相熟既茶餐廳,食慣嗰度沙嗲牛凍奶茶,同伙記打下牙骹。

今日第一次三人行咁特別日子,廢事俾班伙記見到我同阿欣佢地,八掛多嘴問長問短,大快活勝在個阿姐我食咗幾十次都唔認得我。

阿欣尋日喊完黎,今朝隻眼又唔係好腫,應該敷咗熱毛巾先門口。
佢今日著到好普通 ,搞到我有啲失望,安慰自己佢只係當買電腦唔係出街約會。反而阿盈著咗件韓式兩件式背心配條八分褲揹住個袋。啲靚妹都真係好貪靚你問我都係覺得佢著白色校裙清純好睇好多,清純順眼啲。

食早餐嗰陣時先知佢買完電腦約咗班fd出街玩,諗起夜晚冇佢做電燈膽幾好,用半日幫佢夠哂皮。

阿盈係佢我面前言行正正常常 ,最多語氣串啲塞住我,但一諗到佢係我背後同阿欣唱我作故仔,講到我成個鹹濕佬,就覺得呢條靚妹唔簡單,年紀咁細咁識攻心計 ,同自己講鍾意得阿欣就要接納埋阿盈,唔好同細路女計較,要佢放下戒心,換個角度諗佢只係未夠成熟 ,出發點都係保護自己阿媽就憎唔落。

食緊早餐嗰陣阿欣夾咗好多塊吉列豬排畀我,阿盈見到又跟尾,切魚柳夾落我度,佢地兩個將啲搽多士牛油畀哂我。佢地講笑話今日我要負責做粗重野抬電腦,一定要食飽有體力先得,計我話佢地兩母女根本好怕肥。正常如果唔出街食佢地而家係屋企食緊瘦身餐,轉頭就去做運動,所以而家好有罪惡感。

食完早餐一齊行去停車場攞車,我轉住條匙大搖大擺咁行過去行,諗到終於可以畀佢地見識下我架200系Hiace,係班女人面前威一次 。雖則係搵食車,平時都用黎代步用,有落足本錢大改裝,使咗成幾皮野,改哂成套避震、死氣喉、包圍,而家個外觀型到死 。bid咗呢架車之後,成個都想帶條女去兜風,今日終於有機會,可以畀阿欣試我手車。

其實都有預感佢地有可能唔太識欣賞 ,但點估到佢地望兩眼都唔望,直接一開車門就屈身入去,完全對架車冇興趣。阿欣仲要唔醒水坐我隔籬副駕。不過都啱嘅。唔好引起阿盈既懷疑。一路揸佢地當正我真係司機,係後面細細聲傾偈 仲話我內籠好多雜物垃圾好亂要執下。如果早知今日佢地坐我車執下先打個打蠟,咁突發完全準備唔切,早知搭巴士都冇而家咁傷我感情。

我唔想淨係做司機咁悶,佢地係度又唔食得煙焗住度氣,到咗紅磡燈位停低,我儘量搵機會插入佢地話題,再唔傾下會悶到死。

我 「陳小姐,你地鍾唔鍾意呢架車。」

無人出聲應我,佢地太專心嘰嘰咕咕,完全無視咗, 我仲慘過的士司機
但係我都要再試多次。

我 「陳小姐你有冇車牌。」
#31 2017-12-01 22:08:07 縮小字型 放大字型

阿欣停咗同阿盈講野,望過黎前面,注意到我問佢野。

欣 「張生你係唔係叫我,唔好意思我頭先聽唔到。」
我 「無,我想問陳小姐你有冇車牌。」
欣 「冇啊,我唔識揸車架,冇學過。」
我 「咁又係啊,而家香港養車咁貴,油錢泊車保養樣樣都係錢。」
欣 「嗯,你養車會唔會好吃力。」
我 「又唔會,好在我呢架牌費同保險都算平,加埋都9千有找,副偈都算耐用 揸咗咁耐都唔使點大整。」
欣 「咁咪好,慳到好多錢。」
我 「Hiace呢啲日本車耐用抵玩,唔似韓國車Hyundai咁唔耐用。」
欣 「哈哈」

阿盈加把口入黎,個樣好唔耐煩。

盈「妖唔開講車喇,講其他啦好悶啊,我地又冇車講黎做咩。」
欣「阿盈! 唔好咁冇禮貌同張生咁講野。」
我 「唔緊要哈哈,講車係悶啲,女仔未必鍾意講,咁傾下其他野啊。」
盈 「我兩年後做咗成人都會去考車牌,我唔覺得你特別叻。」
我「阿盈你咁醒目應該一次考到。」
欣「陳嘉盈,我唔講再第二次喇,唔好意思張生。」

其實阿欣都應該對車冇咩興趣,呢個我感覺到,不過佢都肯聽我講野畀下反應。而阿盈真係好串串貢,佢啲語氣成日好想扮做大人,其實佢心理都幾易懂 ,熟咗佢都唔會上心佢講野,仲覺得幾好笑。

見到佢地唔想傾車呢個話題,轉去了解下阿盈想要咩電腦加下分,等陣可以易搵啲心水。佢話冇咩特別要求,用黎睇到韓劇夠清,聽到歌上到網就得,咁都叫易搵既,基本上隨便一部3千蚊內都滿足到佢。

一直都好好奇阿盈之前冇電腦點生活到,講開先知以前住暫住舅父屋企嗰陣有仲一部自己XP電腦, 而家搬咗黎冇得用就辛苦啲 ,好在岩岩開學兩個月唔算多野做,偶爾佢平時如果要用電腦做功課或者搵資料,要留係學校六七點耐啲先走,我話咁咪好唔方便,倒後鏡見到佢聳住, 一副好睇得開既表情話初頭係有啲唔習慣,而家己經慣咗。

其實佢都幾慘,有時都憎唔落佢,阿欣個樣有啲唔開心有啲內疚。見到佢地咁樣都幾心痛,等陣要幫佢搵部好少少既電腦,或者阿盈會對我另眼相看。

本來想去高登直接買電腦。快快手買完電腦。阿盈可以走先唔好阻住哂,點知佢地話咁難得好少一齊出咁遠行街,想去黃金商場睇下野。我放佢地落車去ok買野先,再自己揸完少少泊架車過去中電對面,係黃金正門集合。

星期日人頭湧湧好逼,阿欣拖住阿盈隻手推住人群咁行,我都有幾次心思思想拖阿欣隻手,不過怕阿盈見到就就弊。一入到去佢地己經唔記得咗今日係黎買電腦先,隻眼發光咁周圍睇野。阿盈同其他人一齊圍觀啲遊戲機播片,阿欣又冇催佢陪佢一齊睇 ,佢地唔打機都可以睇到咁著迷都算神奇。

我見一場黎到,買咗隻生化危機啟示2同刺客教條,阿盈見我買完捉住我問長問短,好有興致咁問我呢兩隻game玩咩,我話18禁佢就無問落去,用一副好嘔心既表情望住我,之後又陰陰嘴笑,應該係又諗到故仔作畀阿媽聽,力證我有幾鹹濕。

落到地下嗰層佢地更加上哂身,俾櫥窗裡面琳瑯滿目既貨物吸引住,間間鋪都停一陣睇野,阿欣都好似失去咗自制力咁,樣樣野都想買咁 ,我提佢地話睇一陣好喇,轉頭去要睇電腦,佢地拍哂心口話睇10分鐘就走 ,最後一睇就睇咗成粒鐘,佢地兩母女買咗電話殼、耳機同usb手指 ,覺得好過癮。

突然間覺得今日真係好似親子活動,成家人出街買野咁溫馨,希望第日總有呢啲機會 。
#32 2017-12-01 22:19:28 縮小字型 放大字型

行哂黃金上去高登舊翼睇 ,我同阿盈行去樓梯口開住部手機,上網睇下邊間信得過,最後見網上多人介紹去咗大路centralfield。阿欣係店入面自己行,我同阿盈就聽住個店員推介。

最後阿盈左揀右揀,又見到有其他客人岩岩買完,跟人地好興奮咁揀咗個6K打機組合 ,張內顯唔錯絕對夠打機用,我見屋企有window7老翻所以冇加錢話要埋。但係阿欣睇完野行埋黎,見到張list面色一沉,阿盈都觀察到阿媽面色,就唔出聲咬住唇表情有啲低落,佢知道阿欣覺得部電腦好貴但又唔敢反對,
咁呢個時候梗係到我出馬去打圓場,阿欣畀哂機會我上位。

我 「難得黎到,其實6千蚊唔算貴,呢間口埤最好直接係度買埋囉,都行咗咁耐。」
欣 「6千點會唔貴啊......有冇啲平啲架,我本來諗住4千內,無諗過咁貴。」
盈 「我都覺4千蚊夠睇到片做到功課就得,唔使要咩打機功能。」

呢條靚妹真係好野,又係佢自己有睇片組合唔要,去揀打機組合,而家變臉得咁快。

我 「照買啦,我出錢畀喇,反正我都諗住換機,不如將部電腦放係我屋企,你地想用既時候過黎用。」
欣 「咁點得,點可以要你出錢畀。」
我 「咁一人一半啦,我出3000。」
盈 「一人一半要放係我地屋企喇,你自己過黎用。」
欣 「唔可以要你出錢,不如我地再去問下嗰位sales,睇下有冇其他選擇可以4千內。」
我 「當我都有份囉,呢部機執相剪片好過我嗰部,有陣時如果你地係屋企,我有需要你地又可以既話借畀我用一陣囉。」
盈「真係買咗講明先,禮拜六日你唔可以用,閒日食完飯阿媽係屋企你先可以過黎,每次最多用一兩粒鐘。」
我 「無問題。」

其實我都冇真係諗住用,我部電腦都係年頭先買完,只係搵個爛藉口去買畀佢,盈姐難為佢咁認真出啲咁既不公等條約。阿欣見到我咁堅決都冇再拒絕 畀咗3千蚊我講聲多謝。

我同個sale扑錘,碌張信用卡買咗落黎,等佢砌完裝埋driver大概要一粒鐘,阿盈全程睇住我碌 ,一碌完就手舞足蹈唔知,我見到佢咁笑咗出聲,就算係第一部自己電腦都唔使咁激動,啲學生妹真係容易收買,唔怪得周街咁多援交, 阿盈睇怕都幾有潛力 。佢居然嗆我笑咩笑,擰歪面繼續亂跳成個細路女咁,不過佢見到其他男途人有啲尷尬都望住佢都停落黎。

我地見咁多時間,阿欣話想試間遠近馳名既維記好耐,見網上好多人講,我地行出咗商場去食下午餐。呢間排好耐隊耐,第一間滿哂,等咗陣入去到第二間 裡面都坐滿哂人耐,我地三個全部一致叫咗豬潤麵食耐,見到佢地兩個食到津津有味耐,連減肥都放棄咗。

食完行返去中央田,個砌機佬話人今日人太多單要等多陣先,預要多15分鐘先有,我地亂咁行黎行去打發時間,行到去間game鋪既時候,阿欣叫我地睇陣先,行開咗去廁所轉頭搵我地。

得返我同阿盈,佢望住部3DS Game開口同我講野,我本來仲以為佢想叫我買畀佢。

佢 「喂」
我 「做咩,你想買game,你有3DS咩屋企。」
佢 「唔係啊,你頭先諗啲藉口好爛啊,咩得閒借黎執相剪片,要執相砌咗頭先5千幾嗰部啦。」
我 「我唔咁講你阿媽唔會買畀你喎,我幫你講咋。」
佢 「使鬼你講阿叔,你好多事,唔買嗰部咪買返4千蚊電腦囉,我地仲畀得起。」
我 「又話唔叫阿叔嘅,你自己講架喎,我冇逼你喎。」
佢 「我係鍾意叫,阿叔,阿叔,阿叔......」

我無理到佢,覺得佢都幾無口齒,明明幫完佢裝修應承過唔再講,而家裝完修過河拆橋。佢見到我見到嬲嬲地,猛咁邊篤我條腰邊喂我,見我冇反應又係轉做係咁吱我,我唔怕吱所以佢吱吱下都好無癮。

佢 「你唔係嬲嘛,男人老狗咁小氣架。」

我繼續無視佢,扮睇下啲game,仲向個老闆扮問下價 。

佢 「喂阿叔。」
我 「又做咩啊,盈姐。」
佢 「喂。」
我 「講啦。」
佢 「多謝你... 頭先既事。」
我 「唔使。」
佢 「雖然我都仲係覺得你好多事。」
我 「多事咪好,唔多事你而家邊有部電腦用,要用黎多啲做功課先好,唔好成日掛住睇片打機,畀心機讀書報答你阿媽。」
佢 「得喇,好煩啊,唔使你講都會。」
我 「開心啦你。」
佢 「係喎講明先,今日純粹係搵你幫手搬野,你唔好諗歪咗我同阿媽係同你行街。」
我 「我冇咁諗放心。」
佢 「唔買走囉,冇咩好睇。」
我「等埋你阿媽去埋廁所返黎就行。」
#33 2017-12-01 22:54:49 縮小字型 放大字型

阿欣返咗黎會合,我地一齊返去搵砌機佬,大概試下部機對下啲硬件無問題,就拎箱走人。行到去大街阿盈話想幫手拎 ,咗陣又話累畀返我拎,淨係係側邊搞搞震,不停多角度邊行邊影個戰利品,放上whatsapp同啲fd曬命。
臨走去到深水埗地鐵站出口位,阿欣同阿盈講埋少少野。

欣 「阿盈你遲過10點太晏返要打畀我啊。 」
盈 「嗯,Michelle同Karen佢兩個阿媽你都識,唔使擔心啦。」
欣 「要小心啲啊。」
盈 「張生,你係唔係車埋阿媽返屋企。」
我 「係啊。」
盈 「記住要直接返屋企喎,唔好周圍去。」
欣 「阿盈!」
我 「阿盈咁識講笑,好心啦我會安全直接車你阿媽返屋企。」
盈 「屋企雪櫃仲有牛仔骨同菜,阿媽你拎去食啊,唔使出街買都得。」
欣 「好啊我本來都諗住食埋佢,係喎阿盈,人地張生今日專登禮拜日送我地車我地黎買野,有冇同人講多謝。」
盈 「多謝阿......張生。」
我 「哈哈,唔使。」

同佢揮手走人,我擰轉頭望一望佢,佢係阿欣背後笑到好奸咁對住我用口型講「阿叔」兩個字,條靚妹真係冇佢符 ,不過一天都光哂而家冇阿盈阻頭阻勢。

我同阿欣辛苦咗成當日,終於有時間可以兩個人相處,我地行返去架車度駛返去將軍澳,阿欣唔使我提主動自己坐係副駕。佢既側面好靚,佢知道我望住佢 ,冇擰開默默望住前面,畀我大飽眼福。

佢 「張生,今日唔該哂你。」
我 「陳小姐,唔使咁客氣。」

我地相望而笑,突然間轉咗返用咁正式既稱呼叫對方係好搞笑。
但係阿盈面前仍然咁樣叫大家,保持距離。

佢 「頭先我做咗醜人,我知道阿盈佢鍾意6千蚊呢部。」
我 「阿盈唔會怪你,佢識諗既咁大個女。」
佢 「呢度3千蚊,畀返你先。」
我 「唔使喇。」
佢 「唔得啊,無理由要你出錢。」
我 「我講明咗幫你地畀。」
佢 「唔。」

阿盈佢放返3千蚊落袋,呢次佢冇再堅持畀返錢我,佢知道我唔鍾意佢呢個動作,講好咗幫佢畀就係幫佢畀,係大男人咗啲不過我性格係咁,三千蚊算得咩錢,其實買呢個電腦都己經唔係單純為咗係討好阿盈, 我自己實在唔忍心見到佢冇電腦用 ,我細個屋企再窮都冇缺過電腦,係最多同家姐輪流搶住用。

佢 「你覺得阿盈有冇對你改觀,你今日幫到我地咁多,又出錢又出力。」
我 「希望啦,我見佢買完成個人傻咗好開心。」
佢 「唔係希望啊,係一定要啊......」
我 「一定會嘅,畀啲時間。」
佢 「我地臨訓前會傾下計,今晚幫你講好說話。 」
我 「唔使喇,呢啲野急唔黎,慢慢黎啦。」
佢 「我一早就應該買畀佢,阿盈想要自己有部電腦好耐,佢啲同學個個都有 ,阿盈佢從來冇要求過,但係我知道佢一直都好想要,我又冇錢......」
我 「佢之前唔係都有部咩,佢話住舅父嗰度,即係你阿哥屋企嗰陣。」
佢 「佢嗰部太舊喇,係佢表哥用完唔要換新機先畀佢,我阿哥有問過我,諗住出錢送部畀阿盈,我唔想差屋企人太多野冇要到,我自己衰。」
我 「而家佢都有咪得囉,呢部咁好有排佢用。」
佢 「嗯。」

我開住903電台一路聽 我見阿欣冇講野以為佢訓咗 。

佢 「係喎,你最後決定成點。」
我 「咩決定。」
佢 「你咁冇記性架。」
我 「我真係唔知你講咩,有冇啲提示。」
佢 「尋晚問你個問題啊.....」
我 「你尋晚問咗我咩?」

阿欣拍咗我一下,嬲我唔記得佢問我咩,都唔知邊撚個話女人無記性,以我自己經驗為例,以前同我啲女朋友分手,一定係咁數缺點,係咁翻舊帳,將陳年舊事拎哂出黎數落。阿欣都唔例外,記憶力好得人驚,我要絞盡腦汁不斷回憶尋晚既對話,諗咗好耐先有頭緒。諗完就覺得都己經唔關記憶力事,阿欣佢既問題大跳脫,我一時跟唔到,反應唔到佢想講返尋日既野。

我 「你係唔係講緊 ,聽完你咁講以前啲野,最後決定一唔一齊。」
佢 「唔。」
我 「我同尋日個決定一樣冇變。」
佢 「點解,你聽完唔覺我好自私咩。」
我 「如果你自私既話,呢16年點一個人湊到阿盈咁大。」
佢 「唔係淨係得我...阿媽、家姐、所有屋企人、同埋社工佢地好多人幫咗我好多,得我一個早就捱唔到落去。」
我 「但你都付出咗好多 ,一個人打工養大阿盈,節衣縮食,又冇拍拖,佢而家都好乖好女仔,你落咗好多心機去教佢唔好學壞。」
佢 「多謝你,聽到你咁講我真係好開心,真架。」

阿欣兩眼通紅,用紙巾輕抺眼淚,我熄咗室內燈,從呢排相處落阿欣唔鍾意人地望到佢哭或者飲醉面紅既樣,覺得好肉酸。
#34 2017-12-04 00:11:48 縮小字型 放大字型

佢 「你頭先話我冇中間冇拍過拖,其實我都有同人試過一齊,你想唔想聽我講埋。」
我 「唔使喇,再講你又會喊,我對你以前點唔在意,唔會改變我點對你。」
佢 「聽啦,我唔會喊架,我唔想對你隱瞞。」
我 「點解你咁樣我知道你以前既野,我真係無所謂。」
佢 「我對你唔想有隱瞞,我想你都要講哂你啲野畀我知,我覺得自己對你咩都唔知。」
我 「我問我咩都會講架,你都知道咗好多。」
佢 「我淨係知道你做裝修,細我兩年,性格有啲大男人,鍾意車,住係我隔籬 ,其他我咩都唔知,你有咩壞習慣,你鍾意點樣既女人,你鍾唔鍾意細路......」
我 「慢慢我可以講畀你知,你想聽咩都得。」
佢 「咁好啊,你中小學讀邊間,第一份工搵幾錢,初戀女朋友叫咩名。」
我 「一時之間點講到咁多,你真係問起我。」
佢 「我係唔係好煩......問你咁多野。」
我 「唔係,我冇咁諗,大家搵日坐低慢慢講,不如食飯先好唔好,去新都市食有冇話想食咩。」

其實我由一開始今日點想約佢夜晚食飯,難得幫咗阿盈半日買電腦仁至義盡,
剩返半日可以同阿欣佢相處都唔過份,食餐飯增進感情,點知阿欣表情有啲訝異 覺得我咁問好奇怪,就好似完全冇呢個打算。

佢 「我屋企有飯喇,我唔想晒野。」
我 「你當陪我囉,我冇煮飯本身都係落街買喇,我請埋你喇。」
佢 「唔係呢個問題,你頭先一開始己經有呢個打算?」
我 「係啊,我覺得一場出到黎,食埋先返有咩所謂,食完我咪送你返屋企。」
佢 「咁你頭先咪呃咗阿盈,點解要呃佢。」
我 「我冇呃佢,我覺得我地大人食餐飯啫,唔使同阿盈細路女講得咁清楚。」
佢 「你係唔係唔鍾意阿盈......」
我 「我冇啊,你又諗咗去邊。」
佢 「你今日你係唔係覺得佢有啲無禮貌,佢平時唔係咁,可能同你唔熟見到仲係陌生人先咁,熟咗佢唔係咁。」
我 「我真係冇啊,我覺得阿盈講野係直咗啲,不過而家啲後生女係咁,佢都冇惡意我冇放上心。」
佢 「咁做咩要呃佢。」
我 「唉要我講幾多次,我唔係有心呃佢,算喇咁不如我都係直接車你返屋企。」
佢 「而家幾點。」
我 「7點。」
佢 「食啦,但係下次唔好呃阿盈,我唔想有人呃佢,阿盈嗰到我同佢講返」

我本身仲以為佢本身都有意等夜晚我地一齊撐枱腳,陪我一齊呃住阿盈先。
點知佢一啲意圖都冇,真係諗住聽阿盈話直接返屋企,從來冇諗過出街食 ,覺得出街食好晒錢。我冇諗過阿欣會睇得咁重,佢將呢件事放到好大,覺得我係唔鍾意佢先呃佢,我講完佢都唔信我。講得好地地早知唔提食飯,短短5分鍾個氣氛唔同哂,本來傾得好地地,女人好情緒化易變。阿欣擰去左面望風景冇再傾計,滿懷心事咁。

我地泊低架車上咗去新都城二期睇有咩食。阿欣搬咗黎將軍澳無耐,新都城都係第一次行,唔熟路唔知附近有咩食。我地周圍瓹窿瓹罅,冇拖手並肩而行,星期日周圍都好多人,我地有幾間都有興趣,諗住行晒先決定食邊間。

行到上海婆婆嗰到,迎面撞到一個中學朋友阿康,佢都住寶林附近,我地由細玩到大,以前放學一齊踢波同人打架,而家出咗黎做野間中都仲有聚舊。
岩岩畢業出黎一齊做跟車,之後佢屋企開茶餐廳幫埋手轉咗去做廚 。
本身我見唔到佢,佢認得我走過黎好熱情咁同我地打招呼,阿欣同佢互相點頭微笑。

康 「喂,阿文咁岩既,出黎食晚飯啊。」
我 「喂你又係度既,呢排點啊。」
康 「咁又係咁,仲做緊嗰份工,幾時大圍出黎聚下啊,係個group度講咗咁多次都無影。」
我 「要逐個叫先得架,係group度講無用,我上次有應架。」
康 「喂係喎 ,上個禮拜同阿宜表白,佢答應咗我,我地諗住下年年中結婚啊 。」
我 「咁突然既,你個死仔又唔講我地講,恭喜你喎。」
欣 「恭喜你。」
康 「多謝你地,上個禮拜仲忙緊,見到你提咗我,我轉頭同大家講返,你係第一個知,喂伴郎我預咗你架,你走唔甩。」
我 「你開定聲我一定做,你仲以為你富貴咗發咗達唔記得我地班fd。」
康 「講呢啲衰野,喂你,都咩喎,有著落啦出黎拍拖行街,喂阿嫂,唔好意思頭先唔記得打招呼,我係阿康,你好你好,阿文你介紹下啦企係度。」
我 「阿康,我老死 ;阿欣 我......我表姐。」
#35 2017-12-04 01:02:48 縮小字型 放大字型

我一時之間唔知點介紹阿欣,口快快講咗表姐,話女朋友又驚得罪阿欣,話係同鄰居女人出街食飯撚有人信,阿康一定會懷疑之後係個group度爆料,個個鬼殺咁嘈,表姐算係最安全既講法。引導完佢地互相介紹,阿欣聽到阿康咁講就耍手擰頭,個樣好難為情。

欣 「阿文車我黎陪我買少少野咋,我地唔係你咁諗......」
康 「哈哈唔好意思,係喎表姐你介紹啲女仔畀阿文識啊,我地成班人得佢我同佢未結,而家我都就黎結婚,佢包尾緊。」
欣 「有機會介紹畀佢。」
我 「你個死仔唔好咁多野講。」
康 「唉唔阻你地,我食飯先,阿文下個禮拜出黎飲野啊。」
我 「好啊,Bye。」

同阿康道別之後,阿欣諗到想食魚米家平平地,同埋間野唔算多人有位,
我地入咗去食,落完單等野到阿欣問我。

佢 「頭先個朋友,你地好熟架?」
我 「由細玩到大喇,小學到中學都同一間,以前成日放學去踢波。」
佢 「你頭先做咩叫我做表姐......」
我 「我一時諗唔到點叫你,我地而家關係.....唉我都唔知點叫。」
佢 「我無嬲你咁叫,我個樣咁老唔通你叫我表妹咩,其實你話我係你親家姐都得架,只係表弟同個30幾歲表姐一齊單獨出街好似怪怪地。」
我 「佢識我家姐架,以前成日黎我屋企玩,佢中學嗰陣暗戀我家姐仲拜託我幫手約佢。」
佢 「咁你叫我做表姐都岩既,我又未係你......」
我 「女朋友?」
佢 「唔。」

其實都預咗佢冇當過我係男朋友,以阿欣既慢熱性格我地關係絕對冇發展得咁快,上次問佢都閃爍其詞唔答我,就算拖過手唔代表係啲咩,最多係嗰一刻一時感動。而家聽到阿欣佢親自講出口都難免有啲傷心,不過佢肯確認呢段關係既階段都好,起碼唔會曖昧落去,同自己講唔好咁急慢慢黎,畀啲時間大家慢慢發展。

我地唔知點接住話題。講落去講呢個話題有啲尷尬,我開手機睇下whatsapp。阿康聽完我咁講係個群度補返同大家公佈喜訊,個個人都恭喜佢做老襯,阿欣好專心陪我一齊睇,碌我啲訊息向上睇,佢都戥我朋友開心。

佢 「你朋友睇落好開心。」
我 「係啊,佢鍾意咗阿宜好耐。」
佢 「佢講嗰個阿宜你都識架?」
我 「我地師妹黎架,佢地兩個由中學識到而家,斷斷續續一齊好多年,前排佢有同講我地講想表白,估唔到佢一次就成功。」
佢 「唔怪得佢咁開心。」
我 「哈哈。」
佢 「係喎你個朋友冇係你個群組冇提起我地,好彩佢信我係你表姐,如果唔係你俾你啲朋友笑。」
我 「笑我咩?」
佢 「笑你同個單親女人一齊行街。」
我 「佢地性格好好唔會笑架,同埋單親媽媽邊有樣睇架,我唔講佢唔會知。」
佢 「 如果知道夜晚要食飯我唔會咁著.......我今日著衫又老土成個老師奶咁,冇點化妝塊面尋日喊完好腫,好易睇得出。」
我 「我都唔覺,我地男人都唔會留意呢啲野咁清楚。」
佢 「覺架,我唔想你畀你啲朋友笑。」
我 「笑咪笑,就算係咁我都唔介意架。」
佢 「你唔介意我介意啊......你啲朋友個個都結哂婚,佢地會笑你急結婚到連又老又污糟既單親媽媽都要。」
我 「你唔好咁諗啦,我地班男人都係3字頭左右,全部都唔細啦。」
佢 「我冇得唔咁諗......你班朋友唔細,但係佢地識啲女朋友一定個個都好後生。」
我 「咁又冇。」
佢 「咁嗰個阿宜幾多歲?」
我 「er......」
佢 「講啦。」
我 「28,29左右囉。」
佢 「唔.....」
我 「食野先唔好講住。」

咁岩講完之後啲野食黎咗,我地食住傾下啲天氣無謂野,都係一句起兩句止。
阿欣叫我唔好食咁飽等陣去食M記甜品,有啲重要野想同我講,呢到人多講唔到。我地兩個都食咗下午茶打咗個底既關係,食咗少少就夠皮,留飯個肚等陣食甜品。

識落咗阿欣,我發覺佢實在好介意人地既目光 ,對好多好小事都感到焦慮惶恐 ,任何事都放到好大。佢會好擔心人地覺得佢老、擔心人地話佢單親、擔心我介意佢既過去、驚我唔鍾意佢個女、驚我實際上係個壞人。
對任何事都好冇安全感 ,內心好脆弱,無論講到咩既話題都可以往壞既一面諗
我本來都唔察覺,愈同佢熟咗發現佢呢個特徵,佢自己應該都控制唔到,
我自己冇接觸過呢種女人無經驗,唯一可以做既只有多啲陪佢開解佢。

埋單嗰陣,阿欣拎住張單睇一睇,佢好堅持要AA制,我又講唔贏佢,最後各自各畀。食完我陪佢去Panash買阿盈聽日既早餐,買完我地揸車返去屋企先,我放低部電腦係佢屋企就一齊行出去。
#36 2017-12-04 01:03:15 縮小字型 放大字型

落到M記我地叫咗兩杯新地,不自覺咁坐返尋日坐嗰張檯,連坐既位置都同尋日一模一樣,完全係預備好等陣學尋日一樣講心事。側邊好彩都冇咩人會聽到我地講野

遠處近住玻璃窗度,有個30歲左右女人抱住個BB,墊張紗巾下巴底,抱住個BB餵奶樽 ,飲完幫佢掃風。阿欣全程都好入神咁一直留意住佢地一舉一動,等個媽媽將BB放返架車度 ,繼續食野嗰陣,阿欣擰返個頭過黎望住我同我講。

佢 「個BB好可愛。」
我 「係啊。」

阿欣係銀包拎咗張相出黎,係一個泛黃既相,相入面個BB女兩三歲左右有少少肥,係草地玩緊,唔使問阿桂都係阿盈黎。佢望住張相笑到好甜,畀完我望一眼之後,自己望住張相一陣先收起入去。

佢 「阿盈細個都好可愛。」
我 「係啊肥嘟嘟,幾得意。」
佢 「個媽媽......同我一樣。」
我 「同你一樣咩?」
佢 「係單親。」
我 「你點知佢係?」
佢 「佢隻手無戒指。」
我 「可能佢係保母黎呢。」
佢 「唔會,你望到佢眼神就知,媽媽先會咁望住仔女。」
#37 2017-12-04 20:44:46 縮小字型 放大字型

阿欣食咗幾啖新地,開始入正題,言氣好平穩,表情好認真,睇得出意志好堅定咁,完全唔似會喊,應該係諗得好清楚先同我講。

佢 「你上次幫完我地裝修,又送野畀我,今日又幫阿盈買電腦,我好多謝你,我知道你唔係可憐我先送野畀我,我好開心。」
我 「唔」
佢 「你今日又話唔介意我以前係點,肯同我一齊。」
我 「係啊,我好認真架,如果你要我講以前。」
佢 「如果你真係想同我一齊,你會好辛苦,我唔知你可唔可以等,最近我覺得自己係一個女人,好似無咗你就唔得,生活經濟上好依賴你。我係車度咪同你講過。我咁多年中間同過一個男人拍過一次拖,嗰次最後累到阿盈有陰影,由嗰陣時開始我唔敢再做女人,我唔敢再承受風險。」

我 「做女人有咩問題,你係一個女人啊,善解人意又溫柔,顧人感受既女人 ,做自己有咩問題。」

阿盈將視線望向坐係玻璃窗嗰度個媽媽,就好似佢令到阿欣記清自己既身份。

佢「但係我本來以前下定咗決心同阿盈兩個一齊就算,我地兩個人既生活唔會有咩改變,就算再窮都無所謂,簡簡單單生活,守護住佢。睇住阿盈佢大個女,第時考完Dse讀完大學搵份好工養到自己,拍拖識到個好既男朋友,結婚生小朋友幸福就夠喇,唔好學似我人生咁。」

我「你而家先係30中仲好後生,你仲可以黎多次,要為自己著想下,阿盈都大個女,過兩年考完公開試都係成年人。」

佢「呢個係我憎自己既地方,我以前都冇咁強烈,覺得有阿盈陪我就夠。呢幾年我照鏡見到自己眼角有皺紋開始老,以前啲姊妹好多知道我單親疏遠晒唔敢約我出街,真係知已嗰一兩個又結晒婚,成日行到街個個都一對對,同事又交唔到心食飯都係傾公事,除咗阿盈就好似得我自己一個好寂寞。我唔甘心日日都係返工放工湊女煮飯,放長假咩都冇做就咁過咗,人生好似得返工咁就一直老。我都想有人錫,有人聽我呻返工既野,有人陪我分擔。搬咗係你隔籬之後,你肯聽我講以前啲野,陪我傾心事,又對我咁好,我好想試下再做一次女人,同普通女人一樣拍拖談戀愛,我而家心裡面,明知自己咁多顧慮都鍾意你,甚至連如果阿盈反對都想同你一齊,我分唔到自己而家係一個媽媽定女人,我覺得我有呢個諗法好對唔住咁盈。」

我 「大家都鍾意對方咪得囉,做媽媽同做女人唔會有衝突架喎,你係一個好媽媽,我信你可以兩個身份都做得好好。」

佢 「我係怕自己為咗做女人拍拖變到好盲目,同你識得一兩個月,我發覺自己對你咩都唔知, 唔清楚你為人,我驚你係唔係想討好我先對阿盈好,唔係真心鍾意阿盈,第日對佢好差;我驚你第時會唔會嫌我老,覺得相處落冇細路女咁嗲冇哂青春就唔要我;我驚你係唔係為咗同我上床先同我一齊,第時我滿足唔到你會離開我。我自己受傷就好,阿盈對我好重要,我唔想佢同我一齊受傷。同埋你都係,如果你同我拍拖,你會畀你啲朋友笑到面黃,俾屋企人反對同佢地嘈交,出面啲人會好多閒言閒語,你不如搵一個細過你又未生過仔正正常常既女仔一齊。」

我 「我可以用時間證明畀你睇,等幾耐都無所謂。我係有性需要,但係呢個唔係我想同你一齊既原因。同埋我未必係一個好好既男人,有好多壞習慣,學歷唔高,做裝修呢啲粗重工,講野有陣時大聲啲粗魯啲,搵錢又唔多,得間公屋冇私樓,但係我會對你地好好,努力搵錢畀最好既你地,等你地可以改返啲好既生活。我係真心鍾意你,想對阿盈好,如果起埋一齊我當佢係我自己女咁看待,同埋我唔怕人地點講我地。」

佢 「你真係等幾耐都無所謂?」

我 「係啊 只要你肯畀機會我等你。」

佢 「如果我話每星期周未得幾個鐘頭拍拖,要係阿盈出咗街先見得對方,佢返屋企之前就要散,其餘時間我都做返一個媽媽,你可以?」

我 「我肯啊 好多情侶每個禮拜都係咁 有咩問題。」

佢 「仲未講完 要暪住阿盈同親戚朋友唔可以畀佢地知,我地偷偷摸摸咁係幾個鐘頭裡面儘量了解對方,到我清楚你係點既人,可以完全相信你,先真正任何時間都同你一齊,同阿盈佢地所有人講我地既關係,最壞既話可能要等幾年都唔定,你都肯?」

我 「我可以」

佢 「你而家咁講就易,講咩都得,我有晒心理準備,你可以隨時後悔,如果我某一日whatsapp你冇反應唔覆我,落到樓下唔見你出現,我地就結束呢段關係。繼續做返普通既鄰居,你做你既張先生,我做我既陳小姐,大家倒垃圾見到點下頭打招呼,我提下你下個月大廈冇鹹水要留意下,唔好成日再食外賣飯無益,快啲搵返個女仔。幾年後你同一個後生過你又好既女仔結婚,你敲我屋企門派喜帖,我接咗你張請飲帖笑你做咩咁大整蠱要我出錢去飲,笑完你就讚你放得低,叫你要以後對個女仔好啲,之後我同阿嬸阿盈一齊坐車出席你婚禮。」
#38 2017-12-04 20:47:03 縮小字型 放大字型

我 「唔會有呢啲事發生,我唔會後悔呢個決定。」

佢 「點解你咁傻,為咗我一個老女人,你等到我,到時我都可能己經30尾,人老珠黃。」

我 「我年紀都唔細啦,同埋可能係我鍾意姐姐照顧掛,由細一屋都係大過我既女人,我鍾意同佢地相處。」

佢 「咁都唔係要一個單親既姐姐。出面咁多好既姐姐,單親姐姐咁冇魅力又負累。」

我 「咁岩隔離屋黎咗個姐姐,我太懶唔想出門口搵第二個。」

佢 「你睇下你幾懶 ,唔怪得你咁大肚腩啦,做下運動啦。」

我 「你地禮拜日羽毛球嗰陣叫埋我囉。」

佢 「唔得啊...你有冇聽我講架......其餘時間我想繼續做一個媽媽,我真係唔想同阿盈一齊既時間有改變。」

我 「我講笑咋,我明白你講咩。」

佢 「咁由下個禮拜開始,我每個禮拜六whatsapp你一次,問你得唔得閒,等星期日阿盈出咗門口我再問你多一次確認,出既話我地係樓下等,如果阿盈唔出門留係屋企,咁我地要暫停一個禮拜,咁樣好唔好。」

我 「今日開始得唔得。」

佢 「而家八點幾啦......」

我 「仲有個幾鐘啊,阿盈唔係十點返咩。」

佢 「做咩要咁急,唔差在一星期啦。」

我 「諗到聽日要返工啊,一諗起就痛苦,同你一齊時間好開心,趁仲有時間我都想同你一齊。」

我 「有邊個想返工喎,我聽日仲要返早啊,我都想傾多陣唔想做咁就落床訓......不如我地傾下計囉今次,唔做其他野。」

我唔介意每個星期同阿欣只得幾個鐘頭相處既時間,只要阿欣都有意發展落去就得喇,唔使再羅羅攣唔知佢點睇呢段感情,而家起埋有個開始。
就算平時見唔到都無所謂,佢遇過咁多感情挫折,身心疲憊,本身己經放棄咗做女人,疊埋心水做一個得媽媽算,擔當埋父親角色唔想畀人見到佢軟弱既一面。唔想再去改變現狀令到佢兩母女受傷害。實際上佢都係女人仔一個,夜晚會寂寞,做野唔開心想傾個人訴苦,而家難得肯畀個機會我,照顧佢保護佢,放下對男人既戒心。 其實彼此了解對方都好,我都想知道佢既過去,等我可以唔好重蹈覆轍犯佢之前男人做過既錯,可以用時間等佢慢慢了解我。
直到佢消除所有焦慮,相信我係真心對佢兩母女好,到時候先至同阿盈同屋企人朋友公開關係,可以無顧慮任何時間,不理人地目光咁拍拖 ,做一對真正既情侶。

阿欣佢而家好似姐姐版既灰姑娘,限時前就要返到屋企,我地要偷偷摸摸有啲似地下情既方式一齊,主要係顧及阿盈既感受,唔好影響到佢地本身兩母女既生活。阿欣佢平時對阿盈好自由,阿盈想出街一定會畀佢出,只要唔好太遲返屋企有交帶就得,唔會過問咁多。
但佢對自己佢好嚴厲 ,一定要阿盈返屋企之前早過佢返到,平時如果放工遲咗,佢都一定打電話問阿盈返咗屋企未自己煮飯先。
佢唔想阿盈返到屋企見唔到阿媽覺得空虛寂寞,有錯覺覺得阿媽同人約會拍拖,冷落咗佢會亂諗野。
阿欣想無時無刻係阿盈身邊關心佢,就算阿盈而家咁大可以獨立,阿欣都唔放心,永遠當佢係細路女咁看待。
我覺得阿欣佢好偉大,係一個真正既母親,其他時間我唔會都唔想干涉佢地原有既生活,就當係普通鄰居一個。

我 「係囉 ,唔好無啦啦講到咁感性浪漫,講返啲開心野咪好。」
佢 「講感性野唔好咩,我地女人係咁,鍾意講呢啲野。」
我 「唔係 我自己唔識野呢啲野啫,梗係覺得好扭擰好肉麻,我起哂雞皮。」
佢 「你都講得幾好啊。」
我 「可能睇慣日劇掛,諗到咩咪講咩。」
佢 「我都係睇開愛情小情諗到咁多野,頭先我好長氣係唔係,我想講呢啲說話好耐,好浪漫,係喎你有冇睇小說架。」
我 「講其他得唔得,我冇睇開,我一睇小說幾頁就會瞓覺。」
佢 「怕咗你喇,陪你傾下日劇啦,我以前都有睇好多.......」

終於可以傾返啲輕鬆既話題,仲要大家都有興趣傾落去。
算係鬆一口氣,起哂雞皮講咗咁多肉麻野,雖然全部都係真心說話 。
阿欣同我邊食住新地講傾,佢都鍾意睇以前既日劇 ,舊嗰啲經典劇有追哂,而家新嗰啲比較少,都係睇大陸同韓劇多,阿盈down落黎搵埋佢一齊睇。
佢都好多女仔一樣都好鍾意以前既木村,最鍾意佢彈鋼琴深情既樣,鍾意日劇既浪漫劇情有好有憧憬。
就係咁我同佢一直傾舊時既日劇 ,我地傾返Hero啊、長假、戀愛世紀、求婚大作戰、女皇的教室啲經典劇集既劇情 。
講下木村同松隆子定山口智子襯啲,多田老師被岩瀨健搶老婆有咁慘,阿久津老師算唔算一個好老師。

大家有講有笑,總算等呢個星期日冇白過,呢次係我地第一次既正式既約會,雖然得一粒鐘但都過得好開心。

講完到大概九點半既時候,我帶阿欣返屋企先,係阿盈返黎之前幫佢安裝埋部電腦整個window。我好期待下個禮拜既來臨,只有求神拜佛阿盈星期日一定要出街玩唔好咁痴家,等我同阿欣可以拍下拖。
#39 2017-12-06 00:19:13 縮小字型 放大字型

離聖誕節到之前,我地總共出街三次,慢慢見住阿欣一路以來既變化,完全變咗另一個人咁,解放返自己女人既身份,反而開始令我有啲自卑感。

講第一個星期先,苦等咗成個星期 ,慶幸既係貼中咗阿盈禮拜日又躝街,條學生妹真係唔孝順,不過對而家既我絕對係好事。禮拜六夜晚阿欣whatsapp我,確認我聽日出唔出街,我梗係話出,到咗第二日5點幾我忍唔住whatsapp阿欣行得未,阿欣覆返我阿盈換緊衫唔好咁心急,直至到六點鍾等阿盈走咗 ,阿欣先叫我可以出門口,問我食咗飯, 轉頭一齊出去食埋飯。

落到樓見到阿欣,佢依然打扮得好簡單,化咗個淡妝,著黑色Tee牛仔褲好普通行街既裝束。我間車拎咗去打蠟,所以我地搭巴士坐98A出apm,坐車傾下點解今年15年既冬天咁暖,啲外套長袖冇得著。

出觀塘係阿欣既主意,佢唔想留係將軍澳,又唔想去咁遠得幾個鍾頭時間,咁唯有係觀塘近近地。佢事先知道阿盈佢今日陪朋友係新都城行街,所以寶林將軍澳地方我地搏唔過好高風險。同埋佢驚又好似上次咁撞到我既中學舊朋友,好多都仲住係附近冇搬過,現階段唔可以露面公開畀人發現,阿欣佢既理論係到時散咗都唔會畀人知道我溝過單親媽媽呢個污點。

其實APM都好大風險,人又多,不過勝在我都有啲主場優勢,可以主導阿欣,住將軍澳友唔計本身將軍澳,或者約人作客去旺角,最熟路都係觀塘APM或者德福,以前成日11樓未摺之前去打機。

不過由於事出突然,臨時先改做APM避開阿盈,完全冇計劃過今日既行程好失策,上高登問人又唔夠時間,近年冇點少咗出街有啲唔認得路。阿欣咁耐冇拍拖好少出街行商場,有都係孖阿盈買下衫,之前又唔係住呢頭佢都唔熟路。所以佢都係跟住我走,一開波見肚餓我地求其去咗食算抵食既味千拉麵,佢出門口之前淨係煮咗畀阿盈食自己冇食,留肚陪我一齊食飯,呢個真係好感動。

食飯嗰陣我地冇好刻意咁了解對方講心事,可能係咁樣做太過急,阿欣應該都有咁既感覺,大家好自然咁傾下搵野傾下,傾得最多都係上個禮拜發生既野。
好在一路傾都傾唔停,冇見一個禮拜好多野積落黎想同佢講,同佢訴苦講下做野啲唔開心野,阿欣麵都冇食停哂手,聽住我點屌啲客有幾麻煩 ,傾好咗報價單又要改3-4次,單野好多鑊。 佢全程好留心咁聽我講野,就算佢唔識裝修野 ,都會理性咁畀意見我嘗試去開解安慰我,有種成熟姐姐既感覺,同佢相處係好舒服。偶然先會細路女咁嬌嗲呻下一兩句自己既野,怨下邊個同事成日唔做野。

食完飯我地拖住手漫無目的地咁行,間間鋪我地都行一圈,拎上手睇兩眼就走人,阿欣樣樣野都覺得好貴,不過apm啲野的確係幾貴。
咁樣行落去我驚阿欣會覺得好悶 ,第一次出街個頭一定唔可以衰,咁所有女人都一定鍾意買衫,問佢睇唔睇衫。阿欣我都估到佢心思思,不過佢話剩係諗到行H&M,佢平時同阿盈黎黎去去都係呢間野買衫 。

我提議話帶佢去行LOWRYS FARM,本來以為阿欣唔識呢間野,點知阿欣係店門口拉住我隻手停低問我。

佢 「做咩帶我黎呢間?」
我 「呢間有咩問題,啲衫好多款。」
佢 「阿盈講過,呢間賣少女服裝多。」
我 「呢間咩都有賣架,實搵到岩你心水嘅。」
佢 「我唔想咁諗,但你係唔係覺得我著到好老土成個師奶咁,行出街好失禮你。」

阿欣又黎,啲疑心病又發生,疑神疑鬼,雖然其實我真係有少少覺得佢著得好老土有啲大媽味,但係帶佢黎主要原因係因為以前啲20幾歲嗰陣,以前啲女朋友都鍾意呢間野,貪佢日系啲cutting好。

我 「我冇咁諗啊。」
佢 「同你講下笑昨,你睇下你騰雞到啊,同你一齊我都想著靚啲。」
我 「你嚇得我。」
佢 「入去睇囉。」
#40 2017-12-06 00:19:48 縮小字型 放大字型

阿欣挽住我隻手入去睇衫,佢對好多件衫都好有興趣,擺上身照鏡,但次次望到價錢牌又卻步放返低佢。揀咗好耐,佢唔意思咁問有冇悶親我,點都有啲架喇講真,不過同佢講梗係話冇,最後佢搵到心水,兩隻手提起問我兩件衫問我邊件靚啲。

佢 「你覺得邊件靚啲?」
我 「左面囉,啱既話兩件都買囉。」
佢 「我都想啊,呢度啲衫都唔平架,又冇做特價,我淨係諗住買一兩件。」
我 「我送畀你囉。」
佢 「咁......左面嗰件你送畀我,右面呢件我自己畀。」
我 「你今日咁肯攤既,肯我畀錢送野畀你。」
佢 「交換昨傻佬,我都有野送畀你,下個禮拜我煮野畀你食。」

初頭聽到佢第一二句仲以為有得屌西有少少興奮 ,不過聽落去坐底有住家飯食都唔差,阿欣煮野真係好好食。最後阿欣選咗兩件外套同兩件tee,裡面有兩件都係幫阿盈買埋,另外佢自己嗰兩件就我出錢送畀佢 。愈黎愈覺得阿欣可以經濟上依賴我,唔再覺得我係可憐佢。佢又會回報返我,係雙向既付出,佢畀到我有男人既成就感,好有搵錢既動力,諗定聽日返工爽手啲上油搞掂哂佢,接第二單野做。

買完衫阿欣個樣好滿足買到好爽,話好耐都未試過買咁多靚衫,平時都係一年先會買一次咁多衫,出鋪之後問我下星期夜晚有冇想食咩。

佢 「有咩話想食咩,麻婆豆腐之外仲有冇。」
我 「你又記得麻婆豆腐嘅。」
佢 「嗰日飲酒你講過嘛,應承咗你梗係記得,唉啊你未答我除咗麻婆豆腐仲有冇想食啊。」
我 「蒜油意粉好唔好,簡簡單單。」

我前排睇完偶像bob叔條片教人煮蒜油意粉, 就同佢講想食蒜油意粉。
點知阿欣個樣好困惑,原來佢唔識煮呢味野難到佢,佢又唔服輸扁起個嘴。
因為之前佢口口聲聲講過自己咩都識煮,佢都有今日喇,即刻拉咗我上去三聯摷烹飪書。

兩個人分頭逐本書逐頁搵,睇下有邊本教人煮蒜油意粉,問埋人幫手搵黎搵去都搵唔到,最後佢放棄變咗買小說書。
行完三聯我想帶佢去百老匯睇愛情片,諗住坐定粒六睇完可以借住氣氛嘴佢,但係因為我地無計劃行咗半日,晒咗好多無謂時間己經好夜。
阿欣打完電話畀阿盈,講完電話同我講阿盈今早九點半會早返,咁就算數唔睇戲等下次,今日襟旗收工係咁多。唯有得返指定動作去咗買山崎麵包畀阿盈聽日做早餐 。

搭車返去嗰陣,阿欣叫我開youtube畀佢睇,我地兩個人一人一邊共用上次黃金買嗰個耳機開住部手機睇bob叔教人整蒜油意粉。佢第一次笑到見牙唔見眼,話呢個bob叔講野好搞笑,仲笑我做咩咁鍾意睇但係又可以唔跟佢學煮餸,重睇一次佢先慢慢默念叫低啲步驟。睇到一半哎呀咗一聲,後悔頭先早知行去買埋個廚具,佢話唯有聽日收工去買埋。

落完巴士企係巴士站,阿欣撥一撥頭髮,兩隻手攬到個LOWRYS 紙袋好實望住我。

佢 「今日好開心,雖然得幾個鐘。」
我 「下星期不如全日,可以玩得開心啲。」
佢 「我地講過嗰喎,你唔記得咗咩,你係唔係第一日就後悔,如果係下個禮拜就完。」
我 「我問下啫,我知道個遊戲玩法。」
佢 「唔好用遊戲呢個字啦,我睇得呢段關係好認真,唔好咁講喇......」
我 「係喎今日好似冇咩講以前既野,傾下心事,都係傾啲日常野返工野。」
佢 「慢慢黎啦,我想慢慢去了解你,今日夠架喇。」
我 「好啊,唔使急好多時間。」
佢 「唉聽日又要返工,唔返得唔得。」
我 「唔好返囉,我......」
佢 「你唔好又要講話養我啊,到時我真係聽你講辭咗份工,你又走咗佬,我同阿盈兩個食咩。」
我 「你知我住邊咖,我點走佬。」
佢 「講笑昨係喎,臨上樓想問你一個問題。」
我 「問啊,咩都答。」
佢 「我今日算唔算一個合格既女朋友,我好耐冇拍拖,我唔知會唔會悶親你。」
我 「我驚我悶親你咋,今日冇計劃四圍騰,但係我自己今日好開心。」

阿欣放低個袋,拮高隻腳錫我塊面一啖,錫完笑住話下個星期由佢plan,自己走先叫我等陣先前後腳上返去。我挨住條杆食埋支煙回味下隔5分鐘就上返去,諗到佢之前話要身兼埋父親照顧阿盈,驚自己無哂女人味,我只係覺得佢係一個失職既父親。就係咁無驚無險完咗第一次既約會。

到咗第二個禮拜有啲阻礙,禮拜六阿欣同我講阿盈唔出街留係屋企用電腦,上次斷wifi條橋又用過,用得多阿盈再蠢都會懷疑,不過只要啲學生妹祟物質主義呢點永遠係真理,我就有方法要佢出街。
#41 2017-12-06 16:48:37 縮小字型 放大字型

我臨時臨急whatsapp問阿欣拎阿盈電話幾號,阿欣冇過問我要黎做咩就畀咗我。加咗阿盈佢之後sd message問佢野,呢種行為其實阿欣係禁止,如果佢知道應該會好反感,今樣同呃阿盈無分別,佢儘量唔想我地既事干預到阿盈,呢個係呢段關係既底線,不過無辦法鋌而走險都要做,為咗可以同阿欣出街。

開阿盈個頭像睇,同阿欣一模一樣,都係西餐廳食飯合照相,佢地兩母女感情真係好好,相都用同一張。

我 '阿盈,你星期日得唔得閒?'
佢 '你係?'
我 '隔籬屋個張生啊'
佢 '點解你有我電話?'
我 '好耐之前幫你地屋裝修 你阿媽畀埋你電話我話搵唔到佢就搵你'
佢 '搵我有咩事?'
我 '想問你聽日得唔得閒 想搵你幫手做少少野'
佢 '唔得閒 講做咩事先'

呢友咁串話自己唔得閒又要我講,我本來都唔想睬佢,不過大局為重都要忍佢。

我 '我本來想去買最新既韓國保濕面膜送畀啲大人朋友 但我臨時星期日有野做行唔開 間野係旺角 睇下你可唔可以幫我去買'
佢 '點解搵我幫手'
我 '我諗住你可能得閒 又熟呢啲潮流野出開街'
佢 '幫你我有咩好處先'
我 '我買4盒送1盒畀你自己拎去用'
佢 '有咩企圖 無喇喇係要搵我'

阿盈佢疑心好重唔信人,會係窮追不捨咁問你,要毫無破綻合邏輯先說服到佢。同樣都係疑心重,但係阿欣呢方面最近改咗好多,唔知係唔係一齊咗之後既關係,諗諗下其實阿欣唔多唔少令到阿盈都有咁既性格,有啲家庭成長影響既關係。

我 '冇啊 真係純粹搵你幫手 見你之前鍾意用面膜 第一個諗到搵你'
佢 '咩牌子面膜黎'
我 'Dewytree 有冇聽過'
佢 '最少2盒'
我 '好 無問題'
佢 '你send個間鋪地址畀我 錢我而家出黎拎'
我 '後樓梯等 唔好同你阿媽講 佢可能唔鍾意你收人禮物做跑腿'
佢 '好'

其實我一早預咗佢會討價還價,所以2盒都係預算之內,己經比我原先想像3盒少。另外嗰一盒打算做驚喜送畀阿欣,佢嗰日傾計知佢對化妝野愈黎愈有興趣,淨返嗰盒還返人情畀家姐。

行咗出去後樓梯食住煙等咗陣,佢著住拖鞋行入黎攤大隻手問我拎錢。

佢 「錢」

我塞完錢畀佢同佢講,佢點一點數。

我 「有多架喇 淨返百幾蚊你拎去同朋友出街夜晚食埋飯先返囉 去玩下輕鬆下啦 讀書都應該讀到好攰 」
佢 「多謝喎 咁好死嘅你 喂呢隻野好多大人用架咩」
我 「廣告都有賣啦 中環好多OL用」
佢 「話時話呢 你上次送嗰隻面膜呢 用完真係皮膚好咗好多 喂我而家個樣似唔似20幾歲」
我 「似啊 成熟咗好多個樣」
佢 「我啲fd又話唔係好睇得出......」
我 「你嗰啲係女仔fd?」
佢 「係啊」
我 「邊有女仔會讚第二個女仔靚咗 唔好話我話 你啲朋友實係妒忌你」
佢 「喂唔好咁講我啲朋友 佢地唔會咁諗」
我 「我講錯囉 sorry」
佢 「係喎 未問你呢 你另外嗰兩盒送畀邊個 講唔講得啫」
我 「我啲親戚朋友啫 唉講你都唔識啦」
佢 「真係?」
我 「呃你做咩啫」
佢 「哦 無野啦嘛 我返入屋先 咁我買完第二日拎畀你」
我 「好啊 唔該哂」

就係咁轉個頭不出所料唔使我自己問,阿欣whatsapp返我同我講阿盈聽日突然有朋友約出街,聽晚唔留係屋企,我地約會照舊聽日,唔係我睇死啲學生妹,不過佢地真係俾人批中咁拜物質主義。

第二日星期日等阿盈出咗街,阿欣叫問我入佢屋食埋飯先行,入到去佢己經煮好哂野放上檯叫我自己一個食住先。佢匿埋係廁所裡面化緊妝,無走數佢真係煮咗麻婆豆腐同蒜香意粉,加個青紅蘿蔔湯。個組合其實好唔夾有啲怪,但係食落好開胃好好食,食食下佢打開少少廁所門問我。
#42 2017-12-06 16:50:29 縮小字型 放大字型

佢 「好唔好食」
我 「好食啊 你又話唔識整蒜香意粉 煮得好有水準喎」
佢 「我都係睇條youtube片學架咋 尋日失敗咗一次架我都 呢次岩你食就得 食快啲喎我換埋衫就出」
我 「唔」

講就咁講,我正常速度食哂飲埋碗湯佢都未肯出黎,幫佢洗碗洗到一半,阿欣換好衫企係我後面。我擰頭轉睇,望到個人呆咗,阿欣成個人唔同哂,完全脫胎換骨,洗走哂陣師奶味。

著咗上次買嗰我話靚啲嗰件件lace外套係出面,襯埋個吊帶連身裙,連個妝都完全唔同,塊面透紅光澤,畫哂眼線,搽上粉紅色唇彩,遮哂眼袋見唔到。
個人後生咗幾歲又保留到嗰種成熟感,又唔會話好濃好做作,嗰種美艷性感既女人味真係好撚正啊 。佢實係用咗好多時間去化妝,之前從未佢都冇咁用心過,佢見到我眼金金睇到入神個樣,掩嘴笑得好羞澀又表情好期待咁問我。

佢 「做咩?」
我 「阿欣你今日好靚.......」
佢 「多謝 冇時間啊 有時間會去燙埋髮」
我 「你而家都己經好靚喇夠做......真係架」
佢 「咁下次先囉 行未啊?」
我 「我洗埋碗行囉」
佢 「返黎我再洗喇 擺低先啦無時間喇」
我 「返黎十點幾囉喎 你聽日唔係返早咩」
佢 「得喇 唔洗擔心」

雖然時間緊逼,但平時既阿盈應該都會洗埋碗先出,而家睇得出佢真係好趕出門口,個樣好心急。返黎再洗都係搞著自己,佢今晚本身要早瞓。阿欣著到咁靚,反而令到我有啲見形相絀,早知gel下個頭換件好啲既衫,一路行仲聞到佢噴咗新既香水,陣味好濃郁,行到入𨋢阿欣問我。

佢 「阿盈話去今日去買面膜 係唔係你叫佢架?」

我即刻心慌,估唔到阿欣佢知道咗,阿盈把口真係口疏,啲靚妹都係靠唔住做唔到大事 ,靠佢真係死得,我都預咗捱罵,呃佢可能仲死,佢好有可能係明知故問,老老實實講真話算。

佢 「係啊 對唔住啊 我今日真係好想見你」
我 「哈哈 下次唔好喇 咁哂錢」

佢就咁笑住輕輕帶過一句,完全聽唔出有責怪既意味,仲好似語氣默許咗我咁做,完全出乎意料之外。如果係之前早就又話我做咩呃阿盈,係唔係唔鍾意佢,自己諗埋一邊放到好大。

短短一個星期,我發覺阿欣個人完全唔同哂,但又唔係好識形容講得出個分別。唔罵我正常應該係好事先真,但係唔知點解我有啲不安。